ທ່ານ ກອງມາລາ ພົມມາໄລ ປະທານສະມາຄົມເຟີນີເຈີລາວຄົນໃໝ່

   ວັນທີ 21 ກໍລະກົດ ຜ່ານມາທີ່ສະພາການຄ້າ ແລະອຸດສາຫະກຳແຫ່ງຊາດ ນະຄອນຫຼວງວຽງຈັນ ໄດ້ມີພິທີມອບ-ຮັບໜ້າທີ່ປະທານສະມາຄົມເຟີນີເຈີລາວ ຜູ້ເກົ່າ ແລະຜູ້ໃໝ່ ຊຶ່ງເຂົ້າຮ່ວມຂອງທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວ, ມີປະທານ ແລະບັນດາຮອງປະທານ ສຟລ, ພ້ອມດ້ວຍບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

   ໃນພິທີໄດ້ມີການການຜ່ານຂໍ້ຕົກລົງຂອງປະທານສະພາການຄ້າ ແລະອຸດສາຫະກຳແຫ່ງຊາດລາວ ສະບັບເລກທີ 0653/ສຄອຊ.3 ລົງວັນທີ 5 ກໍລະກົດ 2021 ວ່າດ້ວຍການຮັບຮອງການແຕ່ງຕັ້ງຄະນະບໍລິຫານງານຂອງສະມາຄົມເຟີນີເຈີລາວ ສະໄໝທີ IV ໂດຍຕົກລົງຮັບຮອງເອົາທ່ານ ກອງມາລາ ພົມມາໄລ ອຳນວຍການໂຮງງານເຄແອນບີເຟີນີເຈີ ເປັນປະທານ ແລະໄດ້ຮັບຮອງເອົາຮອງປະທານ 6 ທ່ານປະກອບມີ: ທ່ານ ວັນເພັງ ສົມຊະນະ ອຳນວຍການໂຮງງານຄຳໄພຊະນະປຸງແຕ່ງໄມ້ ແລະເຟີນີເຈີ, ທ່ານ ນາງ ຈັນໄຕ ທຳມະວົງສາອຳນວຍການໂຮງງານຈັນໄຕເຟີນີເຈີ, ທ່ານ ທອງດຳ ສີຫາມາຍາ ອຳນວຍການໂຮງງານທອງດຳເຟີນີເຈີ,ທ່ານ ກອງແຊງ ລາດສະມູນ ອຳນວຍການໂຮງຊ່າງແກະສະຫຼັກໄມ້, ທ່ານ ບຸນຖອງ ຫຼວງໂຄດ ອຳນວຍການບໍລິສັດຮຸ່ງຈະເລີນລວຍຊັບການຄ້າຂາເຂົ້າ ແລະສົ່ງອອກຈຳກັດ, ທ່ານ ນາງ ວອນມະນີວົງ ສະເຕີນ ອຳນວຍການບ້ານລັບແລເຟີນີເຈີ.

   ສ່ວນຄະນະກຳມະການປະກອບມີ: ທ່ານ ກົງສາ ດວງມາລາ ອຳນວຍການກົງສາເຟີນີເຈີ, ທ່ານ ນາງ ພອນບູລີ ນໍລະສິດ ອຳນວຍການພອນບູລີເຟີນີເຈີ,ທ່ານ ນາງ ເພັດສະໝອນ ເໜື່ອງກອງມະນີ ອຳນວຍການຫັດຖະກຳແກະສະຫຼັກໄມ້, ທ່ານ ນາງ ສົມບູນ ພິມມະສອນ ອຳນວຍການໂຮງງານສົມບູນ ແລະຄະນະກວດກາອີກ 3 ທ່ານ ປະກອບມີ: ທ່ານ ກົງສາ ດວງມາລາ ອຳນວຍການກົງສາເຟີນີເຈີ ເປັນຫົວໜ້າ, ທ່ານ ນາງ ວອນມະນີວົງ ສະເຕີນ ອຳນວຍການບ້ານລັບແລເຟີນີເຈີເປັນຮອງ ແລະທ່ານ ນາງ ເພັດສະໝອນ ເໜື່ອງກອງມະນີ ອຳນວຍການຫັດຖະກຳແກະສະຫຼັກໄມ້ເປັນຄະນະ.

