ຖວທ ເມືອງສິງ ເຜີຍແຜ່ມາດຖານສ້າງກຸ່ມບ້ານວັດທະນະທຳ

  ຫ້ອງການຖະແຫຼງຂ່າວ-ວັດທະນະທຳ ແລະທ່ອງທ່ຽວ (ຖວທ) ເມືອງສິງລົງເຜີຍແຜ່ມາດຖານ, ເງື່ອນໄຂການສ້າງກຸ່ມບ້ານວັດທະນະທຳໃຫ້ກຸ່ມບ້ານນາຄຳ ເມືອງສິງ ແຂວງຫຼວງນໍ້າທາ ໃນວັນທີ 20 ກໍລະກົດ 2021 ນີ້ ຢູ່ທີ່ຫ້ອງການກຸ່ມບ້ານດັ່ງກ່າວໂດຍການນໍາພາຂອງທ່ານ ທອງວັນ ເລືອງຄໍາພາຫານ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງສິງ, ທ່ານ ໜານເຕດ ອ່ອນສະຫວັນ ເລຂາຄະນະພັກຮາກຖານກຸ່ມບ້ານນາຄຳມີຮອງເລຂາ, ຄະນະພັກຮາກຖານກຸ່ມບ້ານນາຍບ້ານ-ຮອງນາຍບ້ານ 7 ບ້ານທີ່ຂຶ້ນກັບກຸ່ມບ້ານນາຄຳ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ວົງ ຢ່າງ ຮອງຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງສິງໄດ້ຜ່ານມາດຖານ, ເງື່ອນໄຂທີ່ຈະສ້າງເປັນກຸ່ມບ້ານວັດທະນະທຳປະກອບມີ 5 ມາດຖານຄື: ຢູ່ແຕ່ລະບ້ານມີຄອບຄົວພັດທະນາສົມບູນແລ້ວ 70 ສ່ວນຮ້ອຍຂຶ້ນໄປທີ່ປະກາດເປັນບ້ານວັດທະນະທຳແລ້ວ,ຢູ່ແຕ່ລະບ້ານມີກິດຈະກຳການເຄື່ອນ ໄຫວຊີວິດວັດທະນະທຳທີ່ ໂດດເດັ່ນ ແລະປົກກະຕິຢູ່ແຕ່ລະບ້ານເອົາໃຈໃສ່ປົກປັກຮັກສາ ແລະພັດທະນາຮີດຄອງປະເພນີອັນດີງາມຂອງເຜົ່າຂອງທ້ອງຖິ່ນຂອງຕົນຢູ່ແຕ່ລະບ້ານມີຄວາມສະຫງົບສຸກທາງດ້ານການເມືອງມີຄວາມເປັນລະບຽບຮຽບຮ້ອຍທາງດ້ານສັງຄົມເປັນບ້ານປອດຄະດີ ແລະພື້ນຖານເສດຖະກິດຂອງແຕ່ລະບ້ານສາມາດກຸ້ມຢູ່ກຸ້ມກິນມີລັກສະນະກ້າວໜ້າເຂັ້ມແຂງ ແລະ3 ເງື່ອນໄຂປະກອບມີ: ບ້ານຢູ່ໄກ້ກັນ 3 ເຖິງ 5 ບ້ານຂຶ້ນໄປທີ່ສາມາດໄປມາຫາສູ່ກັນສະດວກສະບາຍພື້ນຖານເສດຖະກິດຂອງແຕ່ລະບ້ານມີລັກສະນະພັດທະນາຊີວິດການເປັນຢູ່ຂອງປະຊາຊົນດີມີຄອບຄົວຕົວແບບໃນການຜະລິດ ແລະຢູ່ແຕ່ລະບ້ານມີຂະບວນການຈັດຕັ້ງທີ່ເຂັ້ມແຂງ.

  ໂອກາດດັ່ງກ່າວທ່ານ ທອງວັນ ເລືອງຄໍາພາຫານ ໄດ້ຮຽກຮ້ອງໃຫ້ຄະນະພັກຮາກຖານກຸ່ມບ້ານ ແລະທຸກອົງການຈັດຕັ້ງບ້ານທຸກພາກສ່ວນເອົາໃຈໃສ່ຮ່ວມມືກັນໃນການສ້າງມາດຖານເງື່ອນໄຂໃຫ້ກຸ່ມບ້ານຂອງຕົນໃຫ້ກາຍເປັນກຸ່ມບ້ານວັດທະນະທຳພ້ອມທັງເນັ້ນໜັກໃຫ້ປະຊາຊົນທຸກພາກສ່ວນເອົາໃຈໃສ່ໃນການຕ້ານ ແລະສະກັດກັ້ນເຊື້ອພະຍາດໂຄວິດ– 19 ທີ່ພວມລະບາດຕາມຄໍາສັ່ງຂອງຂັ້ນເທິງຢ່າງເຂັ້ມງວດ ແລະພ້ອມກັນຕ້ານ, ສະກັດກັ້ນປາກົດ ການຫຍໍ້ທໍ້ຕ່າງໆໃຫ້ຫຼຸດໜ້ອຍຖອຍລົງເທື່ອລະກ້າວເຮັດໃຫ້ກຸ່ມບ້ານຂອງຕົນກາຍເປັນກຸ່ມບ້ານວັດທະນະທຳໃນອະນາຄົດ.

แชร์