ໃນວັນທີ 19 ກໍລະກົດ 2021 ຢູ່ທີ່ຫ້ອງປະຊຸມພະແນກສຶກສາທິການ ແລະກິລາແຂວງສະຫວັນນະເຂດໄດ້ຈັດພິທີເຊັນບົດບັນທຶກຂໍ້ຕົກລົງ (MOA) ກ່ຽວກັບກິດຈະກຳສົ່ງເສີມນອກຫຼັກສູດເພື່ອພັດທະນາທັກສະໄວໜຸ່ມແຂວງສະຫວັນນະເຂດລະຫວ່າງພະແນກສຶກສາທິການ ແລະກິລາແຂວງ ແລະ ອົງການຟີດາສາກົນປະຈຳ ສປປ ລາວ. ໂດຍການໃຫ້ກຽດເຂົ້າຮ່ວມຂອງທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ທ່ານ ພຸດທະໄຊ ໄຊສົງຄາມ ຫົວໜ້າໂຄງການສູນພັດ ທະນາທັກສະໄວໜຸ່ມແຂວງສະຫວັນນະເຂດອົງການຟີດາສາກົນປະຈຳ ສປປ ລາວ, ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະ ກິລາ ແຂວງທັງເປັນຜູ້ຊີ້ນຳວຽກງານໂຄງການພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

