ນາຍົກ ເນັ້ນສະຫວັນເອົາໃຈໃສ່ຕອບໂຕ້ໂຄວິດ

    ຕອນບ່າຍວັນທີ 29 ກໍລະກົດ 2021 ນີ້ຢູ່ທີ່ສະໂມສອນຂອງຫ້ອງວ່າການແຂວງສະຫວັນນະເຂດ, ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກນາຍົກລັດຖະມົນຕີແຫ່ງ ສປປ ລາວ ໄດ້ໂອ້ລົມການນຳແຂວງສະຫວັນນະເຂດກ່ຽວກັບການເອົາໃຈໃສ່ໃນການຕ້ານ, ສະກັດກັ້ນການແຜ່ລະບາດພະຍາດໂຄວິດ-19 ພາຍໃນແຂວງ. ໂດຍການເຂົ້າຮ່ວມຂອງທ່ານ ສັນຕິພາບ ພົມວິຫານ ກຳມະການສູນກາງພັກເລຂາພັກແຂວງເຈົ້າແຂວງສະຫວັນນະເຂດ, ມີບັນດາລັດຖະມົນຕີ, ຮອງລັດຖະມົນຕີຈາກກະຊວງຕ່າງໆ, ທ່ານຮອງເລຂາພັກແຂວງ, ຮອງເຈົ້າແຂວງພ້ອມດ້ວຍຫົວໜ້າພະແນກການອ້ອມຂ້າງແຂວງເຂົ້າຮ່ວມ.

    ໃນໂອກາດທີ່ໄດ້ມາໂອ້ລົມການນຳແຂວງສະຫວັນນະເຂດຄັ້ງນີ້ ທ່ານ ພັນຄຳ ວິພາວັນ ນາຍົກລັດຖະມົນຕີກໍ່ໄດ້ຍົກໃຫ້ເຫັນສະພາບການລະບາດຂອງພະຍາດ COVID-19 ໃນທົ່ວໂລກກໍ່ຄືໃນປະເທດເຮົາ, ເຊິ່ງຮອດວັນທີ 28 ກໍລະກົດ 2021, ທົ່ວໂລກມີລາຍງານຜູ້ຕິດເຊື້ອພະຍາດດັ່ງກ່າວມີກໍລະນີຢັ້ງຢືນຕິດເຊື້ອທັງໝົດ 195 ລ້ານກວ່າກໍລະນີ, ເສຍຊີວິດທັງໝົດ 4 ລ້ານກວ່າຄົນ, ປິ່ນປົວຫາຍດີ 177 ລ້ານກວ່າຄົນ. ສຳລັບ ສປປ ລາວ ຮອດວັນທີ 28 ກໍລະກົດ 2021 ທົ່ວປະເທດມີກໍລະນີຕິດເຊື້ອພະຍາດ COVID-19 ສະສົມທັງໝົດ 5.434 ກໍລະນີ, ໃນນັ້ນ ຕິດເຊື້ອໃນຊຸມ ຊົນພາຍໃນປະເທດມີ 1.708 ກໍລະນີ ແລະນຳເຂົ້າ 3.726 ກໍລະນີ, ປິ່ນປົວຫາຍດີທັງໝົດ 2.931 ຄົນ, ກຳລັງປິ່ນປົວ 2.503 ຄົນ, ເສຍຊີວິດ 06 ຄົນ. ສະເພາະເດືອນກໍລະກົດ 2021 ມີຜູ້ຕິດເຊື້ອທັງໝົດ 3.290 ກໍລະນີ, ໃນນັ້ນຕິດເຊື້ອຈາກນໍາເຂົ້າ 3.214 ກໍລະນີ, ຊຶ່ງແຍກເປັນຢູ່ແຂວງສະຫວັນນະເຂດ 1.581 ກໍລະນີ, ແຂວງຈໍາປາສັກ 1.115 ກໍລະນີ ສາລະວັນ 187 ກໍລະນີ ແລະຢູ່ແຂວງອື່ນ 331 ກໍລະນີ; ປິ່ນປົວຫາຍດີ 569 ຄົນ, ເສຍຊີວິດ 3 ກໍລະນີ (ສະຫວັນນະເຂດ 2 ກໍລະນີ ແລະນະຄອນຫຼວງວຽງຈັນ 1 ກໍລະນີ).

