ນາຍົກເນັ້ນແຂວງພາກໃຕ້ຄຸມໂຄວິດແຂງແຮງກວ່າເກົ່າ

ຂ່າວ: ເກດສະໜາ ແກ້ວສຸວັນນະແສງ

    ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ເດີນທາງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຈໍາປາສັກ ໃນຕອນເຊົ້າວັນທີ 29 ກໍລະກົດ 2021 ໂອກາດນີ້ທ່ານນາຍົກລັດຖະມົນຕີໄດ້ຮັບຟັງລາຍງານ ແລະໃຫ້ການຊີ້ນໍາ, ຊຸກຍູ້ຄະນະພັກ-ອົງການປົກຄອງແຂວງໆ ຈໍາປາສັກ, ສາລະວັນ, ເຊກອງ, ອັດຕະປືໃນການປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ19 .

   ສະເພາະຄວບຄຸມ ແລະແກ້ໄຂການລະບາດພະຍາດໂຄວິດ-19 ຢູ່ແຂວງຈໍາປາສັກ ທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກໄດ້ລາຍງານວ່າ: ແຂວງຈໍາປາສັກໄດ້ເອົາໃຈໃສ່ໃນການປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ທີ່ສູນກາງວາງອອກຢ່າງເຂັ້ມງວດ, ວັນທີ 29 ກໍລະກົດ 2021 ທົ່ວແຂວງມີຜູ້ຕິດເຊື້ອໂຄວິດ-19 ໃໝ່ຈໍານວນ 57 ຄົນ, ຊຶ່ງແມ່ນແຮງງານນຳເຂົ້າທັງໝົດ, ຕົວເລກສະສົມທົ່ວແຂວງມີຜູ້ຕິດເຊື້ອ 1.618 ຄົນ, ປົວຫາຍດີແລ້ວ 755 ຄົນ, ຍັງສືບຕໍ່ປິ່ນປົວຢູ່ໂຮງໝໍ 3 ແຫ່ງຄື: ຄົນເຈັບທີ່ມີອາການໜັກແມ່ນປິ່ນປົວຢູ່ເມືອງໂພນທອງ, ຄົນເຈັບມີອາການປານກາງແມ່ນປິ່ນປົວຢູ່ໂຮງໝໍບໍລິເວນ 106 ກອງທັບ, ສ່ວນຜູ້ຕິດເຊື້ອອາການເບົາບາງແມ່ນປິ່ນປົວຢູ່ໂຮງໝໍພາກສະໜາມວິທະຍາໄລການເງິນພາກໃຕ້ປະຈຸບັນມີຜູ້ຍັງສືບຕໍ່ປິ່ນປົວທັງໝົດຈໍານວນ 863 ຄົນ.

 ສ່ວນແຮງງານລາວສະເລ່ຍເດີນທາງເຂົ້າມາປະເທດຜ່ານດ່ານສາກົນວັງເຕົ່າແຕ່ລະວັນປະມານ 100-200 ຄົນ, ທົ່ວແຂວງມີສູນກັກກັ້ນບໍລິເວນທັງໝົດມີຢູ່ 8 ສູນ, ມີຈໍານວນທັງໝົດ 1.431 ຄົນ, ຈາກນີ້ພະນັກງານແພດ-ໝໍ ທົ່ວແຂວງໄດ້ສຸມໃສ່ສັກວັດຊິນ (ຈອນສັນແອນຈອນສັນ) ແກ່ປະຊາຊົນຢູ່ 9 ເມືອງ,1 ນະຄອນຢ່າງເປັນຂະບວນຊຶ່ງໄດ້ຮັບການແບ່ງປັນຈາກລັດຖະບານກໍ່ຄືກະຊວງສາທາລະນະສຸກຈໍານວນ 1,3 ແສນໂດສ, ຊຶ່ງເມື່ອສັກສໍາເລັດຈະກວມເອົາ 30% ຂອງພົນ ລະເມືອງໃນທົ່ວແຂວງ.

