ເຄິ່ງປີລາວນຳເຂົ້າ ແລະສົ່ງອອກສິນຄ້າບັນລຸ 6.784 ລ້ານໂດລາ

   ມູນຄ່າການນຳເຂົ້າ ແລະສົ່ງອອກຂອງ ສປປ ລາວ ໃນ 6 ເດືອນຕົ້ນປີ 2021 ບັນລຸໄດ້ທັງໝົດປະມານ 6.784 ລ້ານໂດລາສະຫະລັດ (ລວມທັງຕົວເລກການນໍາເຂົ້າ ແລະສົ່ງອອກໄຟຟ້າ) ເທົ່າກັບ 52,3% ຂອງແຜນການປີ 2021 ທຽບໃສ່ໄລຍະດຽວກັນຂອງປີ 2020 ແມ່ນເພີ່ມຂຶ້ນ 27,2%; ເຊິ່ງໃນນີ້, ມູນຄ່າການສົ່ງອອກບັນລຸໄດ້ປະມານ 3.760 ລ້ານໂດລາສະຫະລັດ, ເພີ່ມຂຶ້ນ 33,4% ແລະປະຕິບັດໄດ້ 57,1% ຂອງແຜນການປີ 2021, ສ່ວນມູນຄ່າການນຳເຂົ້າບັນລຸໄດ້ 3.025 ລ້ານໂດລາສະຫະລັດ,ເພີ່ມຂຶ້ນ 20,2% ແລະປະຕິບັດໄດ້ 47,4% ຂອງແຜນການປີ 2021 ຈາກຕົວເລກດັ່ງກ່າວແມ່ນເຫັນວ່າມູນຄ່າການຄ້າ 6 ເດືອນຕົ້ນປີເກີນດູນ 735 ລ້ານໂດລາສະຫະລັດ;ຢ່າງໃດກໍ່ຕາມ,ຖ້າຫາກບໍ່ລວມຕົວເລກນຳເຂົ້າ ແລະສົ່ງອອກໄຟຟ້າແມ່ນຍັງຈະຂາດດູນປະມານ 85 ລ້ານໂດລາສະຫະລັດ.

   ຕົວເລກຂ້າງເທິງນັ້ນເຫັນວ່າສິນຄ້າສົ່ງອອກຕົ້ນຕໍຂອງ ສປປ ລາວ ແມ່ນໄຟຟ້າ, ຄຳ, ມັນຕົ້ນ, ແຮ່ທອງ, ເຈ້ຍ, ໝາກກ້ວຍ ແລະເຄື່ອງນຸ່ງຫົ່ມ. ສ່ວນສິນຄ້ານຳເຂົ້າສ່ວນໃຫຍ່ແມ່ນນໍ້າມັນເຊື້ອໄຟ, ພາຫະນະ ແລະຊິ້ນສ່ວນອາໄຫຼ່, ອຸປະກອນກົນຈັກ, ອຸປະກອນກໍ່ສ້າງ ແລະເຄື່ອງໃຊ້ໄຟຟ້າ. ນອກຈາກນັ້ນ, ໃນໄລຍະ 6 ເດືອນຕົ້ນປີນີ້ແມ່ນມີສິນຄ້າບາງປະເພດມີການຜະລິດ ແລະສົ່ງອອກຫຼາຍເຊັ່ນ: ຄຳ ເພີ່ມຂຶ້ນຫຼາຍກວ່າ 4 ເທົ່າ ເມື່ອທຽບໃສ່ໄລຍະດຽວກັນຂອງປີຜ່ານມາ, ເຄື່ອງໄຟຟ້າ ເພີ່ມຂຶ້ນ 50.8% ມັນຕົ້ນ 31%, ໝາກກ້ວຍ 26% ແລະຢາງພາລາເພີ່ມຂຶ້ນ 103% ເປັນຕົ້ນ.

      ບັນດາປະເທດທີ່ ສປປ ລາວ ສົ່ງອອກຫຼັກໄທມູນຄ່າ 1.331 ລ້ານໂດລາສະຫະລັດ, ຈີນມີມູນຄ່າປະມານ1.314, ຫວຽດນາມ 734 ລ້ານໂດລາສະຫະລັດ, ຍີ່ປຸ່ນ 43 ລ້ານໂດລາສະຫະລັດ ແລະເຢຍລະມັນ 39 ລ້ານໂດລາສະຫະລັດ.

   ບັນດາປະເທດທີ່ ສປປ ລາວ ນໍາເຂົ້າຫຼັກໄທມູນຄ່າ 1.480 ລ້ານໂດລາສະຫະລັດ, ຈີນ 660 ລ້ານໂດລາສະຫະລັດ, ຫວຽດນາມ 255 ລ້ານໂດລາສະຫະລັດ, ຢີ່ປຸ່ນ 87 ລ້ານໂດລາສະຫະລັດ ແລະ ສ ອາເມລິກາ 127 ລ້ານໂດລາສະຫະລັດ.

แชร์