ລັດ ແລະນັກທຸລະກິດຫາລືຄັ້ງທີ 13

  ວັນທີ 28 ກໍລະກົດ 2021 ທີ່ຫໍປະຊຸມແຫ່ງຊາດກະຊວງອຸດສາຫະກໍາ ແລະການຄ້າ ແລະສະພາການຄ້າ ແລະອຸດສາຫະກໍາແຫ່ງຊາດລາວ (ສຄອຊ) ໄດ້ຈັດກອງປະຊຸມທຸລະກິດລາວ ຄັ້ງທີ 13 ໄດ້ຈັດຂຶ້ນຢ່າງເປັນທາງການເພື່ອປຶກສາຫາລືກ່ຽວກັບຄວາມຄືບໜ້າໃນການແກ້ໄຂບັນຫາຂໍ້ຫຍຸ້ງຍາກຕ່າງໆ ທີ່ພາກທຸລະກິດປະສົບ ແລະ ແຜນການຂອງລັດຖະບານໃນການປັບປຸງສະພາບແວດລ້ອມການດໍາເນີນທຸລະກິດໃນ ສປປ ລາວ ໂດຍພາຍໃຕ້ການເປັນປະທານຂອງ ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ,ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ,ລັດຖະມົນຕີກະຊວງແຜນການ ແລະການລົງທຶນ,ທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະການຄ້າທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ມີຜູ້ຕາງໜ້າຈາກພາກທຸລະກິດ, ພາກລັດຖະບານ, ອົງການຈັດຕັ້ງສາກົນ ແລະຄູ່ຮ່ວມພັດທະນາເຂົ້າຮ່ວມ.

   ທ່ານ ອຸເດດ ສຸວັນນະວົງ ກ່າວວ່າ: ດັ່ງທີ່ທ່ານຮູ້ນໍາກັນແລ້ວວ່າການລະບາດຂອງພະຍາດໂຄວິດ-19 ໄດ້ເຮັດໃຫ້ເສດຖະກິດຂອງ ສປປ ລາວ ໄດ້ທົດຖອຍລົງຫຼາຍ ໃນປີ 2020 ເຮັດໃຫ້ອັດຕາຂະຫຍາຍຕົວຂອງເສດຖະກິດຫຼຸດລົງຢູ່ໃນລະດັບ 0,5%, ມີຫຼາຍຂະແໜງການເສດຖະກິດທີ່ໄດ້ຮັບຜົນກະທົບທີ່ແຕກຕ່າງກັນເຮັດໃຫ້ ພາກທຸລະກິດ ແລະ ການຈ້າງງານໄດ້ສູນເສຍຫຼາຍໂດຍສະເພາະໃນຂະແໜງການທ່ອງທ່ຽວ ແລະ ການບໍລິການປິ່ນອ້ອມການທ່ອງທ່ຽວ ແລະ ບັນດາຂະແໜງການຜະລິດ, ເນື່ອງຈາກມາດຕະການຈໍາກັດການເດີນທາງ ແລະການເພີ່ມຄວາມລະມັດລະວັງຕໍ່ການແຜ່ລະບາດຂອງພະຍາດຕໍ່ບຸກຄົນ, ຕົວເລກການສໍາຫຼວດຜົນກະທົບຂອງການລະບາດຂອງໂຄວິດ-19 ໂດຍຫຼາຍສະຖາບັນທັງພາຍໃນ ແລະຕ່າງປະເທດໄດ້ຊີ້ແຈ້ງວ່າເກືອບ 80% ຂອງທຸລະກິດໄດ້ຖືກກະທົບບໍ່ຫຼາຍກໍ່ໜ້ອຍຕໍ່ສະພາບ ການດັ່ງກ່າວ. ໃນນັ້ນ,ຂະແໜງການທີ່ຖືກກະທົບຫຼາຍກວ່າໝູ່ຄືທ່ອງທ່ຽວ, ຂົນສົ່ງ ແລະການຜະລິດປຸງແຕ່ງໄດ້ມີຫຼາຍກິດຈະການທຸລະກິດທີ່ຖືກປິດແບບຖາວອນ ຫຼືເຄື່ອນໄຫວບໍ່ເຕັມເມັດເຕັມໜ່ວຍໃນປີ 2020, ມີ 15% ຂອງແຮງງານໄດ້ສູນເສຍວຽກເຮັດງານທໍາພ້ອມກັນນັ້ນຈໍານວນເງິນສົ່ງກັບບ້ານຈາກແຮງງານລາວຢູ່ຕ່າງປະເທດໄດ້ຫຼຸດລົງຊຶ່ງໄດ້ເພີ່ມຄວາມຫຍຸ້ງຍາກໃຫ້ຄອບຄົວຈໍານວນຫຼາຍທີ່ເພິ່ງພາອາໄສຈາກລາຍຮັບດັ່ງການ, ນອກຈາກນັ້ນການລະບາດຂອງພະຍາດໂຄວິດ-19 ຍັງໄດ້ເຮັດໃຫ້ລັດຖະບານປະສົບຄວາມຫຍຸ້ງຍາກດ້ານງົບປະມານຫຼາຍຍິ່ງຂຶ້ນໂດຍສະເພາະດ້ານການເກັບລາຍຮັບດ້ານພາສີອາກອນ ແລະອື່ນໆ ທີ່ເນື່ອງມາຈາກການຫຼຸດຜ່ອນຂອງກິດຈະການທຸລະກິດ ແລະການຈັດຕັ້ງບັນດານະໂຍບາຍຜ່ອນຜັນເພື່ອຊ່ວຍເຫຼືອພາກທຸລະກິດ ແລະສັງຄົມ.

