ເລຂາທິການໃຫຍ່ຢ້ຽມຢາມ ແລະແລະເຮັດວຽກຢູ່ຫົວພັນ

    ໃນວັນທີ 23 ກໍລະກົດ 2021 ທີ່ ແຂວງຫົວພັນ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດພ້ອມຄະນະຢ້ຽມຢາມ ແລະເຮັດວຽກຢູ່ແຂວງ ຫົວພັນ, ໂດຍມີສະຫາຍ ວັນໄຊ ແພງຊຸມມາ ເລຂາພັກແຂວງ, ເຈົ້າແຂວງ, ພ້ອມພະນັກງານຫຼັກແຫຼ່ງໃຫ້ການຕ້ອນຮັບ ແລະ ລາຍງານສະພາບການພັດທະນາເສດ ຖະກິດ-ສັງຄົມພາຍໃນແຂວງໃຫ້ຊາບ.

  ໂດຍລວມແລ້ວແຂວງຫົວພັນຍັງຮັກສາໄດ້ຄວາມໜັກແໜ້ນທາງດ້ານເມືອງ, ສັງຄົມມີຄວາມເປັນລະບຽບຮຽບຮ້ອຍເຮັດໃຫ້ປະຊາຊົນຍຸທ່າງທຳມາຫາກິນ ແລະມີການພັດທະນາຂຶ້ນໄປເລື້ອຍໆ, ແຂວງໄດ້ເອົາໃຈໃສ່ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານດ້ວຍການຫັນເອົາກຳລັງລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍຕິດພັນກັບວຽກງານ 3 ສ້າງ, ມາຮອດປະຈຸບັນການພັດທະນາເສດຖະກິດ 6 ເດືອນຕົ້ນປີທົ່ວແຂວງມີເນື້ອທີ່ປູກຝັງລະດູແລ້ງທັງໝົດ 26.761 ເຮັກຕາ ສາມາດເກັບຜົນຜະລິດໄດ້ທັງໝົດ 37.322 ໂຕນ ທຽບໃສ່ແຜນການປະຕິບັດໄດ້ 14,57%, ເນື້ອປູກພືດເປັນສະບຽງອາຫານມີ 7.606 ເຮັກຕາ ສາມາດເກັບກ່ຽວຜົນຜະລິດໄດ້ 17 ພັນກວ່າໂຕນ ແລະມີເນື້ອປູກພືດເປັນສິນຄ້າ 11.676 ເຮັກຕາ ສາມາດເກັບກ່ຽວຜົນຜະລິດໄດ້ 12 ພັນກວ່າໂຕນສ່ວນການພັດທະນາບັນດາວຽກງານໃນຂົງເຂດອື່ນໆ ແມ່ນສາມາດປະຕິບັດໄດ້ດີພໍສົມຄວນ, ແຕ່ອັດຕາຄວາມທຸກຍາກຍັງມີເຖິງ 13,44% ຂອງຄອບຄົວທັງ ໝົດທຽບໃສ່ປີ 2015 ຫຼຸດລົງ 8,52% ແລະມີບ້ານທຸກຍາກ 473 ບ້ານ ກວມເອົາ 64,97% ຂອງບ້ານທຸກຍາກ. 

   ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ໃຫ້ກຽດໂອ້ລົມ, ພ້ອມໃຫ້ທິດຊີ້ນຳກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍທີ່ແຂວງຍັງຮັກສາໄດ້ມູນເຊື້ອຂອງການປະຕິວັດພ້ອມດຽວກັນສະຫາຍຍັງໄດ້ໃຫ້ທິດຊີ້ນຳແກ່ບັນດາການນຳຫຼັກແຫຼ່ງ ຈົ່ງໃຫ້ຄວາມສຳຄັນ ແລະເອົາໃຈໃສ່ໃນການຜັນເອົາມະຕິກອງປະຊຸມໃຫຍ່ຄັ້ງທີ່ XI ຂອງພັກຫັນລົງສູ່ຮາກຖານຕົວຈິງ, ຖືເອົາມະຕິ 11 ເປັນຫຼັກ ແລະ ເປັນແຜນລະອຽດໃນການພັດທະນາເສດຖະກິດ-ສັງຄົມຂອງແຂວງ ແລະ ນຳເອົາວາລະແຫ່ງ ຊາດ ມາຜັນຂະຫຍາຍພ້ອມກັບ ໝູນໃຊ້ເຂົ້າກັບພຶດຕິກຳຕົວຈິງ ຂອງການພັດທະນາແຂວງໃຫ້ກ້າວເດີນໄປຂ້າງໜ້າ, ໂດຍສ້າງຈີນຕະນາການອັນໃໝ່ທີ່ຖືກຕ້ອງ ແລະກ້າຮັບເອົາສິ່ງໃໝ່ ທີ່ມີການ ຫັນປ່ຽນທີ່ດີກວ່າອັນເກົ່າສຸດທ້າຍ ສະມາຊິກພັກທຸກຂັ້ນຕ້ອງເປັນ ແບບຢ່າງທີ່ດີໃນການດຳລົງຊີວິດແລະປະຕິບັດໜ້າທີ່ວຽກງານທີ່ຕົນເອງຮັບຜິດຊອບ. ຫຼັງຈາກນັ້ນ, ທາງຄະນະໄດ້ເດີນທາງໄປຢ້ຽມຢາມ ແລະເຮັດວຽກຢູ່ບ້ານນາຊອນ ເມືອງສົບເບົາ,ຊຶ່ງເປັນບ້ານເກີດຂອງສະຫາຍເອງໂດຍມີສະຫາຍ ໄຊຍະແສງ ຊົງຢົງຢາ ເລຂາພັກເມືອງ, ເຈົ້າເມືອງພ້ອມເຖົ້າແກ່ແນວໂຮມ, ຄູ-ນັກຮຽນໃຫ້ການຕ້ອນຮັບ. ບ້ານນາຊອນປະຈຸບັນມີພົນລະເມືອງທັງໝົດ 384 ຄົນ,

