ຊົມເຊີຍ! ນະໂຍບາຍລັດໃຫ້ແຮງງານລາວຄືນຖິ່ນ

ຂ່າວ: ໂດຍ: ຣັດສະໝີ ດວງສັດຈະ

   ໃນປະຈຸບັນ, ພະຍາດໂຄວິດ-19 ພວມແຜ່ລະບາດເປັນບໍລິເວນກ້ວາງໃນທົ່ວໂລກລວມທັງຢູ່ບາງປະເທດເພື່ອນບ້ານໃກ້ຄຽງທີ່ຍັງສືບຕໍ່ແຜ່ລະບາດຢູ່ຊຸມຊົນຢ່າງກວ້າງ ຂວາງ,ຈຳນວນຜູ້ຕິດເຊື້ອແລະເສຍຊີວິດຍັງເພີ່ມຂຶ້ນທຸກວັນ ແລະມີຫຼາຍສາຍພັນໃໝ່ທີ່ສາມາດແຜ່ເຊື້ອໄດ້ງ່າຍ,ໄວວາ ແລະມີຄວາມຮຸນແຮງກວ່າເກົ່າຊຶ່ງຄະນະສະເພາະກິດສະກັດກັ້ນ ແລະຕ້ານການແຜ່ລະບາດຂອງພະຍາດໂຄວິດ-19 ໄດ້ຖະແຫຼງຂ່າວໃນວັນທີ 22 ກໍລະກົດ 2021 ໂດຍຢືນຢັນວ່າ: ໃນຂະນະນີ້ ສປປ ລາວ ມີຜູ້ຕິດເຊື້ອໃໝ່ໃນປະເທດສູງສຸດທີ່ບໍ່ເຄີຍປາກົດມີຢູ່ ສປປ ລາວ ທີ່ສູງເຖິງ 256 ຄົນ; ເຮັດໃຫ້ມີຜູ້ຕິດເຊື້ອສະສົມຟຸ່ງຂຶ້ນ 4.119 ຄົນ, ເສຍຊີວິດສະສົມ 5 ກໍລະນີ, ກໍາລັງປິ່ນປົວ 1.603 ຄົນ; ສໍາລັບການກວດພົບເຊື້ອໃໝ່ແມ່ນແຮງງານລາວກັບຈາກປະເທດໃກ້ຄຽງທີ່ຮັບອະນຸຍາດຈາກຄະນະສະເພາະກິດເຂົ້າມາຖືກຕ້ອງຕາມລະບຽບຫຼັກການ ແລະໄດ້ເກັບຕົວຢ່າງ, ທັງຈໍາກັດບໍລິເວນຢູ່ສູນຈໍາກັດບໍລິເວນຂອງແຂວງເມື່ອຜົນກວດເປັນບວກພວກກ່ຽວຖືກນໍາສົ່ງໄປປິ່ນປົວຢູ່ສະຖານທີ່ປິ່ນປົວທີ່ກໍານົດໄວ້.

    ໃນວັນທີ 21 ກໍລະກົດ 2021 ມີຜູ້ເດີນທາງເຂົ້າມາ ສປປ ລາວ ຜ່ານດ່ານຕ່າງໆ ຈໍານວນ 2.928 ຄົນ; ທຸກຄົນໄດ້ເກັບຕົວຢ່າງໄປກວດ ແລະຈໍາກັດບໍລິເວນຢູ່ສູນຄົບ 14 ມື້; ປະຈຸບັນທົ່ວປະເທດ, ມີສູນຈໍາກັດບໍລິເວນທີ່ເປີດນໍາໃຊ້ຢູ່ທັງໝົດ 56 ສູນ, ມີຜູ້ຈໍາກັດບໍລິເວນທັງໝົດ 7.905 ຄົນແລະໃນມື້ດັ່ງກ່າວໄດ້ເກັບຕົວຢ່າງ ມາກວດຊອກຫາເຊື້ອພະຍາດໂຄວິດ-19 ທັງໝົດ 2.256 ຕົວຢ່າງໃນນັ້ນກວດພົບຜູ້ຕິດເຊື້ອໃໝ່ 256 ຄົນ ແລະຂະນະດຽວກັນທົ່ວໂລກມີຜູ້ຕິດເຊື້ອສະສົມທັງໝົດ 192.768.337ຄົນ (ໃໝ່ 533.783 ຄົນ), ເສຍຊີວິດທັງໝົດ 4.141.659 ົນ (ໃໝ່ 8.292 ຄົນ), ປົວຫາຍດີ 175.308.114 ຄົນ (397.848 ຄົນ); ສໍາລັບຢູ່ບັນດາປະເທດທີ່ມີຊາຍແດນຕິດກັບ ສປປ ລາວມີການແຜ່ລະບາດຫຼາຍໃນມື້ນີ້ແມ່ນປະເທດໄທ 13.002 ຄົນ, (ເສຍຊີວິດ 108 ຄົນ); ມຽນມາ 6.093 ຄົນ, (ເສຍຊີວິດ 247 ຄົນ) ແລະຫວຽດນາມມີຜູ້ຕິດເຊື້ອໃໝ່ 5.357 ຄົນ (ເສຍຊີວິດ 36 ຄົນ).