 ພາຍຫຼັງຟັງລາຍງານແລ້ວທ່ານ ພັນຄໍາ ວິພາວັນ ກໍ່ໄດ້ເປັນກຽດໂອ້ລົມຊຶ່ງສະແດງຄວາມຍ້ອງຍໍຊົມເຊີຍຕໍ່ຄະນະພັກ-ອົງການປົກຄອງ ແລະຄະນະສະເພາະກິດແຕ່ລະຂັ້ນທີ່ໄດ້ສຸມມານະຈິດກຳລັງແຮງ ແລະທຶນຮອນເຂົ້າໃນການຄວບຄຸມພະຍາດໂຄວິດ-19 ຢ່າງຈິງຈັງ, ໂອກາດນີ້ກໍໄດ້ນໍາເອົາຄວາມເປັນຫ່ວງເປັນໄຍ ແລະຂວັນກຳລັງໃຈຂອງພັກ, ລັດຖະບານທີ່ມີຕໍ່ການປ້ອງກັນ, ຄວບຄຸມ ແລະແກ້ໄຂສະພາບການລະບາດພະຍາດໂຄວິດ-19 ຢູ່ແຂວງຈໍາປາສັກ ແລະບັນດາແຂວງພາກໃຕ້, ຈາກນີ້ກໍ່ໄດ້ໃຫ້ທິດຊີ້ນໍາຕໍ່ຄະນະພັກອົງການປົກຄອງແຂວງກໍ່ຄືຄະນະສະເພາະກິດແຕ່ລະຂັ້ນໃຫ້ສືບຕໍ່ເອົາໃຈໃສ່ໃນການຄວບຄຸມພະຍາດໂຄວິດ19 ໃຫ້ແຂງແຮງກວ່າເກົ່າຖືເອົາການ ປະຕິບັດມາດຕະການທີ່ສູນກາງພັກ, ລັດຖະບານ ແລະ ແຂວງວາງອອກຢ່າງເຂັ້ມງວດ ແລະ ເປັນເຈົ້າການຂອງທົ່ວປວງຊົນ, ສືບຕໍ່ປຸກລະດົມກຳລັງແຮງຂອງສັງຄົມສາມັກຄີກັນປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ໃຫ້ຫຼຸດໜ້ອຍຖອຍລົງເທື່ອລະກ້າວ.

    ໂອກາດມາຢ້ຽມຢາມ ແລະຊີ້ນໍາ, ຊຸກຍູ້ວຽກງານຄວບຄຸມ ແລະແກ້ໄຂການລະບາດພະຍາດໂຄວິດ-19 ຢູ່ ແຂວງຈໍາປາສັກ ແລະບັນດາແຂວງພາກໃຕ້ນາຍົກລັດຖະ ມົນຕີຍັງໄດ້ມອບເງິນໃຫ້ແຂວງຈໍາປາສັກຈໍານວນ 450 ລ້ານກີບ, ແຂວງສາລະວັນ, ເຊກອງ ແລະແຂວງອັດຕະປືແຂວງລະ 150 ລ້ານກີບ, ເພື່ອນໍາໃຊ້ເຂົ້າໃນການຄວບຄຸມແກ້ໄຂການລະບາດພະຍາດໂຄວິດ-19, ຈາກນີ້ກໍ່ໄດ້ໄປຢ້ຽມຢາມໂຮງໝໍພາກສະໜາມວິທະຍາໄລການເງິນພາກໃຕ້ເພື່ອເປັນການຢ້ຽມຢາມຖາມຂ່າວ ແລະໃຫ້ກຳລັງໃຈແກ່ພະນັກງານແພດໝໍ ແລະຜູ້ຕິດເຊື້ອໂຄວິດ-19 ທີ່ກຳລັງພະຍາບານຕົວຢູ່.

  ຕິດຕາມນາຍົກລັດຖະມົນຕີຢ້ຽມຢາມ ແລະຊີ້ນໍາ, ຊຸກຍູ້ວຽກງານຄວບຄຸມ ແລະແກ້ໄຂການລະບາດພະຍາດໂຄວິດ-19 ຢູ່ແຂວງຈໍາປາສັກ, ຍັງມີລັດຖະມົນຕີກະຊວງການເງິນ, ລັດຖະມົນຕີກະຊວງສາທາລະນະສຸກ, ລັດຖະມົນຕີກະຊວງແຮງງານ ແລະສະຫວັດດີການສັງຄົມອີກດ້ວຍ.

แชร์