ຝົນນີ້ລາວເສຍຫາຍນໍ້າຖ້ວມ 183 ຕື້ກີບ

ຂ່າວ: ຮສສ

  ກອງປະຊຸມລັດຖະບານສະໄໝສາມັນປະຈຳເດືອນກໍລະກົດ ຄັ້ງວັນທີ 26- 27 ກໍລະກົດ 2021 ນີ້, ທີ່ຫ້ອງວ່າການສຳນັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ພັນຄຳ ວິພາວັນ ນາຍົກລັດຖະມົນຕີໂດຍການເຂົ້າຮ່ວມຂອງບັນດາທ່ານຮອງນາຍົກລັດຖະ ມົນຕີ ແລະສະມາຊິກລັດຖະບານຢ່າງຄົບຖ້ວນ.

    ໃນກອງປະຊຸມດັ່ງກ່າວ, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ, ຮອງປະທານ, ຜູ້ປະຈຳການຄະນະກຳມະການຄຸ້ມຄອງໄພພິບັດຂັ້ນສູນກາງໄດ້ລາຍງານສະພາບໄພພິບັດທີ່ເກີດຂຶ້ນໃນຊ່ວງເດືອນມິຖຸນາກໍລະກົດ 2021 ຊຶ່ງ ສປປ ລາວ ກໍ່ໄດ້ຮັບຜົນກະທົບຈາກລົມພາຍຸໝູນເຂດ ຮ້ອນ ໂຄກູມະ ແລະເຈີມປາກາ ທີ່ພັດຜ່ານເຂົ້າມາອັນໄດ້ເຮັດໃຫ້ເກີດມີຟ້າລົມຝົນຕົກຢູ່ໃນຂອບເຂດທົ່ວປະເທດເຮົາໂດຍສະເພາະເກີດມີນໍ້າຖ້ວມ ຢູ່ 4 ແຂວງຄື: ແຂວງໄຊຍະບູລີ, ບໍ່ແກ້ວ, ຫຼວງພະບາງ, ຫຼວງນໍ້າທາ ຊຶ່ງສົ່ງຜົນກະທົບໂດຍກົງໃສ່ 18 ເມືອງ, 218 ບ້ານ, 3.608 ຄອບຄົວ, 15.012 ຄົນ, ຍິງ 7.533 ຄົນ, ເຮັດໃຫ້ມີຄົນບາດເຈັບ 4 ຄົນ, ເສຍຊີວິດ 2 ຄົນ, ເຮືອນເສຍຫາຍ 60 ສ່ວນຮ້ອຍຂຶ້ນໄປ 38 ຫຼັງ, ເສຍຫາຍບາງສ່ວນ 2.305, ເນື້ອທີ່ທໍາການຜະລິດຖືກເສຍຫາຍ 1.197 ຮຕ, ຊົນລະປະມານ 71 ແຫ່ງ, ທາງ 25 ເສັ້ນ ແລະ 19 ຈຸດ. ຄາດນະເນມູນຄ່າເສຍຫາຍ ເບື້ອງຕົ້ນ 183 ຕື້ກວ່າກີບ. 

  ສ່ວນຜົນກະທົບຈາກພາຍຸເຈີມປາກາທີ່ເກີດຂຶ້ນໃນລະຫວ່າງວັນທີ 18-21 ມິຖຸນາ 2021 ໄດ້ເຮັດໃຫ້ເກີດນໍ້າຖ້ວມຢູ່ 2 ແຂວງ ຄື: ແຂວງຫຼວງນໍ້າທາ, ແລະຫຼວງພະບາງ ຊຶ່ງແຂວງຫຼວງນໍ້າທາໄດ້ຮັບຜົນກະທົບຫຼາຍກວ່າໝູ່ ຢູ່ 3 ເມືອງ ຄື: ເມືອງລອງ, ຫຼວງນໍ້າທາ ແລະວຽງພູຄາ, ມີ 31 ບ້ານ, 149 ຄອບຄົວ, ເສຍຊີວິດ 1 ຄົນ (ດິນຖະລົ່ມທັບ), ດິນເຊາະເຈື່ອນເຮືອນເສຍຫາຍເປ່ເພ 14 ຫຼັງ ເນື້ອທີ່ທໍາການຜະລິດ 150 ເຮັກຕາ, ຊົນລະປະທານ ປະມານ 70 ແຫ່ງ, ເສັ້ນທາງເລກທີ 17 B ຖືກເຊາະເຈື່ອນ, ເສັ້ນທາງ ເລກທີ 17B ຖືກນໍ້າເຊາະເຈື່ອນ 5 ຈຸດ, ບາງຈຸດແມ່ນລົດບັນທຸກໜັກບໍ່ສາມາດແລ່ນຜ່ານໄດ້.

