ຈຳປາສັກ ມີສິນຄ້າໂອດັອບ 30 ຫົວໜ່ວຍ

ຂ່າວ: ໂພທິລາດ 

    ທົ່ວແຂວງຈໍາປາສັກມີສີນຄ້າທີ່ຖືກຮັບຮອງເປັນສີນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ (ODOP) ທັງໝົດ 30 ຫົວໜ່ວຍທີ່ລ້ວນແຕ່ແມ່ນຫົວຄິດປະດິດສ້າງຈາກພູມປັນຍາຊາວບ້ານ ແລະຄາດວ່າໝົດປີນີ້ທາງແຂວງຈະສູ້ຊົນໃຫ້ໄດ້ເພີ່ມຂຶ້ນດ້ານຫົວໜ້າພະແນກອຸດສາຫະກໍາ ແລະການຄ້າແຂວງຢໍ້າວ່າພາຍຫຼັງຜະລິດ ຕະພັນທີ່ຖືກຮັບຮອງເປັນສີນຄ້າ ODOP ແລ້ວຈະກາຍເປັນທ່າແຮງຫຼາຍດ້ານໃຫ້ກັບກຸ່ມຜູ້ຜະລິດບໍ່ວ່າທາງດ້ານການຕະຫຼາດການເຂົ້າຫາແຫຼ່ງທຶນ ແລະ ດ້ານ ໂຄສະນາຂ່າວສານຕ່າງໆ.

   ທ່ານ ປອ. ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະການຄ້າແຂວງຈໍາປາສັກໄດ້ໃຫ້ສໍາພາດເມື່ອບໍ່ດົນມານີ້ວ່າ: ຜ່ານມາອໍານາດການປົກຄອງແຂວງກໍ່ຄືພະແນກອຸດສາຫະກໍາ ແລະ ການຄ້າຕະຫຼອດຮອດພາກສ່ວນທີ່ກ່ຽວຂ້ອງໄດ້ສົມທົບກັບອໍານາດການປົກຄອງ, ຂະແໜງການກ່ຽວຂ້ອງໄດ້ລົງເກັບກໍາຂໍ້ມູນ ແລະເງື່ອນໄຂທ່າແຮງຂອງການຜະລິດທີ່ເປັນພູມປັນຍາຂອງປະຊາຊົນໃນທ້ອງຖິນ ແລະສ້າງເງື່ອນໄຂເພື່ອພັດທະນາສິນຄ້ານັ້ນໃຫ້ໄດ້ຮັບການປັບປຸງ ແລະພັດທະນາທາງດ້ານຄຸນນະພາບ, ມາດຕະຖານ, ປະລິມານ, ໂດຍນໍາໃຊ້ແຮງງານ, ວັດຖຸດິບ ແລະຊັບພະຍາກອນທີ່ມີໃນທ້ອງຖີ່ນ, ຊຶ່ງສິນຄ້າເຫຼົ່ານັ້ນຕ້ອງມີມູນເຊື້ອ, ເອກະລັກ, ຄວາມຢືນຍົງ ແລະມີການຂະຫຍາຍຕົວຢ່າງຕໍ່ເນື່ອງ, ປະຈຸບັນທົ່ວແຂວງຈໍາປາສັກສາມາດຊຸກຍູ້ສົ່ງເສີມໃຫ້ກຸ່ມຜະລິດຕະພັນທັງກະສີກໍາ, ຫັດຖະກໍາ ແລະອື່ນໆ..ຖືກ ຍົກລະດັບໃຫ້ສາມາດຖືກຮອງຮັບເປັນສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດໄດ້ແລ້ວທັງໝົດ 30 ຫົວໜ່ວຍ ແລະຄາດວ່າໝົດປີຈະສູ້ຊົນເຮັດໃຫ້ຜະລິດຕະພັນທີ່ໆປະດິດຈາກພູມປັນຍາຊາວບ້ານໄດ້ຖືກຮອງຮັບໄດ້ເພີ່ມຂຶ້ນ.

   ທ່ານຫົວໜ້າພະແນກອຸດສາຫະກໍາ ແລະການຄ້າແຂວງຈໍາປາສັກ ກ່າວຕື່ມວ່າ: ພາຍຫຼັງທີ່ສິນຄ້າດັ່ງກ່າວຖືກຮັບຮອງແລ້ວທາງແຂວງແມ່ນຈະໄດ້ລົງຊຸກຍູ້ທາງດ້ານເຕັກນິກ, ວິຊາການຕ່າງໆ, ຊຸກຍູ້ການເຂົ້າເຖິງແຫຼ່ງທຶນ, ເຂົ້າເຖິງຕະຫຼາດພ້ອມທັງໄດ້ຊຸກຍູ້ກຸ່ມຜະລິດດັ່ງກ່າວອອກສູ່ຕະຫຼາດສາກົນ, ໂດຍສະເພາະແມ່ນຕະຫຼາດຫວຽດນາມທີ່ມີການຈັບຈ່ອງ ແລະສັ່ງຊື້ເປັນຈໍານວນຫຼາຍໃນແຕ່ລະປີ, ຈົນເຮັດໃຫ້ການຈໍາໜ່າຍຜະລິດຕະພັນ ODOP ຂອງແຂວງພວກເຮົາມີລັກສະນະເພີ່ມຂຶ້ນທົບເຄິ່ງ, ຊຶ່ງມັນເປັນສ້າງລາຍຮັບທີ່ດີໃຫ້ປະຊາຊົນກໍ່ຄືກຸ່ມຜະລິດສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ, ພິເສດມັນໄດ້ກາຍເປັນການໂຄສະນາໃນໂຕພາຍຫຼັງທີ່ຖືກ ຮອງຮັບກໍ່ຈະລົງໂຄສະນາທາງດ້ານສື່ສານໜັງສືພິມ, ວິທະຍຸ, ໂທລະພາບ ແລະສື່ອີເລັກໂຕນິກຕ່າງໆສາມາດມີຕະຫຼາດກວ້າງຂວາງອອກໄປເລື້ອຍໆ.

แชร์