ສະຫວັນນະເຂດ ເປີດຂະບວນການເສຍຄ່າທຳນຽມທາງ ແລະພາສີທີ່ດິນຜ່ານລະບົບທະນາຄານປີ 2019

 ແຂວງສະຫວັນນະເຂດເປີດຂະບວນການເສຍຄ່າທຳນຽມທາງ ແລະພາສີທີ່ດິນຜ່ານລະບົບທະນາຄານປະຈຳປີ 2019 ຕັ້ງເປົ້າການເສຍພາສີທີ່ດິນໃຫ້ໄດ້ 18 ຕື້ກວ່າກີບ ແລະຄ່າທຳນຽມທາງໃຫ້ໄດ້ 6 ຕື້ກີບ ຫວັງຊຸກຍູ້ການເກັບລາຍຮັບເຂົ້າງົບປະມານຂອງແຂວງໃນປີນີ້ໃຫ້ບັນລຸໄດ້ຕາມຕົວແຜນການທີ່ວາງໄວ້.

  ພິທີເປີດຂະບວນການເສຍຄ່າທຳນຽມທາງ ແລະພາສີທີ່ດິນຜ່ານລະບົບທະນາຄານປະຈຳປີ 2019 ຂອງແຂວງສະຫວັນນະເຂດ ໄດ້ ຈັດຂຶ້ນໃນວັນທີ 5 ມີນາ 2019, ທີ່ສະໂມສອນຫ້ອງວ່າການປົກຄອງ ນະຄອນໄກສອນ ພົມວິຫານ ໂດຍການເປັນກຽດເຂົ້າຮ່ວມໃນຄັ້ງນີ້ຂອງທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ມີທ່ານ ບຸນຍູ້ ທຳມະວົງ ເຈົ້ານະຄອນໄກສອນ ພົມວິຫານ, ມີຮອງຫົວໜ້າສ່ວຍສາອາກອນປະຈຳແຂວງ, ຫົວໜ້າສາຂາທະນາຄານການຄ້າຕ່າງປະເທດລາວມະຫາຊົນແຂວງສະຫວັນນະເຂດ,ພະແນກການກົມກອງອ້ອມຂ້າງແຂວງ,ບັນດາຫົວໜ່ວຍທຸລະກິດ,ຫ້າງຮ້ານ, ພໍ່ແມ່ປະຊາຊົນ ແລະ ພາກສ່ວນຕ່າງໆພາຍໃນແຂວງເຂົ້າຮ່ວມຢ່າງພ້ອມພຽງ.