   ຕໍ່ບັນຫາດັ່ງກ່າວ; ລັດຖະບານເຮົາໄດ້ວິເຄາະ-ວິໄຈ ແລະຕີລາຄາບັນຫາການແຜ່ລະບາດພະຍາດໂຄວິດ-19 ຢູ່ໃນໂລກກໍ່ຄືບາງປະເທດໃກ້ຄຽງຍັງສືບຕໍ່ຂະຫຍາຍວົງກ້ວາງ;ສະນັ້ນ,ໃນທ້າຍເດືອນເມສາ 2021 ກະຊວງປ້ອງກັນຄວາມສະຫງົບໄດ້ອອກແຈ້ງການເຖິງບັນດາດ່ານຕໍາຫຼວດກວດຄົນເຂົ້າ-ອອກ ເມືອງສາກົນທີ່ມີຊາຍແດນຕິດກັບປະເທດໄທຮັບເອົາພົນລະເມືອງລາວ ຫຼືແຮງງານລາວທີ່ຕົກຄ້າງຢູ່ໄທກັບຄືນປະເທດໂດຍແຮງງານລາວ ຫຼືພົນລະເມືອງລາວທີ່ມີເອກະສານເດີນທາງຖືກຕ້ອງ, ຄົບຖ້ວນໃຫ້ຖືເອົາກົນໄກການປະສານສົມທົບກັບດ່ານເຊິ່ງໜ້າເພື່ອຮັບເອົາເຂົາເຈົ້າກັບຄືນ ສປປ ລາວ; ການຮັບເອົາແຮງງານລາວ ຫຼືພົນລະເມືອງລາວທີ່ເດີນທາງໄປໄທແບບບໍ່ຖືກຕ້ອງໃຫ້ສຶກສາອົບຮົມ, ກ່າວເຕືອນ ແລະຫ້າມບໍ່ໃຫ້ມີປັບໄໝ... ແລ້ວສັງລວມຂໍ້ມູນປະສານຫາພາກສ່ວນກ່ຽວຂ້ອງພິສູດວ່າເປັນພົນລະເມືອງລາວແທ້ບໍ? ກ່ອນຈະອະນຸຍາດໃຫ້ເດີນທາງເຂົ້າ ສປປ ລາວ; ການຮັບເອົາພົນລະເມືອງລາວ ຫຼືແຮງງານລາວທຸກຄັ້ງຕ້ອງຮີບຮ້ອນປະສານສົມທົບກັບຄະນະສະເພາະກິດທ້ອງຖິ່ນນັ້ນເພື່ອພາຕົວພວກກ່ຽວໄປກວດຫາເຊື້ອໂຄວິດ-19 ແລະໄປຈໍາກັດບໍລິເວນຕາມສະຖານທີ່ທີ່ກໍານົດໄວ້.

    ບໍ່ສະເພາະແຕ່ຢູ່ປະເທດໃກ້ຄຽງເທົ່ານັ້ນ, ລັດຖະບານເຮົາຍັງມີນະໂຍບາຍຜ່ອນຜັນອະນຸຍາດໃຫ້ພົນລະມືອງ ຫຼືແຮງງານລາວທີ່ເດີນທາງໄປເຮັດວຽກ, ຄ້າຂາຍ, ທຸລະກິດ, ທ່ອງທ່ຽວຢູ່ປະເທດຕ່າງໆ ກັບຄືນປະເທດໄດ້ຢ່າງຖືກຕ້ອງ ແລະເປັນທາງການນໍາອີກ; ຄືດັ່ງທີ່ຮູ້ຂ່າວວ່າ: ມີນັກທ່ອງທ່ຽວຜູ້ໜຶ່ງທີ່ເດີນທາງໄປທ່ອງທ່ຽວຢູ່ປະເທດເຊັກໃນທ້າຍປີ 2019 ແລະກໍ່ຕົກຄ້າງຢູ່ປະເທດດັ່ງກ່າວເນື່ອງຈາກມີການແຜ່ລະບາດພະຍາດໂຄວິດ-19 ໃນທົ່ວໂລກເຮັດໃຫ້ຢຸດຕິການສັນຈອນ; ສະນັ້ນ, ໃນຕົ້ນເດືອນນີ້ຜູ້ກ່ຽວໄດ້ຕິດຕໍ່ໄປຍັງສະຖານທູດ ສປປ ລາວ ທີ່ແບກແລັງ, ສະຫະພັນເຢຍລະມັນກໍ່ໄດ້ມີການຕອບຮັບ ແລະໃຫ້ການຮ່ວມມືຈາກພະນັກງານໃນກົງສູນເປັນຢ່າງດີ; ປະຈຸບັນແມ່ນໄດ້ຮັບເອກະສານທີ່ກ່ຽວຂ້ອງ ແລະພ້ອມຈະເດີນທາງກັບສູ່ ສປປ ລາວ; ຕໍ່ບັນຫານີ້, ຜູ້ກ່ຽວຍັງໄດ້ຝາກຄວາມຍ້ອງຍໍຊົມເຊີຍ ແລະຄໍາຂອບໃຈອັນລົ້ນເຫຼືອມາຍັງການນໍາຂອງພັກ, ລັດຖະບານ, ກະຊວງການຕ່າງປະເທດທີ່ມີແນວທາງນະໂຍບາຍອັນຖືກຕ້ອງເປັນທໍາ, ຖືປະຊາຊົນເປັນກົກ ແລະຂໍສົ່ງຄວາມນັບຖືຢ່າງສູງມາຍັງທ່ານເອກອັກຄະລັດຖະທູດ-ພະນັກງານ ໂດຍສະເພາະທ່ານ ວິລະພະນົມ ວົງສາລີ ເລຂາໜຶ່ງ, ຮັບຜິດຊອບວຽກກົງສູນສະຖານທູດ ສປປ ລາວ ທີ່ແບກແລັງ ທີ່ໄດ້ໃຫ້ການຊ່ວຍເຫຼືອ ແລະຮ່ວມມືດ້ວຍດີຕະຫຼອດມາ.

