ອາເມລິກາຊ່ວຍລາວ ກຳຈັດໄຂ້ມາລາເຣຍ

    ສະຫະລັດອາເມລິກາ ໄດ້ມອບເງິນສະໜັບສະໜູນ 7 ແສນໂດລາ ໃຫ້ແກ່ອົງການສາກົນບໍລິການປະຊາຊົນ (PSILao) ໃນການສະໜັບສະໜູນກະຊວງສາທາລະ ນະສຸກກໍ່ຄື, ກົມຄວບຄຸມພະຍາດຕິດຕໍ່ ແລະສູນໄຂ້ຍຸງແມ່ກາຝາກ ແລະແມງໄມ້ (CMPE), ຜ່ານອົງການພັດທະນາສາກົນສະຫະລັດອາເມລິກາ (USAID) ແລະໂຄງການ U.S. President’s Malaria Initiative (PMI). ເງິນຊ່ວຍເຫຼືອເຫຼົ່ານີ້ຈະນໍາໃຊ້ເຂົ້າໃນວຽກງານການສ້າງຄວາມເຂັ້ມແຂງໃນການເຝົ້າລະວັງເພື່ອກ້າວສູ່ການກໍາຈັດໄຂ້ມາລາເຣຍໃນ ສປປ ລາວ ພາຍໃຕ້ໂຄງການ Impact malaria ໃນ ສປປ ລາວ ແຕ່ປີ 2021 ຫາ ປິ 2023 ຜູ້ຕາງໜ້າໂຄງການ PMI ແລະອົງການພັດທະນາສະຫະລັດອາເມລິກາປະຈຳລາວ ທ່ານ Michael Ronning ເປັນຕົວແທນເຂົ້າຮ່ວມພິທີເຊັນບົດບັນທຶກຄວາມເຂົ້າໃຈ (MOU) ສໍາລັບໂຄງການດັ່ງກ່າວໃນວັນທີ 28 ກໍລະກົດ 2021, ລະຫວ່າງກົມຄວາມຄຸມພະຍາດຕິດຕໍ່ກະຊວງສາທາລະນະສຸກຕາງໜ້າໂດຍ ທ່ານ ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ແລະຕາງໜ້າອົງການສາກົນບໍລິການປະຊາຊົນ PSI Laos ໂດຍທ່ານ ວຽງສະໄໝ ວົງຄຳຊາວ ຜູ້ອຳນວຍການອົງການ, ໃຫ້ກຽດເປັນສັກຂີພິຍານໃນພິທີລົງນາມໂດຍທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ.

 ທ່ານ Ronning ກ່າວວ່າຫຼາຍກວ່າ 10 ປີ ທີ່ສະຫະລັດອາເມລິກາຢືນຄຽງຂ້າງລັດຖະບານລາວເພື່ອຕໍ່ສູ້ກັບພະຍາດໄຂ້ມາລາເຣຍ, ລັດຖະບານສະຫະລັດອາເມລິກາໄດ້ປະກອບທຶນຫຼາຍກວ່າ 3,5 ລ້ານໂດລາ ໃນການຊ່ວຍເຫຼືອທາງດ້ານເຕັກນິກວິຊາການ ແລະອຸປະກອນຕ່າງໆ ລວມເຖິງມຸ້ງກັນຍຸງຫຼາຍກວ່າ 700.000 ຊຸດ, ຊຸດກວດເລືອດແບບວ່ອງໄວຫຼາຍກວ່າ 1 ລ້ານຊຸດ ແລະຢາປົວພະຍາດໄຂ້ມາລາເຣຍໃຫ້ແກ່ປະຊາຊົນລາວ.

    ເປົ້າໝາຍຂອງໂຄງການຮ່ວມມືແມ່ນເພື່ອເພີ່ມຄວາມເຂັ້ມແຂງໃຫ້ແກ່ວຽກງານການເຝົ້າລະວັງພະຍາດໄຂ້ມາລາເຣຍທີ່ຢູ່ໃນສະຖານທີ່ໃຫ້ບໍລິການສາທາລະນະສຸກ ແລະພະນັກງານໃຫ້ບໍລິການດ້ານສາທາລະນະສຸກທຸກຂັ້ນ, ໂຄງການດັ່ງກ່າວຍັງມີຈຸດປະສົງເພື່ອສ້າງຄວາມເຂັ້ມແຂງໃຫ້ແກ່ໂຄງການໄຂ້ມາລາເຣຍແຫ່ງຊາດໂດຍມອບ ໃຫ້ອົງການ PSI LAO ເປັນຂົວຕໍ່ດ້ານວິຊາການປະສານຮ່ວມມືກັບສູນໄຂ້ຍຸງ, ແມ່ກາຝາກ ແລະແມງໄມ້ (CMPE)’s ເພື່ອຝຶກອົບຮົມ, ປະເມີນຍຸດທະສາດການກໍາຈັດໄຂ້ມາລາເຣຍ, ການຮັບມືຕອບໂຕ້ 1-3-7, ດໍາເນີນການວິເຄາະທາງດ້ານຂໍ້ມູນ, ດໍາເນີນການລົງສືບສວນສອບສວນກໍລະນີ,ແລະນໍາໃຊ້ຂໍ້ມູນໃນການຕັດສິນໃຈເພື່ອເສີມຂະຫຍາຍວິທີການກໍາຈັດພະຍາດ ຂ້ມາລາເຣຍໃຫ້ມີປະສິດທິຜົນໃນຕໍ່ໜ້າ. 

  ຈາກຜົນງານທີ່ຜ່ານມາທີ່ປະຕິບັດໂດຍ PMI ຜ່ານ USAID ເປັນການສະແດງໃຫ້ເຫັນເຖິງຄວາມມຸ້ງຫວັງທີ່ດີຂອງອາເມລິກາທີ່ມີຕໍ່ ສປປ ລາວ ແລະການສະໜັບ ສະໜູນຈາກອາເມລິກາໃນການຕໍ່ສູ້ກັບພະຍາດທີ່ມີຍຸງເປັນພາຫະນະນຳເຊື້ອໃນຂົງເຂດອາຊີຕາເວັນອອກສຽງໃຕ້.

     ອົງການ PSILAO ທີ່ໄດ້ມີບົດບາດຮ່ວມມືກັບພາກລັດຖະບານລາວໃນການຈັດຕັ້ງວວຽກງານຕ້ານພະຍາດໄຂ້ມາລາເຣຍ ແລະຂົງເຂດສຸຂະພາບອື່ນໆຫຼາຍກວ່າ 20 ປີ.

แชร์