ໃຊ້ 456 ຕື້ກີບ ສ້າງເຂື່ອນຫ້ວຍລຳພັນຕອນລຸ່ມ

ຂ່າວ: ແກ້ວໄຊຍະວົງ

 ວັນທີ 23 ກໍລະກົດຜ່ານມາ, ທ່ານ ສົມສະຫວາດ ເລັ່ງສະຫວັດ ອາດີດຮອງນາຍົກລັດຖະມົນຕີໄດ້ເຄື່ອນໄຫວຢ້ຽມຢາມໂຄງການເຂື່ອນໄຟຟ້າຫ້ວຍລໍາພັນຕອນລຸ່ມໂດຍມີທ່ານ ເຫຼັກໄຫຼ ສີວິໄລ ເລຂາພັກແຂວງເຈົ້າແຂວງເຊກອງ,ທ່ານ ແພງສີ ສີລາວີ ຄະນະປະຈໍາພັກແຂວງ, ຮອງປະທານສະພາປະຊາຊົນແຂວງ,ທ່ານ ຂັນຕີ ສີລະວົງສາ ຄະນະປະຈຳພັກແຂວງ, ຮອງເຈົ້າແຂວງເຊກອງ, ຄະນະນໍາຂອງແຂວງ ແລະພາກສ່ວນກ່ຽວຂ້ອງເຂົ້າຮ່ວມ.

    ໂອກາດດັ່ງກ່າວ, ທ່ານ ບຸນໂຮມ ຜິວລາລິນ ຫົວໜ້າໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມໄດ້ລາຍງານໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມຕັ້ງຢູ່ບ້ານລະວີລໍາພັນ, ເມືອງລະມາມ, ແຂວງເຊກອງເປັນປະເພດເຂື່ອນດິນໜຽວມີລວງຍາວ 492 ແມັດ, ສູງ 55 ແມັດ, ສັນເຂື່ອນກວ້າງ 5 ແມັດ ໃນລະດັບສູງ 202 masl ທໍ່ສົ່ງ (Hea frace tunnel) ມີຂະໜາດເສັ້ນຜ່າສູນກາງ 3.2x 3.2 ແມັດ ມີຄວາມຍາວທັງໝົດ 187,22 ma sl ຊຶ່ງມີກໍາລັງ ຕິດຕັ້ງ 15 ເມກາວັດ, ມີເຄື່ອງຈັກ 2 ໜ່ວຍ, ໜ່ວຍລະ 7,5 ເມກະວັດ ຕາມການອອກແບບສາມາດຜະລິດກະແສໄຟຟ້າໄດ້ 68.31 ຈີກາວັດ ໂມງຕໍ່ປີ Plan factor 51,98% ລະບົບສາຍສົ່ງເປັນລະບົບວົງຈອນດຽວມີຄວາມຍາວ 10 ກີໂລແມັດ, ມີມູນຄ່າການກໍ່ສ້າງທັງໝົດ 48 ລ້ານກວ່າໂດລາສະຫະລັດ, ເລີ່ມລົງມືກໍ່ສ້າງມາແຕ່ເດືອນຕຸລາ 20217 ແລະຄາດຄະເນຈະສໍາເລັດ 100% ໃນທ້າຍປີ 2021 ຊຶ່ງປະຈຸບັນແມ່ນໄດ້ຜະລິດພະລັງງານສົ່ງເຂົ້າລະບົບຂອງໄຟຟ້າລາວທີ່ສະຖານີໜອງບົງແລ້ວ.

  ທ່ານ ບຸນໂຮມ ຜິວລາລິນ ໃຫ້ຮູ້ອີກວ່າ: ໂຄງການກໍ່ສ້າງເຂື່ອນໄຟຟ້າຫ້ວຍລໍາພັນຕອນລຸ່ມແມ່ນໜຶ່ງໃນບັນດາໂຄງການບູລິມະສິດອັນສຳຄັນຂອງລັດຖະບານກໍ່ຄືແຂວງເຊກອງ ແລະຈະເປັນການປະກອບສ່ວນຕໍ່ການພັດທະນາເສດຖະກິດ-ສັງຄົມຂອງແຂວງເຊກອງໃຫ້ກ້າວໜ້າຂຶ້ນກວ່າເກົ່າໂດຍຫົວໜ້າໂຄງການເຊື່ອວ່າໂຄງການນີ້ຈະເປັນສ່ວນທີ່ຊ່ວຍສ້າງພື້ນຖານເສດຖະກິດທີ່ເຂັ້ມແຂງສໍາລັບການພັດທະນາແບບຍືນຍົງຂອງ ສປປ ລາວ ກໍ່ຄືແຂວງເຊກອງໃນການຫຼຸດພົ້ນອອກຈາກຄວາມທຸກຍາກເທື່ອລະກ້າວ.

แชร์