  ໂອກາດນີ້, ທ່ານ ພູຄຳ ອະນົນທະວົງ ຮອງຫົວໜ້າສ່ວຍສາອາກອນປະຈຳແຂວງສະຫວັນນະເຂດ ໄດ້ລາຍງານໃຫ້ຮູ້ວ່າ: ໃນ 2 ປີຜ່ານມາ, ການເປີດຂະບວ ນການເສຍຄ່າທຳນຽມທາງຜ່ານລະບົບທະນາຄານຢູ່ພາຍໃນແຂວງສະຫວັນນະເຂດ ກໍ່ໄດ້ຮັບການຮ່ວມມືເປັນຢ່າງດີຈາກພາກລັດ, ບຸກຄົນຫົວໜ່ວຍທຸລະກິດ ກໍ່ຄືເຈົ້າຂອງ ພາຫະນະແຕ່ລະຄົນ ໄດ້ພ້ອມກັນ ຕື່ນຕົວປະກອບສ່ວນພັນທະຊຳລະ ຄ່າທຳນຽມທາງຜ່ານລະບົບທະນາຄານເປັນຈຳນວນຫຼວງຫຼາຍເຮັດໃຫ້ລາຍຮັບເກີດຂຶ້ນໃນປີ 2017 ແລະປີ 2018 ປະຕິບັດໄດ້ທັງໝົດ 10,04 ຕື້ກີບ, ໃນນັ້ນເກີດຂຶ້ນໃນປີ 2017 ປະຕິບັດໄດ້ 1,42 ຕື້ກີບ, ຈຳນວນພາຫະນະ 7.345 ຄັນ,ປີ 2018 ປະຕິບັດໄດ້ 8,62 ຕື້ກີບ ໃນນີ້ມີຈຳນວນພາຫະນະທີ່ບໍ່ໄດ້ເສຍໃນປີ 2017 ເລື່ອນມາຊຳລະໃນປີ 2018 ຈຳນວນ 18.958 ຄັນ, ເປັນເງິນ 3,69 ຕື້ກີບ ແລະຊຳລະ ໃນປີ 2018 ຈຳນວນ 25.012 ຄັນ, ເປັນເງິນ 4,92 ຕື້ກີບ, ແຕ່ ເຖິງຢ່າງໃດກໍ່ຕາມ, ການເພີ່ມຂຶ້ນຂອງລາຍຮັບຄ່າທຳນຽມທາງໃນ 2 ປີຜ່ານມາກັບການຊຳລະຕົວຈິງ ຖ້າທຽບໃສ່ຂໍ້ມູນທີ່ມີໃນຕົວຈິງໃນປີ 2017 ທີ່ຂະແໜງ ການກ່ຽວຂ້ອງ ສະໜອງໃຫ້ແມ່ນຍັງຕ່ຳຄື: ໃນປີ 2017 ປະຕິບັດໄດ້ 8,61% ແລະປີ 2018 ປະຕິບັດໄດ້ 8,18%,  ສະ ນັ້ນ ເພື່ອເຮັດໃຫ້ການຊຳລະຄ່າທຳ ນຽມທາງມີຄວາມສະດວກຄ່ອງຕົວດີຂຶ້ນໃນປີ 2019 ນີ້,  ການຊຳ ລະບໍ່ພຽງແຕ່ຜ່ານທະນາຄານການ ຄ້າຕ່າງປະເທດລາວມະຫາຊົນ ແລະຜ່ານຕົວແທນເທົ່ານັ້ນ ຍັງສາ ມາດຂະຫຍາຍການຊຳລະຜ່ານທະ ນາຄານສົ່ງເສີມກະສິກຳໄດ້ນຳອີກ ແລະກໍ່ຍັງເປີດໃຫ້ທະນາຄານອື່ນ ສາມາດເຂົ້າມາມີສ່ວນຮ່ວມເປີດບໍລິການໄດ້ເຊັ່ນດຽວກັນ (ຍັງຢູ່ໃນໄລຍະການດຳເນີນເພື່ອກຽມຄວາມພ້ອມ) ມາຮອດປະຈຸບັນ, ທົ່ວແຂວງສະຫວັນນະເຂດລວມມີຈຳນວນພາຫະນະທັງໝົດ 305.590 ຄັນ.

