ບໍ່ແກ້ວ ຕັ້ງເປົ້າ 2025 ຈະສ້າງໃຫ້ກາຍເປັນແຂວງຜະລິດສິນຄ້າກະສິກໍາສະອາດ

 ໂດຍ: ເງິນຫຼົງ ຈິດພູວົງ 

    ເພື່ອປະຕິບັດຕາມຄໍາຂວັນ “ຍົກສູງຄວາມສາມາດ, ບົດບາດການນໍາພາຂອງພັກຮັບປະກັນສະຖຽນລະພາບ ແລະ ຄວາມສະຫງົບປອດໄພ, ໃນການເສີມຂະຫຍາຍມູນເຊື້ອຄວາມສາມັກຄີທົ່ວປວງຊົນ, ສ້າງການຫັນປ່ຽນໃໝ່ທີ່ຕັ້ງໜ້າໃນການພັດທະນາເສດຖະກິດ-ສັງຄົມຕາມທິດສີຂຽວຍືນຍົງ” ດ້ວຍຄວາມຮັບຜິດຊອບສູງຕໍ່ໜ້າທີ່ການເມືອງທີ່ປະຊາຊົນມອບໝາຍໃຫ້.

  ອົງຄະນະພັກແຂວງບໍ່ແກ້ວ ຕ້ອງໄດ້ເອົາໃຈໃສ່ສູ້ຊົນຈັດຕັ້ງປະຕິບັດບັນດາຄາດໝາຍສູ້ຊົນ ແລະວຽກງານຈຸດສຸມແຕ່ລະດ້ານໃນ 5 ປີຕໍ່ໜ້າ (2021-2025) ດ້ານການຜະລິດເຂົ້າຈະສູ້ຊົນໃຫ້ບັນລຸໄດ້ 385.550 ໂຕນ; ການຜະລິດສິນຄ້າສົ່ງອອກໃຫ້ໄດ້ 196.608 ໂຕນ ແລະໝາກກ້ວຍຫອມໃຫ້ໄດ້  978.400 ໂຕນ, ຢາງພາລາ 114.900 ໂຕນ, ຊຶ່ງໄດ້ກໍານົດເອົາເຂດພັດທະນາກະສິກໍາຕາມທ່າແຮງຄວາມອາດສາມາດບົ່ມຊ້ອນທາງດ້ານທໍາມະຊາດໃຫ້ເປັນພື້ນຖານການພັດທະນາແບບຍືນຍົງສຸມໃສ່ການຜະລິດຊົມໃຊ້ພາຍໃນ ແລະສົ່ງອອກຕິດພັນກັບການປຸງແຕ່ງ ໄດ້ກໍານົດເອົາເຂດທົ່ງພຽງ (ທົ່ງງົວແດງ, ທົ່ງພ້າວຫ້າວ, ທົ່ງຜາອຸດົມ, ທົ່ງສິນອຸດົມ), ເຂດທົ່ງພຽງນ້ອຍ: ຈຽງຕອງ-ກ້ອນຕື່ນ, ນໍ້າຍູ້-ນໍ້າຄາ, ນໍ້າເມິງ-ຜາດຳ ແລະເຂດທົ່ງພຽງນ້ອຍຕາມລ້ອງຮ່ອມພູ; ສຸມໃສ່ການປູກເຂົ້າ, ໝາກເດືອຍ, ໝາກງາ, ໝາກອຶ, ມັນຕົ້ນ-ມັນດ້າງ, ໝາກໂມ, ປູກພືດຕະກູນຖົ່ວ, ພືດລົ້ມລຸກ, ພືດຜັກຕ່າງໆ, ລ້ຽງສັດນ້ອຍ ແລະປາໂດຍການຈັດຕັ້ງເປັນກຸ່ມ, ເປັນຟາມ, ເຂດພູດອຍແມ່ນສຸມໃສ່ລ້ຽງງົວ, ຄວາຍຕິດພັນກັບການປູກຫຍ້າຢູ່ບ້ານຫ້ວຍແສດເມືອງຜາອຸດົມ, ພູສະແຖນເມືອງປາກທາ, ເຂດນໍ້າຍູເມືອງເມິງເພື່ອສະໜອງພາຍໃນແນໃສຄໍ້າປະກັນສະບຽງອາຫານກັບທີ່ໃຫ້ກຸ້ມກິນ ແລະສົ່ງອອກ.

