ວິລະບູລີ ທຳລາຍສິນຄ້າທີ່ຜິດກົດໝາຍ

ຂ່າວ: ຜູ້ສື່ຂ່າວເມືອງ ວິລະບູລີ

  ໂດຍປະຕິບັດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້ໃຫ້ໄດ້ຮັບການເຄື່ອນໄຫວຈັດຕັ້ງປະຕິບັດຕົວຈິງດ້ານລະບຽບການ ແລະມາດຕະການກ່ຽວກັບວຽກງານກວດກາການຄ້າ ແລະປູກຈິດສໍານຶກໃນການເຄົາລົບລະບຽບກົດໝາຍພ້ອມທັງສະກັດກັ້ນການລະເມີດລະບຽບກົດໝາຍກ່ຽວກັບການຄຸ້ມຄອງການຄ້າ, ການດໍາເນີນທຸລະກິດທີ່ບໍ່ມີໃບທະບຽນວິສາຫະກິດ ແລະການຄ້າສິນຄ້ານອກລະບົບແນໃສ່ສົ່ງເສີມ ແລະປົກປ້ອງຫົວໜ່ວຍທຸລະກິດການຄ້າທີ່ເຄື່ອນໄຫວຖືກຕ້ອງສອດຄ່ອງກັບລະບຽບກົດໝາຍ ແລະເປັນໄປຕາມກົນໄກເສດຖະກິດຕະຫຼາດໃນວັນທີ 29 ກໍລະກົດ 2021 ນີ້ ຫ້ອງການອຸດສາຫະກໍາ ແລະການຄ້າເມືອງວິລະບູລີ ແຂວງສະຫວັນນະເຂດ ຈຶ່ງໄດ້ຈັດພິທີຈູດທໍາລາຍສິນຄ້າອຸປະໂພກບໍລິໂພກທີ່ເສື່ອມຄຸນໝົດອາຍຸ ແລະສິນຄ້າລະເມີດລະບຽບກົດໝາຍຂຶ້ນຢູ່ທີ່ເດີ່ນຂອງຫ້ອງການດັ່ງກ່າວໂດຍການເຂົ້າຮ່ວມຂອງທ່ານ ບຸນເນືອງ ຈັນຫອມ ຮອງເຈົ້າເມືອງວິລະບູລີ ຜູ້ຊີ້ນໍາວຽກງານເສດຖະກິດ, ມີທ່ານ ນາງ ບຸນລັບ ທໍາມະຈັກ ປະທານແນວລາວສ້າງຊາດເມືອງ, ມີບັນດາທ່ານຫົວໜ້າຄະນະຫ້ອງການວິຊາການຂອງຫ້ອງການອ້ອມຂ້າງເມືອງ, ຫົວໜ້າຄະນະຫ້ອງການອຸດສາຫະກໍາ ແລະການຄ້າເມືອງພ້ອມດ້ວຍພະນັກງານວິຊາການ ແລະເຈົ້າຂອງຫ້າງຮ້ານຂາຍເຄື່ອງທີ່ກ່ຽວຂ້ອງເຂົ້າຮ່ວມ. 

   ທ່ານ ພູວະນາດ ບຸນສີພົມ ຫົວໜ້າຫ້ອງການອຸດສາຫະກໍາ ແລະການຄ້າເມືອງວິລະບູລີ ໃຫ້ຮູ້ວ່າ: ການເຄື່ອນໄຫວຈັດຕັ້ງປະຕິບັດວຽກງານກວດກາການຄ້າແມ່ນໄດ້ເລີ່ມປະຕິບັດນັບແຕ່ເດືອນມັງກອນ ປີ 2021 ເປັນຕົ້ນມາເຊິ່ງປະຕິບັດຢູ່ໃນ 5 ເຂດຄື: ພາຍໃນຂອບເຂດເທດສະບານເມືອງວິລະບູລີ (ກຸ່ມບ້ານທີ 13), ເຂດກຸ່ມບ້ານທີ 12, ເຂດກຸ່ມບ້ານທີ 5, ເຂດຈຸດສຸມ ກະແຕ ບນາຜາດ່າງ ແລະເຂດຈຸດສຸມເມືອງວັງ, ຜ່ານການການຈັດຕັ້ງປະຕິບັດການກວດກາຕົວຈິງສາມາດກວດພົບເຫັນສິນຄ້າຕ່າງໆທີ່ຜິດຕໍ່ລະບຽບກົດໝາຍ ແລະລະບຽບການຈຶ່ງໄດ້ຍຶດໄວ້ເພື່ອທໍາລາຍຊຶ່ງລວມມີທັງໝົດ 22 ລາຍການ.

   ໃນນີ້ມີປະເພດສິນຄ້າຫ້າມຈໍາໜ່າຍ 16 ລາຍການຄື: ຄີມໂກເນ່ 7 ແພັກ, ຄີມເຟນເຕ້ 9 ແພັກ, ຄີມປຸງ 51 ຊຸດ, ສະບູ່ 5 ແພັກ, ໝີ່ສໍາເລັດຮູບ 10 ແກັດ, ໝີ່ກ໋ອງ 8 ແພັກ, ໂຈ໋ກ 5 ແພັກ, ໄພ້ເຈ້ຍ 1 ແກັດ, ດອກແກັບ 1 ກັບ, ລູກປືນແກັບ 10 ຖົງ, ລູກປືນລົມ 7 ຖົງ, ແປ້ງນົວປອມ 91 ຖົງ, ຈານຊອຍນ້ອຍ 1 ແຜ່ນ, ດາບນ້ອຍ 2 ແຜ່ນ ແລະເຄື່ອງອາໄຫຼ່ຈັກສະຕິນ ຈໍານວນ 570 ອັນ; ປະເພດສິນຄ້າເສື່ອມຄຸນໝົດອາຍຸມີ 5 ລາຍການຄື: ເຂົ້າໜົມ 23 ຖົງ, ນົມກ໋ອງ 8 ແພັກ, ນໍ້າຫວານຕຸກໃຫຍ່ 37 ຕຸກ, ນໍ້າຫວານຕຸກນ້ອຍ 56 ຕຸກ, ນໍ້າກະທິງແດງ 1 ແກັດ ແລະສິນຄ້າລອກຮຽນແບບມີ 1 ລາຍການຄື: ນໍ້າກະທິງແດງຫວຽດ 3 ແກັດ ລວມເປັນມູນຄ່າທັງໝົດ 10 ລ້ານກວ່າກີບ.

แชร์