  ທາງດ້ານການເກັບພາສີທີ່ດິນລັດຖະບານຖືວ່າລາຍຮັບຈາກທີ່ດິນແມ່ນເປັນລາຍຮັບທີ່ໝັ້ນຄົງ,ເນື່ອງຈາກຕອນດິນເປັນກຳມະສິດຂອງວົງຄະນາຍາດແຫ່ງ ຊາດຕາມທີ່ໄດ້ກຳນົດໄວ້ໃນມາດຕາທີ 17 ຂອງລັດຖະທຳມະນູນແຕ່ການເກັບລາຍຮັບຕົວຈິງທີ່ເກັບໄດ້ຈາກພາສີທີ່ດິນ ແລະລາຍໄດ້ອື່ນຈາກທີ່ດິນໃນໄລຍະຜ່ ານມາ ແມ່ນບໍ່ທັນ ໃກ້ຄຽງກັບຄວາມເປັນຈິງ ໂດຍ ສະເພາະຂ້ໍມູນເນື້ອທີ່ທີ່ດິນຍັງບໍ່ທັນ ຊັດເຈນ ລວມເຖິງກົນໄກການຄຸ້ມ ຄອງການເກັບລາຍຮັບຍັງບໍ່ທັນ ເປັນລະບົບມາດຕະຖານທີ່ຮັດກຸມເນື້ອທີ່ທັງໝົດທົ່ວແຂວງມີ 21,774 ກິໂລຕາແມັດໃນນີ້ດິນທີ່ແຈ້ງເສຍພາສີຕາມຂ້ໍມູນສັງລວມເບື້ອງຕົ້ນໄດ້ໃນປີ 2017 ກວມເອົາ ປະມານ 17-18% ເທົ່ານັ້ນ, ໃນປີ 2018 ລາຍຮັບຈາກທີ່ດິນປະຕິ ບັດໄດ້ 21,87 ຕື້ກີບ, ເທົ່າກັບ 79,54% ໃນນັ້ນລາຍຮັບຈາກພາສີທີ່ດິນປະຕິບັດໄດ້ 16,95 ຕື້ກີບ, ເທົ່າກັບ 77,05% ສາເຫດທີ່ພາໃຫ້ປະຕິບັດບໍ່ໄດ້ຕາມແຜນອາດເປັນຍ້ອນຖານຂໍ້ມູນທີ່ບໍ່ຊັດເຈນ, ຖານຂໍ້ມູນທີ່ມີແລ້ວອາດ ຈະເກັບບໍ່ຖືກ ຕາມການຊົມໃຊ້ຕົວຈິງ, ເຈົ້າຂອງ ດິນໄປຢູ່ບ່ອນອື່ນຂາດການພົວພັນ, ມາດຕະການໃນທາງປະຕິບັດຕໍ່ກັບ ຜູ້ຄ້າງຊຳລະຫຼືຊຳລະບໍ່ຖືກກັບການຊົມໃຊ້ທີ່ດິນຕົວຈິງແມ່ນຍັງ ເຮັດບໍ່ທັນໄດ້ດີເທົ່າທີ່ຄວນ ສະນັ້ນ, ຕໍ່ກັບສາເຫດດັ່ງກ່າວລັດຖະບານ ກໍ່ຄືກະຊວງການເງິນ ຈິ່ງໄດ້ມີ ຄວາມຈຳເປັນ ແລະເຫັນໄດ້ຄວາມ ສຳຄັນໃນການຄຸ້ມຄອງລາຍຮັບ ໃນຂົງເຂດດັ່ງກ່າວ ຈຶ່ງໄດ້ມີການ ປັບປຸງວິທີການຊຳລະພາສີທີ່ດິນ ໃໝ່ແບບທັນສະໄໝເຂົ້າມານຳໃຊ້ຕາມຄຳແນະນຳເລກທີ 3909/ກງ, ລົງວັນທີ 4 ທັນວາ 2018 ກ່ຽວ ກັບການແຈ້ງ ແລະຊຳລະພາສີທີ່ ດິນຜ່ານລະບົບທະນາຄານ ຊຶ່ງ ເລີ່ມແຕ່ວັນທີ 1 ມັງກອນ 2019 ແມ່ນຈະໄດ້ນຳໃຊ້ລະບົບດັ່ງກ່າວ ໃນຂອບເຂດທົ່ວປະເທດເປົ້າໝາຍແມ່ນເພື່ອເພີ່ມປະສິດທິພາບໃນການຊຳລະພາສີທີ່ດິນທີ່ຮັບປະກັນຄວາມໂປ່ງໃສ, ວ່ອງໄວ ແລະກວດສອບໄດ້ໂດຍສາມາດຊຳລະຜ່ານທະນາຄານ ຫຼືຕົວແທນ.

  ຊຶ່ງການເສຍຄ່າທຳນຽມທາງປະຈຳປີ 2019 ແມ່ນມີກຳນົດຮອດວັນທີ 31/3/2019ນີ້; ຊຶ່ງຖ້າຫາກບໍ່ມາຊຳລະຕາມກຳນົດເວລາດັ່ງກ່າວແມ່ນຈະຖືກປັບໃໝຕາມລະບຽບຫຼັກການທີ່ວາງໄວ້; ສ່ວນການເສຍພາສີທີ່ດິນແມ່ນຈະດຳເນີນໄປຈົນສິ້ນສຸດ 2019 ນີ້.

ຂ່າວ: ນສພ ເສດຖະກິດ-ສັງຄົມ

แชร์