   ຕໍ່ກັບສະພາບເຫດການດັ່ງກ່າວທ່ານນາຍົກລັດຖະມົນຕີ ກໍ່ໄດ້ເນັ້ນໜັກໃນຫຼາຍບັນຫາໃຫ້ການນໍາຂອງແຂວງຕ້ອງໄດ້ເອົາໃຈໃສ່ຈັດຕັ້ງປະຕິບັດເປັນຕົ້ນແມ່ນ: ເອົາໃຈໃສ່ປັບປຸງ ແລະຂະຫຍາຍສູນຈຳກັດບໍລິເວນລວມທັງໂຮງໝໍພາກສະໜາມໃຫ້ພຽງພໍກັບແຮງງານທີ່ກັບຄືນມາ ແລະບໍ່ໃຫ້ມີຄວາມແອອັດຫຼາຍເກີນໄປພ້ອມທັງປະກອບເຄື່ອງໃຊ້ອຸປະກອນການແພດພຽງພໍ, ປັບປຸງກົດລະບຽບໃນການຄຸ້ມຄອງແຮງງານພາຍໃນສູນເພື່ອໃຫ້ແຮງງານເລົ່ານັ້ນເຂົ້າໃຈຕໍ່ກົດລະບຽບຫຼາຍຂຶ້ນຈຶ່ງຈະສະດວກໃນການຄຸ້ມຄອງ, ພ້ອມກັນນັ້ນກໍ່ໃຫ້ມີການດັດສົມແພດ ຫຼືອາສາສະໝັກຢູ່ບັນດາເມືອງໃຫ້ເຂົ້າມາຊ່ວຍໃນການປິ່ນປົວໂດຍການຈັດເປັນທີມໄດ້ຫຼາຍເທົ່າໃດຍິ່ງເປັນການດີ ເພື່ອໃຫ້ແພດ-ໝໍໄດ້ມີເວລາຜັດປ່ຽນກັນພັກຜ່ອນຫຼາຍຂຶ້ນ, ຈາກນັ້ນກໍ່ຕ້ອງຈັດການສັກວັກແຊງໃຫ້ທຸກກຸ່ມເປົ້າໝາຍພາຍໃນແຂວງໃຫ້ຄົບ 2 ເຂັມ, ອັນສຳຄັນຕ້ອງ ພິຈາລະນາສະໜອງງົບປະມານຢ່າງສົມເຫດສົມຜົນ, ເພີ່ມທະວີການເຮັດວຽກງານສຶກສາອົບຮົມແນວຄິດໃຫ້ແຮງງານລາວທີ່ກັບມາຈາກປະເທດໃກ້ຄຽງກັບຄອບຄົວຂອງເຂົາເຈົ້າໄດ້ຮັບຮູ້ເຖິງໄພອັນຕະລາຍຂອງພະຍາດໂຄວິດ-19,ສິ່ງທີ່ຄວນເອົາໃຈໃສ່ມອບໃຫ້ແຂວງ,ເມືອງ ແລະນະຄອນສົມທົບກັນເກັບກຳຂຶ້ນບັນຊີຈຳນວນແຮງງານທີ່ໄປເຮັດວຽກຢູ່ປະເທດເພື່ອນບ້ານມີຫຼາຍປານໃດເພື່ອສ້າງແຜນຮັບມືໃຫ້ລະອຽດ ແລະທັນການ, ພ້ອມນັ້ນກໍ່ໃຫ້ຂຶ້ນທະບຽນບັນດາແຮງງານທີ່ກັບມານັ້ນໃຫ້ຖືກຕ້ອງໂດຍລົງເລິກອາຊີບທັກສະເພື່ອສົມທົບພາກວິສາຫະກິດ, ອົງການຈັດຕັ້ງສາກົນຝຶກກ່ອນເຂົ້າຕຳແໜ່ງງານ, ຝຶກເພື່ອປະກອບອາຊີບອິດສະຫຼະ. 

   ຈາກນັ້ນທ່ານນາຍົກລັດຖະມົນຕີກໍ່ໄດ້ເດີນທາງໄປຢ້ຽມຢາມສູນກັກກັນຊົ່ວຄາວສະໜາມກີລາຫຼັກ 4, ພ້ອມທັງໄດ້ເດີນທາງໄປໃຫ້ກຳລັງໃຈຜູ້ທີ່ກຳລັງປິ່ນປົວພະຍາດ ໂຄວິດ-19 ຢູ່ໂຮງໝໍສະໜາມຫຼັກ 9 ຊຶ່ງທ່ານໄດ້ມີການໂອ້ລົມໂດຍຜ່ານໂທລະໂຄ່ງສື່ສານກັບຜູ້ທີ່ກຳລັງປິ່ນປົວໃນນັ້ນ ທ່ານໄດ້ເນັ້ນໜັກໃຫ້ທຸກຄົນຈົ່ງມີກຳລັງໃຈທີ່ດີ, ມີຄວາມເຊື່ອໝັ້ນຕໍ່ການນຳພັກ-ລັດ ໃນການດູແລ, ເບິ່ງແຍງ, ປະຕິບັດລະບຽບວິໄນຂອງສູນຢ່າງເຄັ່ງຄັດ, ເອົາໃຈໃສ່ປະຕິບັດຕາມຄຳສັ່ງຂອງແພດ-ໝໍໃນການດູແລຮັກສາສຸຂະພາບ, ໃຫ້ຫາຍດີຈາກພະຍາດດັ່ງກ່າວເພື່ອຈະໄດ້ກັບບ້ານເຮືອນຢ່າງປອດໄພ, ຕໍ່ຈາກນັ້ນທ່ານຍັງໄດ້ໄປເບິ່ງສູນກັກກັນແຫ່ງໃໝ່ຢູ່ເຂດບ້ານໂນນສະຫວາດ ຊຶ່ງເປັນສູນທີ່ໃຫຍ່ສາມາດບັນຈຸຄົນໄດ້ຫຼາຍສົມຄວນ, ປະຈຸບັນກຳລັງໄດ້ຮັບການປັບປຸງຕື່ມອີກ.

แชร์