ທຸລະກິດທ່ອງທ່ຽວກະທົບໜັກຈາກໂຄວິດ ຂໍລັດຊ່ວຍ

   ນັບແຕ່ພະຍາດໂຄວິດ-19 ເລີ່ມແຜ່ລາມເຂົ້າມາລະບາດຢູ່ ສປປ ລາວ ໄດ້ສົ່ງຜົນກະທົບຢ່າງຮຸນແຮງຕໍ່ທຸກຂົງເຂດວຽກງານເຊັ່ນດຽວກັນກັບທຸລະກິດທ່ອງທ່ຽວແມ່ນຖືກກະທົບຢ່າງຫຼີກລຽງບໍ່ໄດ້ຍ້ອນການທ່ອງທ່ຽວໄດ້ຢຸດສະຫງັກແກ່ຍາວຫຼາຍເດືອນ, ພະນັກງານພັກບໍ່ມີວຽກເຮັດຂາດລາຍໄດ້ຈູນເຈືອຄອບຄົວທັງນີ້ທຸລະກິດຂະແໜງການດັ່ງກ່າວໄດ້ສະເໜີໃຫ້ພາກສ່ວນລັດຊ່ວຍຫຼາຍບັນຫາສຳຄັນເພື່ອໃຫ້ການທ່ອງທ່ຽວລາວຟື້ນຕົວໄວກັບຄືນມາຄຶກຄັກໄດ້ອີກຄັ້ງຫຼັງໂຄວິດຈາງຫາຍໄປ.

     ທ່ານ ນາງ ສ້ອຍສຸດາ ອິນເມືອງໄຊ ປະທານສະພາການຄ້າ ແລະອຸດສາຫະກຳເມືອງຫາດຊາຍຟອງຕາງໜ້າພາກທຸລະກິດທ່ອງທ່ຽວປະກອບຄຳຄິດເຫັນຕໍ່ກອງປະຊຸມພົບປະລະຫວ່າງອົງການປົກຄອງນະຄອນຫຼວງວຽງຈັນກັບນັກທຸລະກິດ-ນັກລົງທຶນທີ່ດຳເນີນທຸລະກິດຢູ່ນະຄອນຫຼວງວຽງຈັນໃນວັນທີ 29 ກໍລະກົດ 2021 ໂດຍພາຍໃຕ້ການເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນວ່າ: ຜົນກະທົບໃນໄລຍະພະຍາດໂຄວິດລະບາດຮອບທີ 1 ແລະຮອບທີ 2 ແມ່ນໄດ້ແກ່ຍາວເພີ່ມທະວີຄູນສົ່ງຜົນກະທົບໂດຍກົງຕໍ່ພາກການທ່ອງທ່ຽວເຮັດໃຫ້ຂາດລາຍຮັບຢ່າງຂາດຕົວເຮັດໃຫ້ພະນັກງານບໍ່ມີວຽກເຮັດງານທຳຂາດລາຍຮັບຈູນເຈືອຄອບຄົວແຕ່ບາງບໍລິສັດແມ່ນຍັງຮັກສາພະນັກງານໄວ້ເຄິ່ງໜຶ່ງຍ້ອນຄວາມເຫັນອົກເຫັນໃຈຈ່າຍເງິນເດືອນປົກກະຕິແຕ່ລາຍຮັບບໍ່ມີເລີຍ.