   ສຳລັບແຂວງຫຼວງພະບາງແມ່ນໄດ້ຮັບຜົນກະທົບເລັກນ້ອຍມີນໍ້າໄຫຼສຸເຂົ້າ 3 ບ້ານ ຢູ່ໃນຕົວເມືອງນະຄອນຫຼວງພະບາງ ຄື: ບ້ານພິກໃຫຍ່, ບ້ານຊຽງລ້ວມ ແລະ ບ້ານກົກງິ້ວ. ສຳລັບການຊ່ວຍເຫຼືອຕອບໂຕ້ສຸກເສີນນັ້ນ, ທາງອຳນາດການປົກຄອງທ້ອງຖິ່ນກໍ່ໄດ້ໃຊ້ພາຫະນະ ແລະ ກຳລັງພົນຈາກກອງບັນຊາການປ້ອງກັນຊາດ, ປ້ອງກັນຄວາມສະຫງົບ, ຊາວໜຸ່ມຂອງແຂວງ ແລະເມືອງຈຳນວນໜຶ່ງໄປຍົກຍ້າຍປະຊາຊົນ, ຂົນເຄື່ອງຂອງທີ່ຈຳເປັນໄປໄວ້ໃນບ່ອນທີ່ປອດໄພພ້ອມທັງຊີ້ນຳໃຫ້ແຂວງນຳໃຊ້ເຂົ້າທີ່ກະຊວງໄດ້ຈັດສົ່ງໄປຕາມແຜນແບ່ງປັນໃຫ້ແຕ່ລະແຂວງແລ້ວຊຶ່ງແຂວງຫຼວງນໍ້າທາ 120 ໂຕນ ແລະຫຼວງພະບາງ 105 ໂຕນ ພ້ອມທັງໃຫ້ການຊ່ວຍເຫຼືອສຸກເສີນເງິນ 350 ລ້ານກີບ, ເຄື່ອງອຸປະໂພກ-ບໍລິໂພກ ລວມມູນຄ່າ 170 ລ້ານກີບ.

   ພ້ອມກັນນີ້, ທາງກົມອຸຕຸນິຍົມ ແລະອຸທົກກະສາດ, ກະຊວງຊັບພະຍາກອນທຳມະຊາດ ແລະສິ່ງແວດລ້ອມຍັງໄດ້ແຈ້ງເຕືອນກ່ຽວກັບສະພາບອາກາດຈາກພາຍຸເຈິມປາກາແມ່ນໄດ້ມີກຳລັງລົມອ່ອນລົງກາຍເປັນຄວາມກົດດັນອາກາດຕໍ່າທີ່ມີກຳລັງແຮງ ແລະ ຍັງສືບຕໍ່ໃຫ້ມີຝົນຕົກຢູ່ໃນຂອບເຂດທົ່ວປະເທດຊຶ່ງຈະເຮັດໃຫ້ລະດັບແມ່ນໍ້າຂອງ ແລະແມ່ນໍ້າສາຂາເພີ່ມສູງຂຶ້ນໂດຍສະເພາະບັນດາແຂວງພາກກາງ ແລະພາກໃຕ້ຈະຕ້ອງໄດ້ຕິດຕາມ ແລະເຝົ້າລະວັງລະດັບນໍ້າຢ່າງໃກ້ສິດ.

   ດ້ວຍຄວາມເປັນຫວ່ງເປັນໄຍຈາກສູນກາງພັກ-ລັດຖະບານ ເພື່ອຮັບປະກັນໃຫ້ຊີວິດ ແລະຊັບສິນຂອງພໍ່ແມ່ປະຊາຊົນບັນດາເຜົ່າໄດ້ຮັບການປົກປ້ອງ ແລະມີຄວາມປອດໄພ ພ້ອມທັງໄດ້ຮັບການຊ່ວຍເຫຼືອຮີບດ່ວນທັນການ, ຄະນະກຳມະການຄຸ້ມຄອງໄພພິບັດຂັ້ນສູນກາງໄດ້ຊີ້ນຳຄະນະກຳມະການຄຸ້ມຄອງໄພພິບັດແຕ່ລະຂັ້ນຕິດຕາມສະພາບດີນຟ້າອາກາດທີ່ລາຍງານແຕ່ລະວັນເປັນປົກກະຕິຈາກກະຊວງຊັບພະຍາກອນທຳມະຊາດ ແລະສິ່ງແວດລ້ອມ. ພ້ອມນັ້ນ,ຍັງໄດ້ອອກແຈ້ງການໃຫ້ບັນດາພະ ແນກແຮງງານ ແລະ ສະຫວັດດີການສັງຄົມ ແລະຄະນະກຳມະການຄຸ້ມຄອງໄພພິບັດຂັ້ນແຂວງ ແລະເມືອງກະກຽມດ້ານກຳລັງ ພົນ, ເຂົ້າກິນ, ເຕັ້ນ, ເຮືອ ແລະຈຸດປອດໄພທີ່ຈະຍົກຍ້າຍປະຊາຊົນໄປຢູ່ຊົ່ວຄາວໃຫ້ຮັບປະກັນ ແລະທັນກັບສະພາບການ.

   ສຳລັບຂັ້ນສູນກາງແມ່ນໄດ້ຮ່ວມມືກັບຄູ່ຮ່ວມພັດທະນາສາກົນກະກຽມຄວາມພ້ອມເປັນຕົ້ນແມ່ນເຂົ້າກິນຈາກຄັງແຮເຂົ້າອາຊຽນ +3 (AFTERR +3) ແລະ ອົງ ການອາຫານໂລກມີເຂົ້າແຮຢູ່ສາງຂອງກະຊວງ ຫຼັກ 17 ຈຳນວນ 1.320 ໂຕນ ຫາກເກີດຜົນກະທົບທີ່ຮ້າຍແຮງຈາກໄພພິບັດຢູ່ແຂວງໃດກໍ່ສາມາດປະສານສົມທົບຮ່ວມກັນລົງໄປປະເມີນຜົນເສຍຫາຍ ແລະຈັດສົ່ງໃຫ້ແຂວງນັ້ນໂດຍໄວ.

แชร์