   ທະນາຄານໂລກຄາດຄະເນການເພີ່ມຂຶ້ນຂອງອັດຕາການຂະຫຍາຍຕົວເສດຖະກິດເທົ່າ 3,6% ຈາກ 0,5% ໃນປີ 2021 ຂະແໜງການກະສິກໍາເປັນຂະແໜງທີ່ນໍາໜ້າຂອງການຂະຫຍາຍຕົວດ້ານເສດຖະກິດຍ້ອນຄວາມຕ້ອງການທີ່ເພີ່ມຂຶ້ນຂອງຕະຫຼາດພາຍໃນ, ການຫຼຸດຜ່ອນການນໍາເຂົ້າຜະລິດຕະພັນກະສິກໍາຈາກຕ່າງປະເທດ ແລະຄວາມຄົງຕົວໃນການສົ່ງອອກຜະລິດຕະພັນກະສິກໍາຕາມສັນຍາໃຫ້ແກ້ປະເທດໃກ້ຄຽງໂດຍສະເພາະແມ່ນພືດລະດູແລ້ງ ແລະຜະລິດຕະພັນອື່ນໆ, ໃນປີ 2021 ມີ ຫຼາຍອຸດສາຫະກໍາທີ່ໄດ້ຟື້ນຕົວຂຶ້ນເຊັ່ນ: ດ້ານພະລັງງານ, ບໍ່ແຮ່, ອຸດສາຫະກໍາປຸງແຕ່ງເພື່ອສົ່ງອອກ.

    ທ່ານ ນາງ ວາລີ ເວດສະພົງ ໃຫ້ຮູ້ວ່າ: ການຈັດກອງປະຊຸມໃນຄັ້ງນີ້ເພື່ອປຶກສາຫາລືກ່ຽວກັບຄວາມຄືບໜ້າໃນການແກ້ໄຂບັນຫາຂໍ້ຫຍຸ້ງຍາກຕ່າງໆທີ່ພາກທຸລະ ກິດໄດ້ປະເຊີນຢູ່ ແລະແຜນການຂອງລັດຖະບານໃນການປັບປຸງສະພາບແວດລ້ອມຂອງການດຳເນີນທຸລະກິດໃນລາວໃນນັ້ນຈະສືບຕໍ່ປຶກສາຫາລືມີທັງໝົດ 31 ບັນຫາ ຊຶ່ງໄດ້ແຍກອອກເປັນ 7 ກຸ່ມຄື: ກຸ່ມບັນຫາທີ່ຕິດພັນກັບການເລີ່ມທຸລະກິດ, ກຸ່ມບັນຫາທີ່ຕິດພັນກັບການ ອໍານວຍຄວາມສະດວກດ້ານການຄ້າ, ກຸ່ມບັນຫາທີ່ຕິດພັນກັບການເຂົ້າເຖິງອແຫຼ່ງທຶນ, ກຸ່ມບັນຫາທີ່ຕິດພັນກັບການຈັດຕັ້ງປະຕິບັດກົດລະບຽບສະເພາະ, ກຸ່ມບັນຫາສະເພາະຂອງຂະແໜງການບໍລິການດ້ານການເງິນ ແລະກຸ່ມບັນຫາສະເພາະຂອງຂະແໜງການກະສິກໍາ.

แชร์