ເມືອງພີນ 3 ຄົນ ພ້ອມຢາບ້າເກືອບ 12 ພັນເມັດ

  ໃນວັນທີ 23 ກໍລະກົດຜ່ານມາ, ທາງເຈົ້າໜ້າທີ່ຕຳຫຼວດສະກັດກັ້ນ ແລະຕ້ານຢາເສບຕິດເມືອງພີນໄດ້ລາຍງານໃຫ້ຮູ້ວ່າ: ໃນວັນທີ 11 ກໍລະກົດ 2021 ມີພົນລະເມືອງດີໂທມາແຈ້ງໃຫ້ເຈົ້າໜ້າທີ່ວ່າມີຄົນບໍ່ດີກຳລັງເຄື່ອນໄຫວຄ້າຂາຍຢາເສບຕິດ (ຢາບ້າ) ແລະມົ້ວສຸມຢາເສບຕິດຢູ່ບ້ານພີນ, ເມືອງພີນ, ແຂວງສະຫວັນນະເຂດຈຶ່ງໄດ້ສົມທົບກັບເຈົ້າໜ້າທີ່ຕໍາຫຼວດບໍລິການປະຊາຊົນ (ປກສ ກຸ່ມບ້ານທີ 4) ແລະແຕ່ງຕັ້ງພະນັກງານລົງສັນລະສູດແຫຼ່ງຂ່າວຢູ່ທີ່ຢູ່ຈຸດດັ່ງກ່າວເຫັນວ່າມີມູນຄວາມຈິງແທ້.

   ພໍມາຮອດເວລາປະມານ 12:05 ໂມງ ຂອງວັນດຽວກັນຈຶ່ງໄດ້ນໍາກຳລັງເຂົ້າກັກຕົວເປົ້າໝາຍ 1 ຄົນ ຊື່ທ້າວ ລໍາ ອາຍຸ 19 ປີ,ອາຊີບເຮັດນາ, ຢູ່ບ້ານມະລົວ,ເມືອງພີນ ພ້ອມຂອງກາງຢາບ້າ ຈໍານວນ 9.000 ເມັດ ໂທລະສັບ 1 ເຄື່ອງ, ເງິນກີບທະນາຄານ 11,8 ລ້ານກີບ ແລະລົດຈັກສີດຳ 1 ຄັນ.

   ຈາກນັ້ນທາງເຈົ້າໜ້າທີ່ວິຊາສະເພາະຈຶ່ງໄດ້ຂະຫຍາຍຜົນຈັບກຸມ, ມາຮອດເວລາປະມານ 12 ໂມງ ຂອງວັນດຽວກັນຈຶ່ງສາມາດກັກຕົວ ທ້າວ ລັ່ງ ອາຍຸ 41 ປີ, ອາຊີບເຮັດນາ, ບ້ານນາທະລັງ, ເມືອງພີນ ພ້ອມຂອງກາງຢາບ້າ 1.807 ເມັດ ແລະອີກ 5 ຊົ່ວໂມງຕໍ່ມາໄດ້ເຂົ້າກັກຕົວ ເປົ້າໝາຍອີກຄົນຊື່ ທ້າວ ພູເງິນ ອາຍຸ 26 ປີ, ອາຊີບເຮັດນາ, ບ້ານອຸດົມໄຊ, ເມືອງພີນ, ພ້ອມຂອງກາງຢາບ້າ 572 ເມັດ.

   ຕໍ່ກັບຄະດີດັ່ງກ່າວທາງເຈົ້າໜ້າທີ່ວິຊາສະເພາະຈຶ່ງນຳຕົວຜູ້ກ່ຽວທັງ 3 ຄົນ ພ້ອມຂອງກາງຢາບ້າຈຳນວນດັ່ງກ່າວມາດຳເນີນການສືບສວນ-ສອບສວນ ຕາມຂັ້ນຕອນຂອງກົດໝາຍຕໍ່ໄປ.

แชร์