   ສຳລັບຜົນກະທົບຂອງບໍລິສັດທ່ອງທ່ຽວສ່ວນຫຼາຍແມ່ນຊື້ລົດບໍລິການນຳທ່ຽວ ແລະລົດບໍລິການມາໄວ້ຮັບແຂກແຕ່ພົບໄພໂຄວິດ-19 ຈຶ່ງໄດ້ແບກຫາບພາລະຄ່າງວດຈ່າຍຜ່ອນລົດເປັນສະກຸນເງິນໂດລາ ຫຼືບາດຍ້ອນຂາດລາຍຮັບຈາກແຂກຕ່າງປະເທດເວລາໄປຖອກຄ່າຜ່ອນລົດຢູ່ທະນາຄານຊໍ້າພັດບໍ່ເອົາເງິນກີບໃຫ້ໄປແລກເປັນກຸນເງິນໂດລາ ຫຼືບາດ ຢູ່ນອກມາຖອກໃນອັດຕາແລກປ່ຽນທີ່ແພງເກີນຈິງຈຶ່ງເຮັດໃຫ້ຜູ້ປະກອບການຮັບກະທົບທາງກົງ ແລະ ທາງອ້ອມດັ່ງນັ້ນຈຶ່ງຂໍຝາກທະນາຄານລວມເຖິງ ພາກສ່ວນທີ່ກ່ຽວຂ້ອງທາງດ້ານນີ້ໄດ້ທົບທວນຄືນຕື່ມເພື່ອຊ່ວຍຜູ້ປະກອບການ.

   ຂໍໃຫ້ພາກລັດຈັດທີມວິຊາການລົງຊຸກຍູ້ຕິດຕາມເບິ່ງທຸລະກິດທ່ອງທ່ຽວຕົວຈິງທີ່ມີໃບປະຕັງຂຶ້ນກັບພະແນກອຸດສາຫະກຳ ແລະການຄ້ານະຄອນຫຼວງເພື່ອຊ່ວຍເຫຼືອໃຫ້ຖືກຈຸດ.

 ຂໍໃຫ້ພາກລັດຊ່ວຍຢຽວຢາຟື້ນຟູໄລຍະຍາວຊ່ວຍພາກທຸລະກິດໂດຍສະເພາະອີກບໍ່ດົນຕໍ່ໜ້ານີ້ທາງລົດໄຟຄວາມໄວສູງລາວ-ຈີນກໍຈະເປີດຢ່າງເປັນທາງການແລ້ວສະເໜີໃຫ້ລັດຖະບານຈັບມືກັບບັນດາປະເທດທີ່ເພິ່ນສັກຢາວັກແຊງຄົບສອງເຂັ້ມ ແລະມີໃບຢັ້ງຢືນທາງການແພດເປີດປະເທດໃຫ້ເຂົາເຈົ້າເຂົ້າມາທ່ຽວລາວ.

ພ້ອມດຽວກັນນີ້ຍັງສະເໜີໃຫ້ພາກລັດຊ່ວຍກອງທຶນມາຟື້ນຟູເພື່ອໃຫ້ພາກທຸລະກິດກູ້ຢືມ ແລະເຂົ້າເຖິງໄດ້ງ່າຍໃນອັດຕາດອກເບ້ຍທີ່ຕໍ່າສາມາດຈັບຕ້ອງໄດ້ໂດຍໃຫ້ເວລາ 3 ປີຂຶ້ນໄປ ແລະສະເໜີໃຫ້ພາກສ່ວນລັດຊ່ວຍແກ້ໄຂຄ່າໄຟໃນໄລຍະຍາວທີ່ຕ້ອງໃຊ້ເວລາຟື້ນຟູບໍ່ໄລ່ຄ່າໄຟໃນລາຄາທຸລະກິດແຕ່ໃຫ້ໄລ່ເປັນໄຟທົ່ວໄປ.

   ໂດຍການສະເໜີທັງໝົດນັ້ນທ່ານ ນາງ ສ້ອຍສຸດາ ອິນເມືອງໄຊ ຢໍ້າວ່າ: ຖ້າພາກທຸລະກິດທ່ອງທ່ຽວ 9 ຕົວເມືອງໃນ ນວ ຟື້ນຕົວໄວໄດ້ເທົ່າໃດກະຍິ່ງດີຊຶ່ງຈະສ້າງເມັດເງິນຢ່າງມະຫາສານເຂົ້າປະເທດເຮົາພະນັກງານມີວຽກເຮັດງານທຳໂຮງແຮມຮ້ານອາຫານ, ເຮືອນພັກຮ້ານຂາຍເຄື່ອງທີ່ລະນຶກ ແລະລົດນຳທ່ຽວ, ລົດບໍລິການກໍ່ຈະມີຜົນຕອບແທນ ແລະລາຍຮັບທີ່ດີຂຶ້ນ.

แชร์