    ທ່ານ ພັນຄໍາ ວິພາວັນ ນາຍົກລັດຖະມົນຕີໄດ້ໃຫ້ກຽດຖະແຫຼງເມື່ອວັນທີ 20 ກໍລະກົດ 2021 ໂດຍຮຽກຮ້ອງມາຍັງປະຊາຊົນລາວກໍ່ຄືຊາວຕ່າງປະເທດທີ່ມີຄວາມປະສົງຈະເຂົ້າ-ອອກ ສປປ ລາວ ໃຫ້ປະຕິບັດຖືກຕ້ອງຕາມຂັ້ນຕອນຂອງລະບຽບການ,ບໍ່ໃຫ້ລັກລອບເຂົ້າອອກຕາມລຳພັງຊຶ່ງຈະເປັນການນຳເອົາເຊື້ອພະຍາດໂຄວິດ-19 ເຂົ້າມາແຜ່ລະບາດເປັນວົງກວ້າງຢູ່ ສປປ ລາວ ແລະກໍ່ຢູ່ປະເທດເພື່ອນບ້ານເຊັ່ນກັນຈະເຮັດໃຫ້ຄວບຄຸມໄດ້ຍາກທີ່ສຸດ. ພິເສດຕໍ່ກັບແຮງງານລາວທີ່ໄປອອກແຮງງານຢູ່ປະເທດໃກ້ຄຽງກໍ່ຂໍໃຫ້ປະຕິບັດເຂັ້ມງວດຕາມລະບຽບການຂອງປະເທດເພື່ອນບ້ານທີ່ຕົນເອງອາໃສຢູ່, ໃນຂະນະດຽວກັນຖ້າຕ້ອງການກັບຄືນ ສປປ ລາວ ເຊິ່ງເປັນບ້ານເກີດເມືອງນອນຂອງຕົນເອງກໍ່ໃຫ້ດຳເນີນຢ່າງຖືກຕ້ອງຕາມຂັ້ນຕອນຂອງກົດໝາຍເຖິງວ່າເວລາອອກໄປຕ່າງປະເທດຈະລັກລອບອອກໄປກໍ່ຕາມ, ແຕ່ເວລາກັບເຂົ້າມາ ຂໍໃຫ້ກັບມາຢ່າງຖືກຕ້ອງໂດຍໃຫ້ພົວພັນກັບເຈົ້າໜ້າທີ່ສະຖານທູດ, ກົງສູນລາວ ແລະເຈົ້າໜ້າທີ່ກ່ຽວຂ້ອງແລ້ວເດີນທາງມາຜ່ານດ່ານຕ່າງໆຢ່າງເປັນທາງການ. ລັດຖະ ບານຖືວ່າການເດີນທາງເຂົ້າມາປະເທດຢ່າງຖືກຕ້ອງນັ້ນເປັນການກະທຳທີ່ຮັກຊາດ-ຮັກບ້ານເກີດເມືອງນອນຂອງຕົນຢ່າງແທ້ຈິງ ແລະ ກົງກັນຂ້າມບຸກຄົນໃດຫາກລັກລອບເຂົ້າມາຈະແມ່ນດ້ວຍເສັ້ນທາງໃດກໍ່ຕາມຖືວ່າເປັນຜູ້ມີຄວາມຜິດຕາມກົດໝາຍ ແລະ ເປັນຜູ້ນຳເອົາຜົນເສຍຫາຍມາໃຫ້ປະເທດຊາດຊຶ່ງຈະຖືກດຳເນີນຄະດີຕາມກົດໝາຍຂອງ ສປປ ລາວ.

แชร์