ທຫລ ເຜີຍແຜ່ກຽມພ້ອມໃຫ້ທະນາຄານທຸລະກິດ

     ໃນວັນທີ 27 ກໍລະກົດ 2021 ທີ່ສະຖາບັນທະນາຄານ, ນະຄອນຫຼວງວຽງຈັນ ທະນາຄານແຫ່ງ ສປປ ລາວ (ທຫລ) ໄດ້ຈັດ ຕັ້ງການແຜີຍແຜ່ການຈັດຕັ້ງປະຕິບັດການລາຍງານການເງິນຕາມມາດຕະຖານສາກົນ“IFRS” ໂດຍພາຍໃຕ້ການເປັນປະທານຂອງ ທ່ານ ນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ, ມີຜູ້ຕາງໜ້າຈາກທະນາຄານທຸລະກິດລັດ, ລັດຮຸ້ນສ່ວນ, ທະນາຄານເອກະຊົນ, ສາຂາຕ່າງປະເທດ ແລະບໍລິສັດກວດສອບພາຍນອກເຂົ້າຮ່ວມ.

   ກອງປະຊຸມຄັ້ງນີ້ເພື່ອເຜີຍແຜ່ແຈ້ງການຂອງຜູ້ວ່າການທະນາຄານແຫ່ງ ສປປ ລາວ ກ່ຽວກັບການຈັດຕັ້ງປະຕິບັດການລາຍງານການເງິນຕາມມາດຕະຖານສາກົນ ໃຫ້ແກ່ບັນດາທະນາຄານທຸລະກິດ ແລະສະຖາບັນການເງິນທີ່ບໍ່ແມ່ນທະນາຄານຈັດຕັ້ງປະຕິບັດການລາຍງານການເງິນຕາມມາດຕະຖານສາກົນສອດຄ່ອງກັບຄວາມ ເປັນຈິງ; ໃນນັ້ນ, ທະນາຄານແຫ່ງ ສປປ ລາວ ໄດ້ເນັ້ນໜັກໃຫ້ທະນາຄານທຸລະກິດກະກຽມຄວາມພ້ອມຂອງ IFRS ແຕ່ປີ 2021-2025 ແລະ ໃນປີ 2026 ສາມາດເລີ່ມຕົ້ນການລາຍງານການເງິນຕາມມາດຕະຖານໃຫ້ໄດ້ຢ່າງສົມບູນ; ພ້ອມນັ້ນ, ກໍ່ສ້າງບົດວິເຄາະຊ່ອງວ່າງການຈັດຕັ້ງປະຕິບັດການລາຍງານການເງິນຕາມມາດຕະຖານສາກົນມາຍັງທະນາຄານແຫ່ງ ສປປ ລາວ ພາຍໃນປີ 2021 ແລະສ້າງແຜນລະອຽດກ່ຽວກັບການຂ້າມຜ່ານໄປສູ່ການຈັດຕັ້ງປະຕິບັດການລາຍງານການເງິນຕາມມາດຕະຖານສາກົນແບບເຕັມຮູບແບບຂອງຕົນໃນຕົ້ນປີ 2022 ລວມທັງລາຍງານຄວາມຄືບໜ້າການຈັດຕັ້ງປະຕິບັດຕາມແຜນຂອງຕົນເປັນປະຈໍາໄຕມາດມາຍັງທະນາຄານແຫ່ງ ສປປ ລາວ.

    ການເງິນຕາມມາດຕະຖານສາກົນ International Financial Reporting Standar “IFRS” ແມ່ນເປັນມາດຕະຖານທີ່ສາກົນໃຫ້ການຍອມຮັບຊຶ່ງມີບົດບາດສໍາຄັນໃນການໃຫ້ບັນດາຫົວໜ່ວຍທຸລະກິດມີການເຄື່ອນໄຫວມີປະສິດທິພາບ ແລະໂປ່ງໃສຕໍ່ສັງຄົມ, ສໍາລັບຢູ່ ສປປ ລາວ, ກົດໝາຍວ່າດ້ວຍການບັນຊີກໍ່ໄດ້ກໍານົດໃຫ້ວິສາຫະກິດທີ່ຮັບໃຊ້ຜົນປະໂຫຍດສາທາລະນະຕ້ອງປະຕິບັດຕາມມາດຕະຖານ IFRS ຊຶ່ງບັນດາທະນາຄານທຸລະກິດ ແລະສະຖາບັນການເງິນກໍ່ຖືເປັນວິສາຫະ ກິດໜຶ່ງທີ່ຮັບໃຊ້ຜົນປະໂຫຍດສາທາລະນະຊຶ່ງໃນປີ 2017 ກະຊວງການເງິນໄດ້ອອກແຈ້ງການກ່ຽວກັບການປະຕິບັດມາດຕະຖານ IFRS ໂດຍກໍານົດໃຫ້ວິສາຫະກິດທີ່ຮັບໃຊ້ຜົນປະໂຫຍດສາທາລະນະໃດທີ່ສາມາດປະຕິບັດໄດ້ໃນປີ 2017 ແມ່ນໃຫ້ປະຕິບັດໄດ້ເລີຍ, ສ່ວນວິສາຫະກິດທີ່ຮັບໃຊ້ຜົນປະໂຫຍດສາທາລະນະທີ່ຍັງບໍ່ທັນມີຄວາມພ້ອມໃນການປະຕິບັດໃນປີ 2017 ແມ່ນໃຫ້ວາງແຜນຈັດຕັ້ງປະຕິບັດໃຫ້ໄດ້ພາຍໃນປີ 2021.

  ນາງ ວັດທະນາ ດາລາລອຍ ກ່າວວ່າ: ຜ່ານການຈັດຕັ້ງປະຕິບັດຕົວຈິງຍັງມີຄວາມຫຍຸ້ງຍາກໃນການຈັດຕັ້ງປະຕິບັດຕົ້ນຕໍແມ່ນຄວາມຮັບຮູ້ເຂົ້າໃຈກ່ຽວກັບມາດຕະ ຖານ IFRS ຍັງບໍ່ທັນເລິກເຊິ່ງ, ໂຄງລ່າງພື້ນຖານທາງດ້ານລະບົບ IT ຍັງບໍ່ທັນມີຄວາມພ້ອມ, ນິຕິກໍາຈໍານວນໜຶ່ງຍັງບໍ່ທັນສອດຄ່ອງກັນ ແລະອື່ນໆ ເຮັດໃຫ້ທະນາ ຄານທຸລະກິດ ແລະສະຖາບັນການເງິນຈຳນວນໜຶ່ງຍັງພົບຄວາມຫຍຸ້ງຍາກ ແລະບໍ່ສາມາດປະຕິບັດໄດ້ຕາມກໍານົດເວລາດັ່ງກ່າວ, ດັ່ງນັ້ນ, ໃນປີ 2020 ກະຊວງການເງິນ ຈຶ່ງ ໄດ້ອອກແຈ້ງການຂະຫຍາຍເວລາຕື່ມອີກ 5 ປີ ຮອດປີ 2025 ແລະໃຫ້ເລີ່ມຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນແບບເຕັມສ່ວນ (Full IFRSs) ນັບແຕ່ປີ 2026 ເປັນຕົ້ນໄປ, ອີງໃສ່ແຈ້ງການຂອງກະຊວງການເງິນດັ່ງກ່າວ ທຫລ ກໍ່ໄດ້ມີແຈ້ງການກ່ຽວກັບການຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນ IFRS ຂອງຂະແໜງການທະນາຄານ ສະບັບເລກທີ 99/ທຫລ, ລົງວັນທີ 14 ກໍລະກົດ 2021.

แชร์