ສຳເລັດສ້າງສິ່ງອຳນວຍແຫຼ່ງທ່ອງທ່ຽວພູຜາສຸກ

ພາບ-ຂ່າວ: ສິດຕາ ເພັດວົງສາ

    ວັນທີ 20 ກໍລະກົດ 2021 ໄດ້ຈັດພິທີມອບ-ຮັບໂຄງການກໍ່ສ້າງສິ່ງອຳນວຍຄວາມສະດວກໃນເຂດແຫຼ່ງທ່ອງທ່ຽວອຸທິຍານພູຜາສຸກແຂວງສາລະວັນຈັດຂື້ນຢູ່ທີ່ຫ້ອງປະຊຸມພະແນກຖະແຫຼງຂ່າວ-ວັດທະນະທຳ ແລະ ທ່ອງທ່ຽວແຂວງໂດຍການເປັນປະທານຂອງ ທ່ານ ມະໄລວອນ ສີປະເສີດ ຫົວໜ້າພະແນກຖະແຫຼງຂ່າວ-ວັດທະນະທຳ ແລະທ່ອງທ່ຽວ ແຂວງສາລະວັນ, ໂດຍມີຄະນະກຳການລົງທຶນຂັ້ນແຂວງ, ຫ້ອງວ່າການແຂວງ ແລະພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມ.

    ໂຄງການກໍ່ສ້າງສິງອຳນວຍຄວາມສະດວກໃນເຂດແຫຼ່ງທ່ອງທ່ຽວອຸທິຍານພູຜາສຸກໄດ້ເລີ່ມລົງມືຈັດຕັ້ງປະຕິບັດແຕ່ວັນທີ 22 ພຶດສະພາ 2018 ຫາວັນທີ 22 ພຶດສະພາ 2020 ຈຶ່ງສຳເລັດ 100% ຊຶ່ງມີໜ້າວຽກທັງໝົດ 14 ກິດ ຈະກຳໃຫຍ່ຄື: ວຽກກໍ່ສ້າງນຳລິນ, ວຽກກໍ່ສ້າງອາງສະໄລເດີ, ວຽກປູກຫຍ້າ ແລະຕົ້ນໄມ້, ວຽກຕິດປ້າຍ, ວຽກກໍ່ສ້າງສາລາຊົມວີວ, ວຽກຂົວໄມ້ຂ້າມຫ້ວຍ, ວຽກກໍ່ສ້າງຂັ້ນໃດໄມ້ ແລະຂັ້ນໃດເບຕົງທາງຍ່າງ, ວຽກກໍ່ສ້າງເຮືອນພັກພະນັກງານຈຳນວນ 2 ຫຼັງ, ວຽກກໍ່ສ້າງນຳລິນເຂົ້າເຮືອນພະນັກງານ,ວຽກກໍ່ສ້າງສິ່ງອຳນວຍ (ໃນຖໍ້າ, ປາກຖໍ້າ ແລະຂັ້ນໃດລົງຖໍ້າ ແລະວຽກກໍ່ສ້າງຫ້ອງນໍ້າສາທາລະນະຈຳນວນ 12 ຫ້ອງ, ໂດຍແມ່ນບໍລິສັດ ໄຊບັນດິດ ອອກແບບ-ທີ່ປຶກສາ ແລະກໍ່ສ້າງຈຳກັດຜູ້ດຽວເປັນຜູ້ຮັບເໜົາກໍ່ສ້າງໃນມູນຄ່າລວມທັງໝົດ 5,032,897,517 ກີບ.

    ຈາກນັ້ນທ່ານ ບຸນກອງ ເກດທອງຄຳ ຮອງຫົວໜ້າພະແນກຖະແຫຼງຂ່າວ-ວັດທະນະທຳ ແລະທ່ອງທ່ຽວແຂວງສາລະວັນ ແລະທ່ານ ຍົງວິໄລ ທອງສາລີ ຕ່າງໜ້າບໍລິສັດໄຊບັນດິດອອກແບບທີ່ປຶກສາ ແລະກໍ່ສ້າງຈຳກັດຜູ້ດຽວກໍ່ໄດ້ລົງນາມເຊັນສັນຍາມອບ-ຮັບໂຄງການດັ່ງກ່າວໂດຍຊ້ອງໜ້າພາກສ່ວນຕ່າງໆ ທີ່ກ່ຽວຂ້ອງເຂົ້າຮ່ວມ.

แชร์