ປີນີ້ໄຊສົມບູນ ອະນຸມັດ 17 ໂຄງການລົງທຶນໃໝ່

ຂ່າວ: ສຸກສັນ ອ້ວນລິທິກຸນ

  ພະແນກແຜນການ ແລະການລົງທຶນ ແຂວງໄຊສົມບູນ ຈັດກອງປະຊຸມສະຫຼຸບຖອດຖອນບົດຮຽນວຽກງານສົ່ງເສີມ ແລະຄຸ້ມຄອງການລົງທຶນເອກະຊົນພາຍໃນ ແລະຕ່າງປະເທດທົ່ວແຂວງປະຈໍາ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2021 ຂຶ້ນໃນວັນທີ 30 ກໍລະກົດ 2021, ທີ່ສະໂມສອນກອງບັນຊາການທະຫານແຂວງໂດຍການເຂົ້າຮ່ວມເປັນປະທານຂອງທ່ານ ພົຕ ຄໍາລຽງ ອຸທະໄກສອນ, ເຈົ້າແຂວງໄຊສົມບູນ,ມີຮອງເຈົ້າແຂວງ,ບັນດາທ່ານເຈົ້າເມືອງ,ຫົວໜ້າພະແນກການທີ່ກ່ຽວຂ້ອງ ແລະບັນດາມີບໍລິສັດຜູ້ລົງທຶນເອກະຊົນທັງພາຍໃນ ແລະຕ່າງປະເທດເຂົ້າຮ່ວມ.

  ທ່ານ ໄຊຍະເດດ, ວົງສາລະວັນ, ຫົວໜ້າພະແນກແຜນການ ແລະການລົງທຶນແຂວງໄດ້ຜ່ານບົດສະຫຼຸບລາຍ ງານຫຍໍ້ກ່ຽວກັບສະພາບການລົງທຶນເອກະຊົນພາຍໃນ ແລະຕ່າງປະເທດໃນໄລຍະ 6 ເດືອນຕົ້ນປີຜ່ານມາ ແລະ ທິດທາງແຜນການ 6 ເດືອນທ້າຍປີ 2021. ເຫັນວ່າການລົງທຶນຂອງພາກເອກະຊົນພາຍໃນ ແລະ ຕ່າງປະເທດມີບັນຍາກາດດີ, ຊຶ່ງສະແດງອອກຕົວເລກອະນຸມັດການລົງທຶນທັງໝົດສາມາດປະຕິບັດໄດ້ 17 ໂຄງການ, ມູນຄ່າການລົງທຶນ 748 ຕື້ກວ່າກີບ, ເທົ່າກັບ 78,44 ລ້ານໂດລາສະຫະລັດ ທຽບໃສ່ແຜນການປີ 2021 ລື່ນແຜນ 473,27 ຕື້ກີບ, ເທົ່າກັບ 172% (ແຜນການຄາດຄະເນພຽງແຕ່ 275 ຕື້ກີບ).

   ໃນນັ້ນວຽກທີ່ພົ້ນເດັ່ນໃນ 6 ເດືອນ ຕົ້ນປີແມ່ນການອະນຸມັດການລົງທຶນເພື່ອສຶກສາສໍາຫຼວດ, ຊອກຄົ້ນແຮ່ທາດ, ວຽກສຶກສາສໍາຫຼວດສ້າງບົດວິພາກເສດຖະກິດ-ເຕັກນິກດ້ານການທ່ອງທ່ຽວ 3 ໂຄງການເຫັນວ່າກິດຈະການນີ້ມີຜົນປະໂຫຍດຫຼາຍຕໍ່ເສດຖະກິດ-ສັງຄົມຂອງແຂວງ, ສ້າງຜົນປະໂຫຍດໃຫ້ແຂວງກໍ່ຄືການເຮັດໃຫ້ປະຊາຊົນບັນດາເຜົ່າມີວຽກເຮັດງານທໍາ ແລະເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກເທື່ອລະກ້າວໃນອະນາຄົດ.

   ພ້ອມດຽວກັນຍັງໄດ້ຕີລາຄາໃຫ້ເຫັນສະພາບບັນຫາໂດຍລວມກ່ຽວກັບຈຸດດີ ແລະຂໍ້ຄົງຄ້າງ, ວິທີແກ້ໄຂໃນການຈັດຕັ້ງປະຕິບັດວຽກງານດັ່ງກ່າວລວມເຖິງທິດທາງແຜນການ 6 ເດືອນທ້າຍປີ 2021.

   ຈາກນັ້ນບັນດາຜູ້ເຂົ້າຮ່ວມໄດ້ພ້ອມກັນປະກອບຄໍາຄິດ-ຄໍາເຫັນຢ່າງກົງໄປ-ກົງມາ ແລະສ້າງສັນກ່ຽວກັບກົນໄກການປະສານງານລະຫວ່າງພາກລັດ ແລະເອກະຊົນ, ລະບຽບການຄຸ້ມຄອງໂຄງການຕ່າງໆທີ່ລະບຸໄວ້ໃນສັນຍາສໍາປະທານການລົງທຶນຂອງນັກລົງທຶນເອກະຊົນພາຍໃນ ແລະຕ່າງປະເທດ.

   ທັງນີ້ກໍ່ເພື່ອແນໃສ່ໃຫ້ມີຄວາມສອດຄ່ອງກັບແນວທາງນະໂຍບາຍຍຸດທະສາດແຜນພັດທະນາເສດຖະກິດ-ສັງຄົມ ໃນແຕ່ລະໄລຍະບົນພື້ນຖານຄວາມຖືກຕ້ອງຕາມກົດໝາຍ ແລະລະບຽບການຮັບປະກັນການບໍລິການການລົງທຶນໃຫ້ມີຄວາມສະດວກກະທັດຮັດວ່ອງໄວໂປ່ງໃສ ແລະມີປະສິດທິພາບ.

แชร์