  ວຽກງານປ່າໄມ້ໃຫ້ໄດ້ຮັບການຄຸ້ມຄອງຕາມລະບຽບກົດໝາຍຕິດພັນກັບການຟື້ນຟູປ່າ, ສົ່ງເສີມການປູກຕົ້ນໄມ້ໃຫ້ຫຼາຍຊະນິດເປັນຕົ້ນ: ປູກຕົ້ນໄມ້ໃຫ້ໝາກ, ໄມ້ປະດັບ ແລະໄມ້ອຸດສາຫະກໍາໃຫ້ເພີ່ມຂຶ້ນເຮັດໃຫ້ອັດຕາການປົກຫຸ້ມປ່າໄມ້ກວມ 70% ໃນນັ້ນໄດ້ຊຸກຍູ້ສົ່ງເສີມການປູກຫວາຍຢູ່ເຂດປ່າຜະລິດຂອງບ້ານ ແລະສຸມໃສ່ເນື້ອທີ່ໄຮ່ດ້ວຍການຫັນມາປູກຕົ້ນແຂມ; ເພື່ອສົ່ງເສີມສ້າງສະພາບແວດລ້ອມທີ່ດີໃຫ້ແກ່ຜູ້ປະກອບການພາຍໃນ ແລະຕ່າງປະເທດໃຫ້ເຂົ້າມາລົງທຶນສ້າງຕັ້ງ ແລະພັດທະນາໂຮງງານອຸດສາຫະກຳ, ຫັດຖະກໍາປຸງແຕ່ງເຊັ່ນ: ໂຮງງານຂ້າສັດຄົບວົງຈອນ, ໂຮງງານສີເຂົ້າທັນສະໄໝ, ໂຮງງານປຸງແຕ່ງອາຫານເຄິ່ງສຳເລັດຮູບ, ເຄື່ອງດື່ມ ແລະອື່ນໆ.

   ສົ່ງເສີມການປູກຊາ ແລະການຂຸດຄົ້ນຊາທໍາມະຊາດຢູ່ເຂດເມືອງເມິງໂດຍຕິດພັນກັບການທ່ອງທ່ຽວໃນເຊີງອະນຸລັກ, ປຸງແຕ່ງແປຮູບເປັນຜະລິດຕະພັນຊາທີ່ມີຄຸນນະ ພາບຕາມມາດຕະຖານສາກົນໃຫ້ກາຍເປັນສິນຄ້າໜຶ່ງເມືອງໜຶ່ງຜະລິດຕະພັນ (ODOP) ການພັດທະນາອຸດສາຫະກໍາ ແລະຫັດຖະກໍາປຸງແຕ່ງໃຫ້ເຕີບໂຕຢ່າງມີຄຸນນະພາບຕາມທິດສີຂຽວ ແລະຍືນຍົງ “ເຊັ່ນວ່າ: ການຜະລິດພືດຜັກ, ເຂົ້າ, ໝາກໄມ້ການລ້ຽງສັດ ແລະການປະມົງຕິດພັບກັບອຸດສາ ຫະກໍາປຸງແຕ່ງ ແລະຫັນເປັນອຸດສາຫະກໍາທັນສະໄໝ, ການບໍລິການ-ການທ່ອງທ່ຽວ, ປະກອບສ່ວນສ້າງວຽກເຮັດງານທຳໃຫ້ແກ່ປະຊາຊົນກາຍເປັນຕ່ອງໂສ້ໃນການຂັບເຄື່ອນເສດຖະກິດຂອງ ແຂວງໃຫ້ມີທ່າຂະຫຍາຍຕົວ, ການລົງສໍາຫຼວດເຂດນິຄົມອຸດສາຫະກຳ 1 ແຫ່ງຢູ່ບ້ານດ່ານຖິ່ນ; ພັດທະນາທຸລະກິດຂະ ໜາດນ້ອຍ, ຂະໜາດກາງ (SME) ໃຫ້ມີຄຸນນະພາບດ້ວຍການຍົກລະດັບດ້ານການບໍລິຫານທຸລະກິດ, ເຂົ້າເຖິງການຕະຫຼາດ, ການເຂົ້າຫາແຫຼ່ງທຶນ, ດ້ານເຕັກນິກວິທະຍາສາດ, ນະວັດຕະກຳພູມປັນຍາ-ເຕັກໂນໂລຊີ, ການຫຸ້ມຫໍ່ ແລະຕິດກາໝາຍສິນຄ້າເພື່ອຍົກສູງຄຸນນະພາບຂອງສິນຄ້າ ແລະຄວາມອາດສາ ມາດໃນການແຂ່ງຂັນສົ່ງເສີມການລົງທຶນໃນເຂດ ແລະນິຄົມອຸດສາຫະກຳ; ເຮັດໃຫ້ມູນຄ່າສິນຄ້າສົ່ງອອກບັນລຸ 8% ຕໍ່ປີມູນຄ່າການຜະລິດອຸດສາຫະກໍາ, ຫັດຖະກໍາປຸງແຕ່ງເພີ່ມຂຶ້ນ 7,5% ຕໍ່ປີ, ມູນຄ່າສິນຄ້າຜ່ານແດນເພີ່ມຂຶ້ນສະເລ່ຍ 4% ຕໍ່ປີ ແລະມູນຄ່າຈໍລະຈອນສິນຄ້າເພີ່ມຂຶ້ນ 10% ຕໍ່ປີ.

