ຜູ້ມີດິນແຄມຂອງ 2 ເມືອງບໍ່ຄວນໂອນກຳມະສິດໃຊ້ເທື່ອ

ຂ່າວ: ບຸນຕຽງ ຈັນທະວົງ

  ໃນໂອກາດໃຫ້ສໍາພາດຜ່ານລາຍການຍົກບັນຫາມາສົນທະນາທາງວິທະຍຸກະຈາຍສຽງແຫ່ງຊາດເມື່ອບໍ່ດົນມານີ້ ທ່ານ ພຸດທະເສນ ສິນທະວົງ, ຮອງຫົວໜ້າພະແນກໂຍທາທິການ ແລະຂົນສົ່ງນະຄອນຫຼວງວຽງຈັນ ໄດ້ຮຽກຮ້ອງມາຍັງຜູ້ທີ່ມີດິນຢູ່ແຄມຂອງ 2 ເມືອງພາຍ ໃນນະຄອນຫຼວງວຽງຈັນຄື: ເມືອງສີສັດຕະນາກ ແລະເມືອງຫາດຊາຍຟອງທີ່ນອນຢູ່ໃນໂຄງການປ້ອງກັນຕະຝັ່ງ ແລະພັດທະນາແຄມຂອງໄລຍະທີ II ບໍ່ຄວນໂອນກໍາມະສິດການນໍາໃຊ້ທີ່ດິນ ຫຼືມີການຊື້-ຂາຍທີ່ດິນ ເທື່ອໃນໄລຍະນີ້ເນື່ອງຈາກໂຄງການດັ່ງກ່າວຈະເລີ່ມລົງມືຈັດຕັ້ງປະຕິບັດພາຍໃນຕົ້ນປີ 2021.

    ທ່ານກ່າວວ່າ: ຕາມການສໍາຫຼວດຂໍ້ມູນໃນເບື້ອງຕົ້ນໂຄງການນີ້ຈະສົ່ງຜົນກະທົບຕໍ່ເນື້ອທີ່ດິນຂອງປະຊາຊົນ 111 ຕອນ. ໃນນີ້ສະເພາະດິນທີ່ຖືກຜົນກະທົບຈາກການກໍ່ສ້າງສວນສາທາລະນະຢູ່ບ້ານແກ້ງຍາງມີຫຼາຍກວ່າ 50 ຕອນ. ຢ່າງໃດກໍ່ຕາມຜົນກະທົບຂອງໂຄງການນີ້ຈະໄດ້ເກັບກໍາອີກຄັ້ງໃຫ້ລະອຽດກວ່າເກົ່າເພື່ອໃຫ້ໄດ້ຂໍ້ມູນທີ່ຊັດເຈນກ່ອນຈະເລີ່ມລົງມືກໍ່ສ້າງຕົວຈິງໃນຕົ້ນປີໜ້າ. ດັ່ງນັ້ນຜູ້ທີ່ມີດິນຢູ່ແຄມຂອງພາຍໃນສອງເມືອງດັ່ງກ່າວບໍ່ຄວນມີການໂອນກໍາມະສິດການນໍາໃຊ້ທີ່ດິນຫຼືມີການຊື້-ຂາຍທີ່ດິນເທື່ອໃນໄລຍະນີ້ເພາະຈະສ້າງຄວາມຫຍຸ້ງຍາກສັບສົນໃຫ້ແກ່ຄະນະຮັບຜິດຊອບໂຄງການໃນການຊົດເຊີຍຜົນເສຍຫາຍທີ່ເກີດຂຶ້ນ.

