ລັດຖະມົນຕີ ຍທຂ ຊຸກຍູ້ທາງລົດໄຟລາວ-ຈີນ

ຂ່າວ: ສີສຸວັນ

   ໃນລະຫວ່າງທ້າຍເດືອນກໍລະກົດ 2021 ຜ່ານມານີ້, ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະຂົນສົ່ງ (ຍທຂ), ທ່ານ ບຸນເຫຼືອ ສິນໄຊວໍລະວົງ ຮອງລັດຖະມົນຕີກະຊວງການເງິນ,ຄະນະກໍາມະການຮ່ວມມືລາວ-ຈີນ ແລະຄະນະຜູ້ແທນອື່ນໆລົງຕິດຕາມຊຸກຍູ້ສະຖານີລົດໄຟຫຼາຍແຫ່ງຂອງທາງລົດໄຟລາວ-ຈີນ ເປັນເວລາຫຼາຍມື້ດ້ວຍກັນ,ໂດຍມີບໍລິສັດທາງລົດໄຟລາວ-ຈີນ,ກຸ່ມບໍລິສັດກໍ່ສ້າງທາງລົດໄຟ ສປ ຈີນ ເຂົ້າຮ່ວມໃນເທື່ອນີ້.

    ສໍາລັບໃນການລົງຕິດຕາມຊຸກຍູ້ວຽກງານໃນຄັ້ງນີ້ທ່ານລັດຖະມົນຕີກະຊວງ ຍທຂ ພ້ອມຄະນະຍັງໄດ້ຮັບຟັງລາຍງານຈາກແຕ່ລະໜ່ວຍງານກ່ຽວກັບດ້ານການຮັບ ຜິດຊອບການກໍ່ສ້າງສະຖານີເຊັ່ນ: ສະພາບລວມຂອງການວິສາວະກໍາ, ຊ່ວງໄລຍະຂອງການກໍ່ສ້າງທີ່ສໍາເລັດໄປແຕ່ລະຂັ້ນ,ຄວາມຄືບໜ້າຂອງການກໍ່ສ້າງ, ສະພາບດ້ານການຕົບແຕ່ງແລະຂໍ້ຫຍຸ້ງຍາກດ້ານການກໍ່ສ້າງເປັນຕົ້ນ. ຊຶ່ງໃນວັນທີ 23 ກໍລະກົດ ທ່ານ ວຽງສະຫວັດ ສີພັນດອນ ໄດ້ຈັດຕັ້ງກະຊວງໂຍທາທິການ ແລະຂົນສົ່ງພ້ອມດ້ວຍພະແນກໂຍທາທິການ ແລະຂົນສົ່ງແຂວງຫຼວງພະບາງລົງຕິດຕາມຊຸກຍູ້ຢູ່ທີ່ສະຖານີລົດໄຟຫຼວງພະບາງ, ພ້ອມທັງຕິດຕາມກວດກາການກໍ່ສ້າງດ້ານພາກສ່ວນຂອງຫຼັງຄາ ແລະສະພາບມາດຕະຖານຄວາມປອດໄພດ້ານການກໍ່ສ້າງຂອງພາກສະໜາມພ້ອມຍັງຮັບຊົມ ແລະຮັບຟັງແຜນງານດ້ານການຕົບແຕ່ງພາຍໃນອີກດ້ວຍ.

  ພາຍໃຕ້ຂັ້ນຕອນການລົງຕິດຕາມຊຸກຍູ້ວຽກງານໃນຄັ້ງນີ້ທ່ານລັດຖະມົນຕີພ້ອມດ້ວຍຄະນະຍັງໄດ້ສະແດງຄວາມຊົມເຊີຍເປັນຢ່າງສູງຕໍ່ສະຖານີຫຼວງພະບາງດ້ານເຕັກໂນໂລຊີການກໍ່ສ້າງທີ່ທັນສະໄໝ ແລະມີປະສິດທິພາບດ້ານການກໍ່ສ້າງຊຶ່ງມັນໄດ້ສະແດງອອກເຖິງການເຂົ້າສູ່ຊ່ວງຂອງການຕົບແຕ່ງປະດັບປະດາພ້ອມຖ່າຍຮູບຮ່ວມເພື່ອເປັນທີ່ລະນຶກອີກດ້ວຍ. 

• 02/08/2021