ກະຊວງພາຍໃນເຜີຍແຜ່ເອກະສານສຳຄັນ ໃຫ້ສະມາຊິກພັກ

  ເມື່ອບໍ່ດົນຜ່ານມານີ້ກະຊວງພາຍໃນໄດ້ຈັດກອງປະຊຸມເຜີຍແຜ່, ເຊື່ອມຊຶມ 4 ເອກະສານ ທີ່ສໍາຄັນຂອງພັກໃຫ້ແກ່ສະມາຊິກພັກ-ພະນັກງານກະຊວງພາຍ ໃນໂດຍການເປັນປະທານຂອງທ່ານ ທອງຈັນ ມະນີໄຊ ກໍາມະການສູນກາງພັກ ເລຂາຄະນະພັກລັດຖະມົນຕີກະຊວງພາຍໃນມີບັນດາສະມາຊິກພັກຂອງຫ້ອງ ການ, ບັນດາກົມ, ສະຖາບັນ ແລະສູນເຂົ້າຮ່ວມ.

ໃນກອງປະຊຸມ ທ່ານ ທອງຈັນ ມະນີໄຊໄດ້ຂຶ້ນເຜີຍແຜ່ມະຕິວ່າດ້ວຍການຍົກສູງຄຸນນະພາບວຽກງານການເມືອງ-ແນວຄິດໃນໄລຍະໃໝ່ໂດຍທ່ານໄດ້ຍົກໃຫ້ເຫັນການດໍາເນີນພາລະກິດປ່ຽນແປງໃໝ່ທີ່ຍາມໃດພັກເຮົາກໍ່ເຫັນໄດ້ ຄວາມສໍາຄັນຂອງວຽກງານການເມືອງແນວຄິດ ຊຶ່ງໃນທຸກໆມະຕິກອງປະຊຸມໃຫຍ່ຂອງພັກລ້ວນແຕ່ໄດ້ກໍານົດທິດທາງອັນສໍາຄັນ ແລະຊີ້ນໍາຢ່າງໃກ້ຊິດຕໍ່ການເຄື່ອນໄຫວໃນຂົງເຂດການເມືອງ-ແນວຄິດພ້ອມດຽວກັນກົມການເມືອງຍັງໄດ້ອອກມະຕິກ່ຽວກັບທິດທາງໜ້າທີ່ຕົ້ນຕໍໍ ແລະມາດຕະການລວມຂອງວຽກງານການເມືອງແນວຄິດໃນສະພາບການໃໝ່ເພື່ອເປັນບ່ອນອີງພື້ນຖານໃຫ້ແກ່ການເຄື່ອນໄຫວຂອງທົ່ວພັກ ແລະຍົກໃຫ້ເຫັນສະພາບການຈັດຕັ້ງປະຕິບັດວຽກງານການເມືອງແນວຄິດໃນໄລຍະຜ່ານມາ ຊຶ່ງຍາມໃດພັກເຮົາກໍ່ຢຶດໝັ້ນທິດນໍາພື້ນຖານຂອງພັກຖືເອົາວຽກງານການເມືອງ-ແນວຄິດເປັນໜ້າທີ່ສໍາຄັນພື້ນຖານເປັນວຽກກົກເປັນວຽກທີ່ຕ້ອງເຮັດກ່ອນເຮັດເປັນປະຈໍາ ແລະສອດຫ້ອຍໄປທຸກວຽກງານຂອງພັກ-ລັດ, ຂອງອົງການຈັດຕັ້ງມະຫາຊົນ ແລະອົງການຈັດຕັ້ງສັງຄົມ ແລະເປັນປັດໃຈຮັບປະກັນທຸກໄຊຊະນະຂອງການປະຕິວັດ.

  ນອກຈາກນັ້ນ ທ່ານ ນິສິດ ແກ້ວປັນຍາ ຮອງເລຂາຄະນະພັກຮອງລັດຖະມົນຕີກະຊວງພາຍໃນເຜີຍແຜ່ເຊື່ອມຊຶມມະຕິວ່າດ້ວຍການເພີ່ມທະວີການນຳພາຂອງພັກຕໍ່ວຽກງານວັດທະນະທຳໃນໄລຍະໃໝ່ ແລະນາງ ລີວົງ ລາວລີ ກຳມະການສໍາຮອງສູນກາງພັກຄະນະປະຈໍາພັກກະຊວງຮອງລັດຖະມົນຕີກະຊວງພາຍ ໃນເຜີຍແຜ່ເອກະສານກ່ຽວກັບວັນສ້າງຕັ້ງ ພັກຄອມມູນິດຈີນຄົບຮອບ 100 ປີ ແລະຮັບຟັງການເຜີຍແຜ່ກົດລະບຽບພັກປະຊາຊົນປະຕິວັດລາວສະໄໝທີ XI ຈາກທ່ານ ນາງ ທອງຈັນ ແກ້ວແສນຫອມຄະນະປະຈຳພັກກະຊວງພາຍໃນຫົວໜ້າກົມເອກະສານແຫ່ງຊາດຕື່ມອີກ.

  ການເຜີຍແຜ່ເຊື່ອມຊຶມເອກະສານການເມືອງທີ່ສຳຄັນໃນຄັ້ງນີ້ເປັນການປະຕິບັດໜ້າທີການເມືອງຂອງຄະນະພັກ, ຄະນະນຳ ແລະສະມາຊິກພັກໃນການນຳເອົາເນື້ອໃນຈິດໃຈຂອງແຕ່ລະເອກະສານໄປຈັດຕັ້ງຜັນຂະຫຍາຍເຂົ້າໃນວຽກງານວິຊາສະເພາະທີ່ຕົນຮັບຜິດຊອບໃຫ້ປາກົດຜົນເປັນຈິງພ້ອມທັງຮັບປະກັນຄວາມຖືກຕ້ອງ ແລະສອດຄ່ອງຕາມແນວທາງນະໂຍບາຍຂອງພັກ ແລະລະບຽບກົດໝາຍຂອງລັດ.

----

ໜັງສືພິມ ເສດຖະກິ-ສັງຄັມ

แชร์