ຕົ້ມເຫຼົ້າຂາຍກາຍເປັນຄອບຄົວທີ່ມີລາຍຮັບດີ

ລຸງຈັນເພັງ ດວງສະຫວ່າງ ອາຍຸ 70 ປີ ປະຊາຊົນບ້ານນາຍາວ ເມືອງໄຊຍະບູລີແຂວງໄຊຍະບູລີ ພາຍໃນຄອບຄົວມີທັງໝົດ 7 ຄົນ ແຮງງານຕົ້ນຕໍມີ 4 ຄົນ. ລຸງໄດ້ເລົ່າສູ່ນັກຂ່າວແຂວງຟັງວ່າ: ກ່ອນໜ້ານີ້ອາຊີບຕົ້ນຕໍຂອງລຸງກໍເປັນພະນັກງານ ແລະອາຊີບສໍາຮອງແມ່ນເຮັດໄຮ່, ເຮັດສວນ. ສະພາບຊີວິດການເປັນຢູ່ຂອງຄອບຄົວໃນເວລານັ້ນຍັງຂາດໆເຂີນໆຕົກມາຮອດປີ 2002 ລຸງຈຶ່ງໄດ້ລາອອກຈາກພະນັກງານຫັນມາເຮັດທຸລະກິດດ້ວຍການຕົ້ມເຫຼົ້າຂາຍ, ເບື້ອງຕົ້ນກໍຕົ້ມຂາຍບໍ່ຫຼາຍປານໃດ.

 ພາຍຫຼັງເຫັນວ່າສັງຄົມມີການບໍລິໂພກການຂາຍກໍເຫັນວ່າມີລາຍໄດ້ດີຈຶ່ງລົງທຶນຊື້ອຸປະກອນການຕົ້ມເຫຼົ້າເຊັ່ນ: ໝໍ້, ເຂົ້າສານສ່ວນແປ້ງແມ່ນເຮັດເອົາເອງ, ຈາກການຕົ້ມເຫຼົ້າເດືອນໜຶ່ງ 500 ກິໂລກຣາມ ມາເປັນໜຶ່ງໂຕນຕໍ່ເດືອນສ່ວນຂັ້ນຕອນຂອງການຕົ້ມເຫຼົ້າແມ່ນຈະເອົາເຂົ້າສານມາໝັກໄວ້ໜຶ່ງອາທິດຈາກນັ້ນກໍຈະໄດ້ບີບເອົານໍ້າເຂົ້າມາເປັນເຫຼົ້າສະໂທແລ້ວເອົານໍ້າມາມ່າໄວ້ປະມານ 16 ຫາ 20 ວັນ ຫຼັງຈາກນັ້ນຈຶ່ງເອົາມາຕົ້ມເປັນເຫຼົ້າຂາວຊຸດໜຶ່ງຈະໄດ້ເຫຼົ້າຂາວ 400 ລິດຕໍ່ເຂົ້າໜຶ່ງໂຕນຕໍ່ໜຶ່ງເດືອນ, ສ່ວນການຂາຍແມ່ນຈະສົ່ງໃຫ້ພໍ່ຄ້າຊາວຈີນຕະຫຼາດຊັງຈຽງ ນະຄອນຫຼວງວຽງຈັນ ດ້ວຍລາຄາ 400 ລິດຕໍ່ 20 ລ້ານກີບຕໍ່ເດືອນ.

  ນອກຈາກສົ່ງຂາຍໃຫ້ຕະຫຼາດຊັງຈຽງແລ້ວລຸງຍັງໄດ້ອອກແນວຄວາມຄິດຊອກຊື້ໄມ້ໄຜ່ມາຕັດເປັນປ້ອງແລ້ວຂວັດລວດລາຍເປັນຮູບໂຕຊ້າງແລ້ວເອົາແກ້ວເຫຼົ້າສຸບລົງໃນບັ້ງສົ່ງອອກຂາຍ ບັງລະ 50 ພັນຕໍ່ບັ້ງ ເດືອນໜຶ່ງຈະໄດ້ຂາຍອອກບໍ່ຕໍ່າກວ່າ 200 ບັ້ງ ເປັນເງິນ 10 ລ້ານກວ່າກີບຈາກລົດຊາດ ແລະຄວາມນິຍົມຊົມຊອບຂອງສັງຄົມຈຶ່ງໄດ້ຂຶ້ນຊື່ເຫຼົ້າບັ້ງໄມ້ໄຜ່ບ້ານນາຍາວເປັນສິນຄ້າໂອດັອບໃນວັນທີ 24 ກຸມພາ 2015, ນອກຈາກຕົ້ມເຫຼົ້າຂາຍແລ້ວຄອບຄົວຂອ ງລຸງຍັງໄດ້ລ້ຽງເປັດ, ລ້ຽງໄກ່ ແລະລ້ຽງໝູເພື່ອໃຫ້ສັດເຫຼົ່ານັ້ນໄດ້ກິນຂີ້ເຫຼົ້າ, ເມື່ອສັງລວມແລ້ວຄອບຄົວຂອງລຸງຈັນເພັງ ດວງສະຫວ່າງມີລາຍຮັບປີໜຶ່ງບໍ່ຫຼຸດ 100 ກວ່າລ້ານກີບຈາກການຂາຍເຫຼົ້າ, ໝູ, ເປັດ ແລະໄກ່. ເມື່ອຫັກຕົ້ນທຶນຄ່າສິ້ນເປື້ອງຊື້ເຂົ້າ,ຟືນ ແລະ ອຸປະກອນອື່ນໆອອກແລ້ວຈະໄດ້ກໍາໄລປີໜຶ່ງ 50 ຫາ 60 ລ້ານກີບ.

 ຈາກການບຸກບືນສູ້ຊົນສ້າງຊີວິດຄອບຄົວໃຫ້ມີຢູ່ມີກິນຄອບຄົວຂອງລຸງຈຶ່ງກາຍເປັນຄອບຄົວຕົວແບບໃນການລ້ຽງສັດ ແລະ ທໍາທຸລະກິດຕົ້ມເຫຼົ້າຂອງເມືອງໄຊຍະບູລີ, ປັດຈຸບັນນີ້ຄອບຄົວຂອງລຸງໄດ້ມີທຶນສະສົມຊື້ດິນໜຶ່ງຕອນເນື້ອທີ່ 0,30 ເຮັກຕາ ລົດຈັກສາມຄັນເຮືອນຢູ່ຖາວອນ 2 ຫຼັງ ແລະ ມີເງິນສ່ວນໜຶ່ງແຮໄວ້ສົ່ງລູກຫຼານຮໍ່າຮຽນແຮໄວ້ໃນຍາມຈໍາເປັນຕື່ມອີກ.

ຂ່າວ: ນສພ ເສດຖະກິດ-ສັງຄົມ

แชร์