ເອັສເອັມອີ 10 ຫົວໜ່ວຍຢູ່ຫຼວງພະບາງເຂົ້າເຖິງທຶນດອກເບ້ຍ 3%

ຂ່າວ: ສີສຸວັນ

 ພະແນກອຸດສາຫະກໍາ ແລະການຄ້າແຂວງຫຼວງພະບາງ ໄດ້ຈັດຝຶກອົບຮົມເພື່ອຍົກລະດັບຄວາມຮູ້ການຂຽນແຜນທຸລະກິດ, ການວາງແຜນການເງິນ ແລະການບັນຊີ ເງິນສົດໃຫ້ແກ່ຫົວໜ່ວຍທຸລະກິດຂະໜາດນ້ອຍແລະຂະຫນາດກາງ (SME) ຂຶ້ນໃນວັນທີ 26 ກໍລະກົດ 2021 ທີ່ຫ້ອງປະຊຸມຂອງພະແນກດັ່ງກ່າວໂດຍການເປັນ ປະທານຂອງ ທ່ານ ບຸນສົມ ຄຸນມະນີ ຫົວໜ້າພະແນກອຸດສາຫະກໍາ ແລະການຄ້າແຂວງ, ມີຄູຝຶກ, ຄະນະທີມງານຄູ-ອາຈານ ທີ່ມາຈາກນະຄອນຫຼວງວຽງຈັນພ້ອມ ດ້ວຍຕາງໜ້າຈາກທຸລະກິດເຂົ້າຮ່ວມ.

  ທ່ານ ບຸນສົມ ຄຸນມະນີ ຫົວໜ້າພະແນກອຸດສາຫະກໍາ ແລະການຄ້າແຂວງກ່າວວ່າ: ຊຸດຝຶກອົບຄັ້ງນີ້ແມ່ນມີບົດບາດສໍາຄັນຕໍ່ການພັດທະນາເສດຖະກິດ-ສັງຄົມໂດຍສະເພາະແມ່ນການຜະລິດສິນຄ້າ, ການຄ້າ ແລະການບໍລິການປະກອບສ່ວນເຂົ້າໃນການສ້າງວຽກເຮັດງານທໍາ, ສ້າງລາຍຮັບໃຫ້ແກ່ປະຊາຊົນບັນດາເຜົ່າ ແລະຍົກສູງຊີວິດການເປັນຢູ່ຂອງປະຊາຊົນກໍ່ຄືການສ້າງປະຖົມປັດໄຈໃຫ້ແກ່ການຫັນເປັນອຸດສາຫະກໍາ ແລະທັນສະໄໝເທື່ອລະກ້າວ.

  ອີກດ້ານໜຶ່ງກໍ່ເພື່ອຜັນຂະຫຍາຍມາດຕາ 15 ຂອງດໍາລັດວ່າດ້ວຍກອງທຶນສົ່ງເສີມ SME ສະບັບເລກທີ 299/ລບ ແລະຜັນຂະຫຍາຍແຜນພັດທະນາວິສາຫະກິດນ້ອຍ ແລະກາງ ໃນການສ້າງບັນດາເງື່ອນໄຂທີ່ຈໍາເປັນໃຫ້ວິສາຫະກິດຂະນາດນ້ອຍ ແລະກາງສາມາດເຂົ້າເຖິງແຫຼ່ງທຶນໄດ້ຫຼາຍຂຶ້ນ.

  ທ່ານກ່າວຕື່ມວ່າມາເຖິງປະຈຸບັນຢູ່ແຂວງຫຼວງພະບາງມີຫົວໜ່ວຍວິສາຫະກິດຂະໜາດນ້ອຍ ແລະຂະໜາດກາງທີ່ມີເງື່ອນໄຂເຂົ້າຫາແຫຼ່ງທຶນເງິນກູ້ດອກເບ້ຍ 3% ແລະໄດ້ຮັບການປ່ອຍກູ້ຈາກທະນາຄານແລ້ວມີຈໍານວນທັງໝົດ 10 ຫົວໜ່ວຍ, ມີ 11 ສັນຍາ, ມີມູນຄ່າ 11.420 ລ້ານກີບ, ແລະ ໃນວັນທີ 14 ກໍລະກົດ ຜ່ານມານີ້ທາງກອງທຶນສົ່ງເສີມ SMEs ໄດ້ເຊັນສັນຍາສະໜອງທຶນໃຫ້ແກ່ບັນດາທະນາຄານທຸລະກິດທີ່ເປັນຄູ່ຮ່ວມໂຄງການໃນມູນຄ່າ 94 ຕື້ກີບ ເພື່ອປ່ອຍກູ້ໃຫ້ແກ່ບັນດາ MSMEs ທີ່ມີເງື່ອນໄຂ.

    ພ້ອມດຽວກັນນີ້ທ່ານປະທານກອງປະຊຸມຍັງໄດ້ຮຽກຮ້ອງໃຫ້ນັກສໍາມະນາກອນຈົ່ງເອົາໃຈໃສ່ຮຽນຮູ້ ແລະຕິດຕາມຢ່າງໃກ້ສິດນໍາບັນດາອາຈານເພື່ອໃຫ້ກໍາໄດ້, ໃຫ້ເຂົ້າໃຈ ແລະນໍາເອົາບົດຮຽນທີ່ມີຄຸນຄ່ານີ້ນໍາໄປຈັດຕັ້ງປະຕິບັດຕົວຈິງເຂົ້າໃນວຽກງານທຸລະກິດໃຫ້ເກີດດອກອອກຜົນ. 

แชร์