2025 ອັດຕະປື ຈະລືບລ້າງທຸກຍາກເຫຼືອ 18%

ຂ່າວ: ວັດທະນາ 

   ພະແນກກະສິກໍາ ແລະປ່າໄມ້ ແຂວງອັດຕະປື ໄດ້ຈັດກອງປະຊຸມຮັບຮອງຜົນການເກັບກຳຂໍ້ມູນຕາມດຳລັດ 348/ລບ ປະຈຳປີ 2020 ແລະວາງທິດທາງແຜນການຄາດໝາຍສູ້ຊົນລຶບລ້າງຄວາມທຸກຍາກ ປີ 2021 ຫາ ປີ 2025 ຂຶ້ນຫວ່າງບໍ່ດົນມານີ້ທີ່ຫໍປະຊຸມໃຫຍ່ຂອງແຂວງໂດຍການເຂົ້າຮ່ວມຂອງທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື, ມີທ່ານ ພອນປະເສີດ ທອງສີທາວົງ ຫົວໜ້າພະແນກກະສິກຳ ແລະປ່າໄມ້ແຂວງພ້ອມດ້ວຍຂະແໜງການພາຍໃນພະແນກກະສິກໍາ ແລະປ່າໄມ້ແຂວງ, ເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ພອນປະເສີດ ທອງສີທາວົງ ໃຫ້ຮູ້ວ່າ: ການຮັບຮອງຜົນການເກັບກຳຂໍ້ມູນໃນທົ່ວແຂວງຕາມດຳລັດ 348/ລບ ວ່າດ້ວຍມາດຕະຖານພົ້ນທຸກ ແລະມາດຕະຖານພັດທະນາພາຍໃນ 5 ເມືອງ ຂອງແຂວງມີ 142 ບ້ານ ມີ 30,5 ພັນ ຄອບຄົວມີພົນລະເມືອງ 1,5 ແສນຄົນ ຍິງ 75,4 ພັນຄົນ,ມີບ້ານທຸກຍາກ 106 ບ້ານ ກວມເອົາ 74,65% ຂອງຈຳນວນບ້ານທັງໝົດ,ຄອບຄົວທຸກຍາກ 17.118 ຄອບຄົວ ກວມເອົາ 56% ຂອງຈໍານວນຄອບຄົວທັງໝົດ, ບ້ານພົ້ນທຸກ ມີ 36 ບ້ານ ກວມເອົາ 25,35% ຂອງບ້ານທັງໝົດ, ຄອບຄົວພົ້ນທຸກມີ 13.438 ຄອບຄົວ ກວມເອົາ 43,97% ຂອງຄອບຄົວທັງໝົດ, ຄອບຄົວພັດທະນາມີ 6.114 ຄອບຄົວ ກວມເອົາ 20,06% ຂອງຄອບຄົວທັງໝົດ.

ກອງປະຊຸມຍັງໄດ້ຮັບຮອງເອົາທິດທາງແຜນການຄາດໝາຍສູ້ຊົນການແກ້ໄຂຄວາມທຸກຍາກແຕ່ປີ 2021-2025 ໂດຍຈະແກ້ໄຂຄອບຄົວທຸກຍາກຮອດທ້າຍປີ 2025 ໃຫ້ຄອບຄົວທຸກຍາກຍັງເຫຼືອ 3.203 ຄອບຄົວ ເທົ່າກັບ 18,71% ຂອງຄອບຄົວທຸກຍາກທັງໝົດ, ແກ້ໄຂບ້ານທຸກຍາກຮອດທ້າຍປີ 2025 ໃຫ້ໄດ້ 65 ບ້ານຍັງເຫຼືອ 41 ບ້ານ ເທົ່າກັບ 38,68% ຂອງບ້ານທຸກຍາກທັງໝົດ ແລະ ສ້າງຄອບຄົວພັດທະນາຮອດທ້າຍປີ 2025 ໃຫ້ໄດ້ 18.091 ຄອບຄົວ ແລະ ສ້າງບ້ານ ພັດທະນາຮອດທ້າຍປີ 2025 ໃຫ້ມີບ້ານບໍ່ພັດທະນາຍັງເຫຼືອ 63 ບ້ານ ເທົ່າກັບ 44,68% ຂອງບ້ານທັງໝົດ, ສ່ວນການແກ້ໄຂເມືອງທຸກຍາກແມ່ນໄດ້ມອບໃຫ້ຂະແໜງການທີ່ກ່ຽວຂ້ອງຂັ້ນແຂວງ ແລະຂັ້ນເມືອງສ້າງແຜນສູ້ຊົນຕາມມາດຖານເງື່ອນໄຂທີ່ຍັງບໍ່ທັນບັນລຸ.

แชร์