   ໂອກາດເຂົ້າຮ່ວມພິທີເຊັນບົດບັນທຶກຄັ້ງນີ້, ທ່ານ ນາງ ຫຼິງທອງ ແສງຕາວັນ ໄດ້ມີຄຳເຫັນວ່າ: ພິທີເຊັນບົດບັນທຶກຂໍ້ຕົກລົງກ່ຽວກັບກິດຈະກຳສົ່ງເສີມນອກຫຼັກສູດ ເພື່ອພັດທະນາທັກສະໄວໜຸ່ມເຊິ່ງມີໄລຍະການຈັດຕັ້ງປະຕິບັດກິດຈະກຳເປັນເວລາ 1 ປີ, ໃນງົບປະມານ 30.000 ຢູໂຣ.ໂຄງການດັ່ງກ່າວແມ່ນເປັນໂຄງການສຸດທ້າຍທີ່ອົງການຟີດາສະໜັບສະໜູນເພື່ອສ້າງຄວາມເຂັ້ມແຂງໃຫ້ກັບໂຮງຮຽນເປົ້າໝາຍຄື: ມສ ໂພນສະຫວັນ, ມສ ສະຫວັນ, ມສ ອຸດົມວິໄລ, ມຕ ສຸນັນທາ ໃຫ້ມີຄວາມເຂັ້ມແຂງ ແລະສາມາດສືບຕໍ່ກິດຈະກຳພາຍຫຼັງທີ່ໂຄງການໄດ້ສິ້ນສຸດລົງ. ໃນຜ່ານມາ, ໂຄງການ ແລະພະແນກສຶກສາທິການ ແລະກິລາແຂວງແມ່ນໄດ້ຮ່ວມມືກັນດ້ວຍດີຕະຫຼອດມາໃນການພັດທະນາໂຮງຮຽນໃນຊັ້ນມັດທະຍົມສົມບູນຂອງແຂວງສະຫວັນນະເຂດ 12 ແຫ່ງ ຄື: ມສ ໂພນສະຫວັນ, ມສ ໂພນສິມ, ມສ ອຸດົມວິໄລ, ມສ ອຸທຸມພອນ, ມສ ແກ້ງກະເບົາ, ມສ ປາກຊ່ອງ, ມສ ເຊບັ້ງຫຽງ, ມສ ສອງຄອນ, ມສ ສະບູໄຊ, ມສ ໜອງບົວ ທ່າ, ມສ ໂພນເດື່ອ ແລະ ມສ ໄຊຍະເພັດ. ເປັນໄລຍະເວລາຫຼາຍກວ່າ 10 ປີ ຕັ້ງແຕ່ປີ 2001 ເປັນຕົ້ນມາ. ໂຄງການໄດ້ໃຫ້ການຊ່ວຍເຫຼືອດ້ານການສຶກສາໃນວຽກງານ 3 ດ້ານຄື: ວຽກງານປັບປຸງສິ່ງອໍານວຍຄວາມສະ ດວກໂຄງການໄດ້ປັບປຸງຫ້ອງຮຽນ, ຫ້ອງສະໝຸດ, ສ້າງຫ້ອງທົດລອງ, ຫ້ອງນໍ້າ, ເດີ່ນກິລາ ແລະອື່ນໆ. ດ້ານວຽກຝຶກອົບຮົມໂຄງການໄດ້ຝຶກອົບຮົມໃຫ້ຄູກ່ຽວກັບຫຼັກສູດໃໝ່ ແລະຝຶກອາຊີບເສີມເພື່ອສ້າງລາຍຮັບແກ້ໄຂຄອບຄົວ ແລະວຽກງານສົ່ງເສີມກິດຈະກຳນອກຫຼັກສູດທາງໂຄງການໄດ້ສ້າງກິດຈະກຳກິລາ ແລະສີລະປະດົນຕີລະຫວ່າງໂຮງຮຽນເປົ້າໝາຍຂອງໂຄງການໃນແຕ່ລະປີເພື່ອສ້າງກິດຈະກຳໃຫ້ໄວໜຸ່ມໄດ້ມີປະສົບການ ແລະພັດທະນາທັກສະຂອງຕົນ. ຈົນມາຮອດປີ 2014 ໂຄງ ການດັ່ງກ່າວແມ່ນໄດ້ສືບຕໍ່ໃຫ້ການຊ່ວຍເຫຼືອໃນຊື່ໂຄງການສູນພັດທະນາທັກສະໄວໜຸ່ມແຂວງສະຫວັນນະເຂດແຕ່ຮູບແບບການຈັດຕັ້ງປະຕິບັດຈະຕ່າງກັນເຊັ່ນວ່າ: ວຽກງານການປັບປຸງສິ່ງອຳນວຍຄວາມສະດວກແມ່ນເນັ້ນໃສ່ປັບປຸງຂະໜາດນ້ອຍເປັນຕົ້ນແມ່ນ: ຫ້ອງດົນຕີ, ຫ້ອງເຕັ້ນ, ຫ້ອງສະຕູດີໂອ, ປັບປຸງເດີ່ນກິລາເພື່ອຕອບສະໜອງກິດຈະກຳໃຫ້ກັບໄວໜຸ່ມແຕ່ບໍ່ແມ່ນສ້າງອາຄານ ຫຼືຫ້ອງຮຽນທີ່ໃຫຍ່ສ່ວນວຽກງານການຝຶກອົບຮົມແມ່ນເນັ້ນໃສ່ການສອນທີ່ສ້າງບັນຍາກາດໃຫ້ນັກຮຽນຮູ້ສຶກວ່າຢາກຮຽນ ແລະຊ່ວຍໃຫ້ຄູເຂົ້າເຖິງໄວໜຸ່ມທຸກໆຄົນບໍ່ແມ່ນແຕ່ຄົນເກັ່ງ ຫຼືນັກຮຽນທີ່ມີພຶດທິກຳທີ່ດີຢ່າງດຽວແຕ່ຊ່ວຍໃຫ້ນັກຮຽນທີ່ມີຄວາມສ່ຽງໄດ້ມີໂອກາດ, ມີສ່ວນຮ່ວມໃນການວາງແຜນ ແລະສະເໜີຄຳຄິດເຫັນໂດຍທີ່ມີຄູເປັນຜູ້ຊຸກຍູ້, ໃຫ້ຄຳປຶກສາຄຽງຂ້າງເຂົາຜ່ານການຕິດຕາມການປະເມີນໂຄງການໄລຍະ 2 ຕັ້ງແຕ່ປີ 2017-2020 ເຫັນວ່າໂຄງການດັ່ງກ່າວໄລຍະຜ່ານມາແມ່ນມີໝາກຜົນສຳເລັດສູງ.

    ຈາກນັ້ນ, ໃນພິທີກໍ່ໄດ້ມີການລົງນາມເຊັນບົດບັນທຶກຮ່ວມກັນລະຫວ່າງພະແນກສຶກສາທິການ ແລະກິລາແຂວງໂດຍແມ່ນ ທ່ານ ຖາວອນ ອິນສີຊຽງໃໝ່ ແລະທ່ານ ພຸດທະໄຊ ໄຊສົງຄາມ ໂດຍຊ້ອງໜ້າທ່ານຮອງເຈົ້າແຂວງ ແລະພາກສ່ວນທີ່ກ່ຽວຂ້ອງຮ່ວມເປັນສັກຂີພະຍານນຳດ້ວຍ.

แชร์