ເຄິ່ງປີ ໄຊຍະມ້າງຄະດີຢາເສບຕິດ 130 ລາຍ

ຂ່າວ-ພາບ: ອຸ່ນເຮືອນ ໂພທິລັກ

  ທ່ານ ພັອ ຄໍາແພງ ເພັດ ຫົວໜ້າກອງບັນຊາການປ້ອງກັນຄວາມສະຫງົບ (ປກສ) ແຂວງໄຊຍະບູລີ ໃຫ້ຮູ້ວ່າ: ບັນຫາຢາເສບຕິດປະຈຸບັນໄດ້ກາຍເປັນໄພອັນຕະລາຍຮ້າຍແຮງຂົ່ມຂູ່ຕໍ່ການພັດທະນາເສດຖະກິດ-ສັງຄົມ ກໍ່ຄືຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະປອດໄພຂອງສັງຄົມ, ມັນຍັງໄດ້ກົດໜ່ວງທ່ວງດຶງການສ້າງສາພັດທະນາເສດຖະກິດ-ສັງຄົມຂອງປະເທດຊາດເວົ້າລວມ, ເວົ້າສະເພາະແມ່ນຢູ່ ແຂວງໄຊຍະບູລີ ຊຶ່ງໄດ້ສ້າງຜົນເສຍຫາຍມາສູ່ຄອບຄົວ ແລະ ຄົນຮຸ່ນສືບທອດ, ທັງກໍ່ໃຫ້ເກີດມີອາດຊະຍາກໍາປະເພດຕ່າງໆ. 

   ຕໍ່ກັບສະພາບການດັ່ງກ່າວຄະນະພັກກອງບັນຊາການ ປກສ ແຂວງແມ່ນໄດ້ຍົກສູງຄວາມຮັບຜິດຊອບໂດຍໄດ້ຖືເອົາວຽກງານສະກັດກັ້ນເປັນບັນຫາກົກ, ໃນນັ້ນໄດ້ເລັ່ງໃສ່ການໂຄສະນາເຜີຍແຜ່ບັນດາແນວທາງ, ລະບຽບກົດໝາຍ, ນິຕິກໍາຕ່າງໆໃຫ້ນັກຮຽນ-ນັກສຶກສາຢູ່ບັນດາໂຮງຮຽນ, ພ້ອມນັ້ນກໍ່ໄດ້ໂຄສະນາໃຫ້ປະຊາຊົນຮັບຮູ້, ເຂົ້າໃຈຕໍ່ຜົນຮ້າຍ ແລະຄວາມອັນຕະລາຍຂອງຢາເສບຕິດພ້ອມທັງໃຫ້ການຮ່ວມມືໃນການສະໜອງຂໍ້ມູນຕໍ່ເຈົ້າໜ້າທີ່ວິຊາສະເພາະກ່ຽວກັບບຸກຄົນທີ່ເຄື່ອນໄຫວຄ້າ-ຂາຍເສບຢາເສບຕິດ.

   ສະແດງອອກໃນ 6 ເດືອນຕົ້ນປີ 2021 ສາມາດມ້າງຄະດີຢາເສບຕິດຢູ່ພາຍໃນແຂວງໄດ້ທັງໝົດ 130 ລາຍ, ກັກຕົວຜູ້ຖືກຫາໄດ້ 147 ຄົນ ຍິງ 20 ຄົນ, ຢຶດຂອງກາງໄດ້: ຢາບ້າ 892.686 ເມັດ, ຢາຝິ່ນ 467,2 ກຣາມ, ເງິນກີບ 176,66 ລ້ານກີບ, ເງິນບາດ 9,41 ພັນບາດ, ໂທລະສັບມືຖື 121 ເຄື່ອງ, ລົດຈັກ 39 ຄັນ, ລົດໃຫຍ່ 1 ຄັນ ແລະວັດຖຸຂອງກາງອື່ນໆອີກຈໍານວນໜຶ່ງ, ພົ້ນເດັ່ນແມ່ນການແກ້ໄຂບັນຫາຢາເສບຕິດຕາມຊາຍແດນລະຫວ່າງລາວ-ໄທສາມາດເກັບກູ້ຂອງກາງຢາເສບຕິດໄດ້ ຈໍານວນ 8 ແສນເມັດ. 

แชร์