   ຮອງຫົວໜ້າພະແນກໂຍທາທິການ ແລະຂົນສົ່ງນະຄອນຫຼວງວຽງຈັນໃຫ້ຮູ້ຕື່ມວ່າ: ໄລຍະຜ່ານມາຄະນະຮັບຜິດຊອບໂຄງການໄດ້ເຊີນເອົາພາກສ່ວນທີ່ກ່ຽວຂ້ອງ,ໃນນີ້ລວມທັງບັນດານາຍບ້ານທີ່ຢູ່ລຽບຕາມແຄມຂອງຂອງເມືອງສີສັດຕະນາກ ແລະເມືອງຫາດຊາຍຟອງ ມາປະຊຸມເພື່ອຮັບຟັງການເຜີຍແຜ່ກ່ຽວກັບເຫດຜົນ ແລະຜົນປະໂຫຍດລວມຂອງໂຄງການເພື່ອນໍາໄປເຜີຍແຜ່ຕໍ່ໃຫ້ປະຊາຊົນພາຍໃນບ້ານຂອງຕົນຮັບຮູ້ ແລະໃຫ້ການຮ່ວມມືນໍາລັດຖະບານ. ນອກຈາກນີ້ໃນອີກບໍ່ດົນນີ້ຄະນະຮັບຜິດ ຊອບໂຄງການຈະລົງໄປສົມທົບກັບອົງການປົກຄອງເມືອງທີ່ກ່ຽວຂ້ອງເພື່ອລົງເຜີຍແຜ່ໃຫ້ປະຊາຊົນຢູ່ບັນດາບ້ານທີ່ຢູ່ລຽບແຄມຂອງໃຫ້ຮັບຮູ້ອີກຄັ້ງກ່ຽວກັບໂຄງການດັ່ງກ່າວ.

   ໂຄງການປ້ອງກັນຕະຝັ່ງ ແລະພັດທະນາແຄມຂອງ ໄລຍະທີ II ປະກອບມີ 4 ໜ້າວຽກສໍາຄັນຄື:

1). ຍົກລະດັບຄູປ້ອງກັນນໍ້າ ແລະກໍ່ສ້າງລະບົບປ້ອງກັນຕະຝັ່ງແຕ່ຫຼັກ 3 ຫາ ຫຼັກ 4 ເມືອງສີສັດຕະນາກ ມີຄວາມຍາວປະມານ 0,97 ກິໂລແມັດ ແລະກໍ່ສ້າງລະບົບ ປ້ອງກັນຕະຝັ່ງບໍ່ໃຫ້ມີການເຊາະເຈື່ອນມີຄວາມຍາວທັງໝົດ 8,36 ກິໂລແມັດ ຈາກຫຼັກ 4 ຫາ ບ້ານຫາດດອກແກ້ວ, ເມືອງຫາດຊາຍຟອງ.

2). ກໍ່ສ້າງສວນສາທາລະນະຢູ່ເຂດບ້ານແກ້ງຍາງໃຫ້ເຊື່ອມຈອດກັນໄດ້ລະຫວ່າງໂຄງການໄລຍະທີ I ແລະທີ II ຈົນຮອດບ້ານ ຫາດດອກແກ້ວ, ເມືອງຫາດຊາຍ ຟອງໃນເນື້ອທີ່ປະມານ 4 ເຮັກຕາ ຊຶ່ງປະກອບດ້ວຍ: ເສັ້ນທາງຍ່າງ ຊົມວີວ ແລະຊົມຕາເວັນຕົກດິນ, ສວນກີລາກາງແຈ້ງ ແລະຈຸດທ່ອງທ່ຽວທໍາມະຊາດທີ່ເຊື່ອມຈອດກັບຕົວເມືອງໄດ້.

3). ຍົກລະດັບເສັ້ນທາງຕາມຄູປ້ອງກັນນໍ້າຖ້ວມໃນໂຄງການໄລ ຍະທີ I ແຕ່ບ້ານອຸໂມງ ຫາ ບ້ານເກົ້າລ້ຽວ, ເມືອງສີໂຄດຕະບອງ, ມີຄວາມຍາວ 4,4 ກິໂລແມັດ ລຽບຕາມແຄມຂອງ.

4). ກໍ່ສ້າງເສັ້ນທາງຍ່າງຊົມທໍາມະຊາດ ແລະອອກກໍາລັງກາຍລຽບຕາມແຄມຂອງຈາກຫຼັກ 3 ຫາຫຼັກ 4 ເມືອງສີສັດຕະນາກ ມີຄວາມຍາວປະມານ 0,97 ກິໂລແມັດ ເພື່ອເຊື່ອມກັບໂຄງການໄລຍະທີ I.

 

แชร์