ພຣະພິຂຸສົງສຳມະເນນປະຕິບັດທຳຈຳພັນສາ

  ມື້ຂຶ້ນ 15 ຄໍ່າ ເດືອນ 8 ລາວ ພສ 2564 ກົງກັບວັນເສົາ ທີ 24 ກໍລະກົດ 2021 ເປັນມື້ບຸນເຂົ້າພັນ ໂດຍຊຶ່ງຊາວພຸດທະສາຊະນິກະຊົນໃນຂອບເຂດທົ່ວປະເທດໄດ້ພາກັນຮ່ວມໃສ່ບາດຍາດນໍ້າຖວາຍເຄື່ອງສັງທານຕ່າງໆຢູ່ວັດວາອາຮາມແຫ່ງຕ່າງໆ ຕາມຮີດຄອງປະເພນີທີ່ເຄີຍສືບທອດກັນມາໄປຄຽງຄູ່ກັບການປະຕິບັດມາດຕະການປ້ອງກັນການແຜ່ລະບາດຂອງພະຍາດໂຄວິດ-19, ສ່ວນພຣະພິຂຸສົງສໍາມະເນນກ່ໍເລີ່ມປະຕິບັດທໍາຈໍາພັນສາ.

  ການຈຳພັນສາ ຫຼື ເຂົ້າພັນສາແປວ່າ: ພັກຝົນໝາຍເຖິງວ່າ ພຣະພິກຂຸສົງຕ້ອງຢູ່ປະຈຳໃນວັດໃດໜຶ່ງລະຫວ່າງລະດູຝົນ ໂດຍເຫດທີ່ພຣະພິຂຸສົງໃນສະໄໝພຸດທະການມີໜ້າທີ່ຈະຕ້ອງຈາລຶກໂຜດສັດ ແລະເຜີຍແຜ່ພຣະທຳອຳສັ່ງສອນແກ່ປະຊາຊົນໃນສະຖານທີ່ຕ່າງໆບໍ່ຈຳເປັນຕ້ອງມີບ່ອນຢູ່ປະຈຳເຖິງແມ່ນວ່າຈະເປັນລະດູຝົນກໍ່ຕາມດັ່ງນັ້ນຊາວບ້ານຈຶ່ງຕຳໜິວ່າໄປຢຽບເຂົ້າກ້າ ແລະພືດພັນອື່ນໆຈົນເສຍຫາຍພຣະພຸດທະເຈົ້າຈຶ່ງຊົງວາງລະບຽບການຈຳພັນສາໃຫ້ພຣະພິຂຸສົງຢູ່ປະຈຳບ່ອນເກົ່າຕະຫຼອດ 3 ເດືອນ ໃນລະດູຝົນຄື: ເລີ່ມຕັ້ງແຕ່ມື້ແຮມ 1 ຄໍ່າ ເດືອນ 8 ຂອງທຸກປີ ເອີ້ນວ່າ ປຸຣິມະພັນສາ, ຖ້າປີໃດມີເດືອນ 8 ສອງຄັ້ງ (ສອງຫົນ) ກໍເລື່ອນມາເປັນມື້ແຮມ 1 ຄໍ່າ ເດືອນ 8 ຫຼັງ ແລະອອກພັນສາໃນມື້ຂຶ້ນ 15 ຄໍ່າ ເດືອນ 11 ເອີ້ນວ່າ ປັດສິມພັນສາ.

  ວັນເຂົ້າພັນສານັບເປັນເຫດໃຫ້ມີປະເພນີທຳບຸນເນື່ອງໃນວັນດັ່ງກ່າວສືບຕໍ່ກັນມາກາຍເປັນວັດທະນະທຳທາງສາສະໜາອັນລໍ້າຄ່າສຳລັບອອກຕົນຍາດໂຍມກ່ໍ ໄດ້ມີການກະກຽມສິ່ງຂອງຕ່າງໆ ເພື່ອໄປທຳບຸນໃນມື້ເຂົ້າພັນສາບໍ່ວ່າຈະເປັນເຂົ້າຕົ້ມ, ເຂົ້າໜົມ, ເຄື່ອສັງຂະທານ, ທຽນພັນສາ, ຜ້ານໍ້າຝົນ ແລະອື່ນໆ, ການ ນຸ່ງຖືຂອງເອື້ອຍນ້ອງແມ່ຍິງໃນເວລາໄປທຳບຸນກໍ່ຕ້ອງຮັກສາໄດ້ເອກະລັກຂອງຄົນລາວໄວ້ເພື່ອອະນຸຮັກ ຮັກສາວັດທະນະທຳລາວໃຫ້ຄົງຢູ່ກັບຄົນລາວຕະຫຼອດໄປ.

----

ໜັງສືພິມ ເສດຖະກິດ-ສັງຄົມ

แชร์