ຊຸກຍູ້ທາດພະນົມນ້ອຍ ເປັນແຫຼ່ງທ່ອງທ່ຽວ

ຂ່າວ: ເກດສະດາພອນ ສີທໍາມະວັນ

     ໃນວັນທີ 30 ກໍລະກົດ 2021, ທ່ານ ແສນສັກ ພີມວົງສາ ເຈົ້າເມືອງອຸທຸມພອນ ພ້ອມຄອບຄົວ ແລະອອກຕົນຍາດໂຍມຊາວພຸດທະສາສະນິກະຊົນພາຍເມືອງອຸທຸມພອນ, ໄດ້ພ້ອມພຽງກັນໄປຖວາຍວັດຖຸປັດໃຈໄຊຍະທານທີ່ວັດພຣະທາດທ່າພະນົມປະຖົມລັຕະນະເຈດີ ຫຼືພຣະທາດພະນົມນ້ອຍ ບ້ານດົງທ່າ ເມືອງອຸທຸມພອນ ແຂວງສະຫວັນນະເຂດ, ເປັນຕົ້ນແມ່ນຜ້າໄຕຣຈີວອນ, ທຽນຈໍາພັນສາ, ຄຸສັງຄະທານ, ດອກໄຟ ແລະເງິນຈໍານວນ 1 ລ້ານກວ່າກີບ,

    ການລົງໄປຄັ້ງນີ້ກໍ່ເພື່ອເປັນການຊຸກຍູ້ສົ່ງເສີມການທ່ອງທ່ຽວພາຍໃນເມືອງໃຫ້ມັນຄືກຄື້ນ, ເພາະວ່າສະຖານທີ່ທ່ອງທ່ຽວດັ່ງກ່າວແມ່ນບໍ່ໄກຈາກຕົວເມືອງພໍປານໃດ, ນອກຈາກທີ່ໄປທ່ຽວພຣະທາດພະນົມນ້ອຍແລ້ວນັກທ່ອງທ່ຽວກໍ່ຍັງສາມາດໄປທ່ຽວດ່ານລະມັ່ງແລະອ່າງເກັບນໍ້າທີ່ຫ່າງອອກໄປຈາກພະທາດປະມານ 5 ກິໂລແມັດ, ທີ່ມີນໍ້າໄຫຼລິນຢ່າງໜ້າສະອອນໃຈ, ມີທໍາມະຊາດອ້ອມຮອບເປັນແຫຼ່ງທ່ອງທ່ຽວທີ່ໜ້າສົນໃຈ,ເປັນບ່ອນພັກຜ່ອນຢ່ອນກາຍອີກແຫ່ງໜຶ່ງຂອງເມືອງອີກດ້ວຍ,ໂດຍເສັ້ນທາງເຂົ້າໄປແມ່ນມີຄວາມຫຍຸ້ງຍາກໃນໄລຍະລະດູຝົນຊຶ່ງນໍາໃຊ້ແຕ່ລົດຕ໊ອກໆ ຫຼືວ່າລົດໄຖນາຍ່າງຕາມ ຂອງຊາວບ້ານຈຶ່ງສາມາດໄປໄດ້ອັນຈະສ້າງລາຍຮັບໃຫ້ແກ່ຊາວບ້ານອີກທາງໜຶ່ງ (ສະເພາະລົດໃຫຍ່ກໍ່ໄປໄດ້ແຕ່ກໍ່ພົບຄວາມຫຍຸ້ງຍາກໃນການສັນຈອນເພາະມີບວກ, ມີຂຸມຫຼາຍບ່ອນ), ສະນັ້ນແລ້ວທາງການນໍາຂອງເມືອງຈຶ່ງຢາກພັດທະນາເສັ້ນທາງເຂົ້າໄປໃຫ້ທຽວໄດ້ທັງລະດູແລ້ງ ແລະລະດູຝົນເພື່ອດຶງດູດເອົານັກທ່ອງທ່ຽວທັງພາຍໃນ ແລະຕ່າງປະເທດໃຫ້ມາທ່ຽວສະຖານທີ່ແຫ່ງນີ້ໃຫ້ນັບມື້ນັບຫຼາຍຂຶ້ນພາຍຫຼັງທີ່ພະຍາດໂຄວິດ-19 ຫາຍໄປຈາກປະເທດລາວ.

แชร์