ຍິງ 219 ຄົນ, ມີ 70 ຫຼັງຄາ ແລະ 76 ຄອບຄົວ ທົ່ວເມືອງສົບເບົາ ມີເນຶ້ອທີ່ 101,99 ຮຕ ທິດຕາເວັນອອກຕິດກັບເມືອງມົກເຈົາ, ເວິ້ນໂຮ່, ເມືອງລາດ ສສ ຫວຽດ ນາມ, ທິດຕາເວັນຕົກຕິດ ກັບ ເມືອງຊຳເໜືອ, ທິດໃຕ້ຕິດ ກັບເມືອງວຽງໄຊ ແລະທິດເໜືອ ຕິດ ກັບເມືອງຊຽງຄາ, ມີເນື້ອທີ່ ດິນປູກຝັງ 5.734 ເຮັກຕາ, ເນື້ອທີ່ນາ 2.526 ເຮັກຕາ, ພື້ນຖານເສດຖະກິດຫຼັກແມ່ນກະສິກຳ, ມີ 67 ບ້ານ, 4.599 ຄອບຄົວ, ມີພົນລະເມືອງ 25.853 ຄົນ, ຍິງ 12.632 ຄົນ, ມີ 6 ເຜົ່າຊົນ, ເຜົ່າລາວພຸດກວມເອົາ 15%, ເຜົ່າໄຕແດງກວມເອົາ 64%, ເຜົ່າ ມົ້ງກວມເອົາ 22%, ເຜົ່າໄຕດຳກວມເອົາ 02%, ເຜົ່າອິ້ວມ້ຽນກວມເອົາ 03% ແລະເຜົ່າ ກຶມມຸ ກວມເອົາ 04%, ຜົນສຳເລັດໃນການນຳພາ-ຊີ້ນຳພັດທະນາເສດຖະກິດ-ສັງຄົມ ໄລຍະຜ່ານມາມຫຼາຍອັນທີ່ຍັງສັບສົນ, ມີທັງສິ່ງອຳນວຍຄວາມສະດວກ ແລະ ສີ່ງທ້າທາຍຫລາຍປະການໃຫ້ແກ່ການພັດທະນາ, ແຕ່ເຖິງຢ່າງໃດກໍ່ຕາມໂດຍຄວາມຮັບຜິດຊອບສູງຄວາມເປັນເຈົ້າການຂອງຄະນະພັກ, ສະມາຊິກພັກ, ອຳນາດການ ປົກຄອງແຕ່ລະຂັ້ນ, ອົງການຈັດຕັ້ງຕ່າງໆ ບວກກັບມູນເຊື້ອອັນດີງາມຂອງຊາວເມືອງສົບເບົາ ແລະພາຍໃຕ້ການນຳພາ-ຊີ້ນຳຢ່າງເປັນປົກກະຕິໃນການສຶກສາອົບຮົມການເມືອງແນວຄິດດ້ວຍການຄົ້ນຄວ້າເຊື່ອມຊຶມກຳແໜ້ນແນວທາງຂອງພັກ,ກົດໝາຍຂອງລັດໂດຍສະເພາະແມ່ນມະຕິຕ່າງໆຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ມະຕິ X ຂອງອົງຄະນະພັກແຂວງ, ມະຕິ V ຂອງອົງຄະນະພັກເມືອງ, ການເລົ່າມູນເຊື້ອຂອງພັກ, ຂອງຊາດ,ສາກົນໃຫ້ແກ່ສະມາຊິກພັກ, ພະນັກງານ-ລັດຖະກອນ, ທະຫານ,ຕຳຫຼວດຕະຫຼອດຮອດພໍ່ແມ່ປະຊາຊົນບັນດາເຜົ່າໃນ 67 ບ້ານ ທົ່ວເມືອງເຫັນໄດ້ວ່າຄຸນທາດການເມືອງຂອງພໍ່ແມ່ປະຊາຊົນແມ່ນຍັງມີຄວາມໜັກແໜ້ນເດັດດ່ຽວເດີນຕາມອຸດົມການສັງຄົມນິຍົມຢ່າງສະເໝີຕົ້ນສະເໝີປາຍມີຄວາມຮັບຮູ້ເຂົ້າໃຈ ແລະກຳແໜ້ນຕໍ່ແນວທາງນະໂຍບາຍຂອງພັກ-ກົດ ໝາຍຂອງລັດ, ທົ່ວເມືອງມີ 100 ໜ່ວຍພັກ,ໃນນັ້ນມີໜ່ວຍພັກເອກະລາດ 82 ໜ່ວຍ, ມີສະມາຊິກພັກທັງໝົດ 1.459 ສະຫາຍ,ຍິງ 342 ສະຫາຍ, ມີສະມາ ຊິກພັກແຂງ 1.271 ສະຫາຍ, ຍິງ 305 ສະຫາຍ, ເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ 79 ໜ່ວຍພັກ ເທົ່າກັບ 82,29% ຂອງຈຳນວນໜ່ວຍພັກ.

    ໃນໂອກາດດັ່ງກ່າວ, ສະຫາຍເລຂາທິການໃຫຍ່, ປະທານປະເທດໄດ້ໂອ້ລົມ ແລະໃຫ້ທິດຊີ້ບາງບັນຫາກ່ອນອື່ນສະຫາຍໄດ້ຍ້ອງຍໍຊົມເຊີຍທີ່ອຳນາດການປົກຄອງທຸກຂັ້ນຕະຫຼອດພໍ່ແມ່ປະຊາຊົນໄດ້ຍຶດໝັ້ນ ແລະຮັກສາໄດ້ມູນເຊື້ອພິລະອາດຫານແຫ່ງປະຕິວັດ ແລະ ຈົ່ງສືບຕໍ່ຮັກສາມູນເຊື້ອດັ່ງກ່າວ, ພ້ອມເສີມຂະຫາຍ ແລະສູ້ຊົນເຮັດ ໃຫ້ປະຊາຊົນພາຍໃນເມືອງມີຊີວິດການເປັນຢູ່ທີ່ດີຂຶ້ນ ແລະຫຼຸດພົ້ນອອກຈາກຄວາມທຸກຍາກ, ເຮັດໃຫ້ທົ່ວສັງຄົມພາຍໃນເມືອງປອດຈາກສິ່ງເສບຕິດ, ສິ່ງຜິດກົດໝາຍແລະສົ່ງເສີມໃຫ້ລູກຫລານໄດ້ຮັບການສຶກສາເພື່ອເຮັດໃຫ້ລູກຫຼານຫ່າງໄກຈາກສິ່ງອະບາຍຍະມຸກຕ່າງໆ.

แชร์