   ເພື່ອເຮັດໃຫ້ແຜນການທີ່ວາງໄວ້ໄດ້ຮັບການຈັດຕັ້ງປະຕິບັດ ແລະມີຜົນສໍາເລັດໄດ້ນັ້ນ, ຄະນະພັກ, ຄະນະນຳ, ອົງການປົກຄອງທຸກຂັ້ນ, ຕ້ອງໄດ້ເປັນເຈົ້າການກຳ ແໜ້ນທັດສະນະ, ແນວທາງນະໂຍບາຍຂອງພັກແຜນພັດທະນາ, ລະບຽບກົດໝາຍຂອງລັດ, ກໍ່ຄືບັນດາຄາດໝາຍສູ້ຊົນທີ່ມະຕິກອງປະຊຸມໃຫຍ່ຄັ້ງທີ XI ສູນກາງພັກ, ມະຕິ VI ຂອງແຂວງວາງອອກ ເພື່ອຫັນເປັນແຜນການ, ແຜນງານ, ໂຄງການອັນລະອຽດຂອງແຕ່ລະຂະແໜງ, ເພີ່ມທະວີການສຶກສາອົບຮົມດ້ານການເມືອງ-ແນວຄິດໃຫ້ທຸກຊັ້ນຄົນໃນສັງຄົມມີຄວາມຕື່ນຕົວສູງ,ມີຄວາມສາມັກຄີເປັນເອກະພາບ,ທຸກພາກສ່ວນເສດຖະກິດ, ກຸ່ມການຜະລິດຜູ້ປະກອບການຕ່າງໆຕ້ອງໄດ້ປະກອບສ່ວນເຂົ້າໃນການລົງທຶນການພັດທະນາພື້ນຖານໂຄງລ່າງເສດຖະກິດ-ສັງຄົມການປູກຝັງລ້ຽງສັດຂອງປະຊາຊົນໃຫ້ຫຼາຍກວ່າເກົ່າຜ່ານການນຈັດຕັ້ງປະຕິບັດຕ້ອງມີ ການສະຫຼຸບຖອດຖອນບົດຮຽນ, ການຕິດຕາມ, ກວດກາ ແລະປະເມີນຜົນໄດ້ຮັບຖ້າພົບເຫັນມີບັນ ຫາຕ້ອງໄດ້ພ້ອມກັນຊອກຫາວິທີທາງແກ້ໄຂໃຫ້ທັນການເພື່ອແນໃສ່ເຮັດໃຫ້ແຜນວຽກແຕ່ລະດ້ານດໍາເນີນໄປດ້ວຍດີມີປະສິດທິພາບສາມາດຕອບສະໜອງໄດ້ຕາມລະດັບຄາດໝາຍທີ່ກຳນົດໄວ້ໃນແຕ່ລະໄລຍະແນໃສ່ສືບຕໍ່ພັດທະນາແຂວງບໍ່ແກ້ວໃຫ້ຫຼຸດພົ້ນອອກຈາກຄວາມທຸກຍາກ ແລະຍົກລະດັບຄຸນນະພາບຊິວິດຂອງປະຊາຊົນໃຫ້ສູງຂຶ້ນມີຄວາມຮັ່ງມີຜາສຸກ ແລະ ນຳເອົາຄວາມຢູ່ດີກິນດີທີ່ແທ້ຈິງມາສູ່ປະ ຊາຊົນບັນດາເຜົ່າຊາວແຂວງບໍ່ແກ້ວ. 

แชร์