ສສງ ເຊໂນ ມີຍອດເງິນຝາກ 9,6 ຕື້ກີບ

  ເມື່ອບໍ່ດົນມານີ້ທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສາຫະກຳ ແລະການຄ້າແຂວງສະຫວັນນະເຂດທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13 ພ້ອມດ້ວຍທ່ານນາງ ລັດທະນາ ດວງບຸບຜາ ຮອງຫົວໜ້າກົມສົ່ງເສີມທັງເປັນຫົວໜ້າກອງທຶນສົ່ງເສີມ SMEs ກະຊວງອຸດສາຫະກຳ ແລະການຄ້າ ແລະທີມງານຈາກສູນກາງ ແລະແຂວງ, ໄດ້ພ້ອມກັນລົງຕິດຕາມ, ສົ່ງເສີມສະຫະກອນສິນເຊື່ອ ແລະເງິນຝາກປະຢັດເຊໂນ ເມືອງອຸທຸມພອນ ແຂວງສະຫວັນນະເຂດ, ຊຶ່ງສະຫະກອນດັ່ງກ່າວໄດ້ມີການເຄື່ອນໄຫວຕະຫຼອດມາ, ທັງນີ້ກໍ່ເພື່ອເປັນການກະຕຸກຊຸກຍູ້ເພື່ອສົ່ງເສີມໃຫ້ສະຫະກອນດັ່ງກ່າວມີການບໍລິຫານຈັດການໃຫ້ສະມາຊິກມີຄວາມເຂັ້ມແຂງຂຶ້ນຕື່ມ.

  ໂອກາດດັ່ງກ່າວ ທ່ານ ໜູເຊືອມ ໂພທິສານ ປະທານສະພາບໍລິຫານສະຫະກອນສິນເຊື່ອ ແລະເງິນຝາກປະຢັດ (ສສງ) ເຊໂນ ກໍ່ໄດ້ລາຍງານໃຫ້ຮູ້ກ່ຽວກັບປະຫວັດຄວາມເປັນມາ ແລະການເຄື່ອນ ໄຫວຂອງສະຫະກອນ ໃນໄລຍະຜ່ານມາໃຫ້ຮູ້ວ່າ: ສະຫະກອນພວກເຮົາໄດ້ສ້າງຕັ້ງຂຶ້ນ ແຕ່ປີ 2003 ໂດຍມີສະມາຊິກກໍ່ຕັ້ງເບື້ອງຕົ້ນ 318 ຄົນ,ມີຮຸ້ນ 414 ຮຸ້ນ, ຊຶ່ງມີວິໄສທັດເພື່ອຫຼຸດຜ່ອນຄວາມທຸກຍາກໃຫ້ແກ່ສະມາຊິກ, ໂດຍໃຫ້ສະມາຊິກເຂົ້າເຖິງການບໍລິການດ້ານການເງິນທີ່ມີຄວາມເຊື່ອຖືແລະຍືນຍົງ, ໃນນັ້ນພາລະກິດຂອງສະຫະກອນປະກອບດ້ວຍ: ປ່ອຍສິນເຊື່ອໃຫ້ສະມາຊິກທີ່ມີຄວາມຈິງໃຈນຳໃຊ້ເງິນເຂົ້າເປົ້າໝາຍ, ຈາກນັ້ນກໍ່ມີບໍລິການທາງດ້ານການເງິນທີ່ວ່ອງໄວ ແລະທົ່ວເຖິງ, ມີການເຊື່ອມຊຶມວິໄສທັດ, ມີການລະດົມຂະຫຍາຍຮຸ້ນ, ລະດົມເງິນຝາກ, ຕ້ານໜີ້ຊັກຊ້າ, ຫຼຸດຜ່ອນລາຍຈ່າຍທີ່ບໍ່ຈຳເປັນສ້າງຜົນກຳໄລໃຫ້ຫຼາຍ ຊຶ່ງມາຮອດປີ 2020 ສະຫະກອນມີສະມາຊິກຈຳນວນ 4.434 ຄົນ, ມີຈຳນວນຮຸ້ນ 34.589 ຮຸ້ນ, ມີສະມາຊິກຜູ້ຝາກເງິນຈຳນວນ 4.208 ບັນຊີ, ມີເງິນຝາກທັງໝົດ 9,6 ຕື້ກີບ.

   ໃນການລົງຕິດຕາມສົ່ງເສີມສະຫະກອນສິນເຊື່ອ ແລະເງິນຝາກປະຢັດເຊໂນໃນຄັ້ງນີ້, ທາງກົມສົ່ງເສີມກໍ່ຄືກອງທຶນສົ່ງເສີມ SMEs  ກໍ່ໄດ້ມີການຜ່ານສັນຍາເງິນກູ້ດອກເບ້ຍຕໍ່າເພື່ອສະໜອງໃຫ້ແກ່ສະຫະກອນສິນເຊື່ອ ແລະເງິນຝາກປະຢັດເຊໂນ, ເພື່ອຈະໄດ້ນຳເອົາກ້ອນເງິນຈຳນວນດັ່ງກ່າວນຳໄປບໍລິຫານໃຫ້ເກີດດອກອອກຜົນກໍ່ຄືນຳໄປຊ່ວຍເຫຼືອສະມາຊິກຂອງສະຫະກອນໃຫ້ມີຄວາມເຂັ້ມແຂງທາງດ້ານການເງິນຕໍ່ໄປ.

แชร์