   ທ່ານ ຄຳໄພ ສົມຊະນະ ກ່າວຜົນງານຜ່ານມາວ່າ: ນັບເປັນສິ່ງທີ່ພາກພູມໃຈໃນຕະຫຼອດຜ່ານມາຕົນໄດ້ອຸທິດກຳລັງທັງກາຍ ແລະໃຈພ້ອມທຶນຮອນປະກອບສ່ວນເຂົ້າໃນການພັດທະນາດ້ານຕ່າງໆຂອງ ສຟລ ຊຸດທີ 2 ແລະຊຸດທີ 3 ອັນໄດ້ສ້າງຊື່ສຽງສຳຄັນແກ່ແກ່ພາຍໃນ ແລະພາກພື້ນໄດ້ຮູ້ຜະລິດຕະພັນໄມ້ລາວນັບມື້ຫຼາຍຂຶ້ນ.

    ໂດຍໃນເວລາ 10 ກວ່າປີ ຜ່ານມາບັນດາຄະນະ ສຟລ ໄດ້ປະສ່ວນທຶນຮອນສ່ວນຕົວຫຼາຍຕື້ກີບສະເພາະບໍລິສັດໄດ້ປະກອບສ່ວນ 1 ຕື້ກວ່າກີບ, ໃນປີ 2013 ໄດ້ຮັບໂກຕາໄມ້ທ່ອນ 30% ຈາກລັດຖະບານແບ່ງໃຫ້, ໄດ້ຖືກເຊີນເຂົ້າເປັນສະມາຂິກສະມາຄົມເຟີນີເຈີອາຊຽນໃນປີ 2014 ແລະໃນປີ 2017 ໄດ້ຈັດກອງປະຊຸມຄັ້ງທີ 35 ຂອງສະມາຄົມເຟີນີເຈີອາຊຽນຢູ່ ສປປ ລາວ, ໄດ້ຖືກເຊີນເຂົ້າເປັນສະມາຊິກສະມາຄົມທຸລະກິດຈີນ-ອາຊຽນ ໃນປີ 2014 ນອກນັ້ນ ສຟລ ຍັງໄດ້ມີການຈັດງານວາງສະ ແດງສິນຄ້າ 3 ຄັ້ງ ຕໍ່ປີແຕ່ປີ 2015 ຮອດປະຈຸບັນລວມເປັນ 16 ຄັ້ງແລ້ວ.

  ໂອກາດນີ້ ທ່ານ ກອງມາລາ ພົມມາໄລ ໄດ້ກ່າວວ່າ: ຂ້າພະເຈົ້າຮູ້ສຶກດີໃຈທີ່ໄດ້ຮັບຄວາມໄວ້ວາງໃຈມອບໝາຍໃຫ້ຮັບໜ້າທີ່ອັນຊົງກຽດນີ້ໂດຍຈະນຳພາສະມາຄົມພັດ ທະນາໄປຕາມແນວທາງນະໂຍບາຍຂອງພັກ-ລັດ, ພັດທະນາສີມືແຮງງານລາວໃນຂະແໜງເຟີນີເຈີໃຫ້ທຽບເທົ່າກັບສາກົນ ແລະລະດົມສະມາຊິກໃຫ້ເປັນໜຶ່ງດຽວມີຄວາມສາມັກຄີພ້ອມຂະຫຍາຍໄປທົ່ວທຸກແຂວງຂອບເຂດທົ່ວປະເທດໄປຄຽງຄູ່ກັບການພັດທະນາສິນຄ້າໃຫ້ເປັນທີ່ສົນໃຈຂອງຕະຫຼາດພາຍໃນ ແລະສາກົນແລ້ວກໍ່ແກ້ໄຂຈຸດອ່ອນຂໍ້ຄົງຄ້າງໃນຜ່ານມາ ແລະເສີມຂະຫຍາຍຈຸດແຂງໃຫ້ໂດດເດັ່ນຂຶ້ນໃນອານາຄົດໂດຍໃນສະພາບໂຄວິດຄືປະຈຸບັນກໍມີການຂາຍຜ່ານທາງອອນລາຍນຳອີກ.

    ທ່ານ ວັນເພັງ ສົມຊະນະ ກ່າວວ່າໃນນາມຮອງປະທານຈະສຸມທຸກກຳທຸກກຳລັງທີ່ມີ ແລະຖອດຖອນບົດຮຽນເພື່ອມາປະກອບສ່ວນໃນການພັດທະນາໃຫ້ເປັນໄປຕາມແຜນຂອງຄະນະໃຫ້ດີຂຶ້ນໂດຍສະເພາະກໍແມ່ນຄວາມສາມັກຄີພາຍໃນຂອງສະມາຊິກທົ່ວປະເທດ ແລະ ໃນຕໍ່ໜ້າຈະພັດທະນາສິນຄ້າຂອງລາວໃຫ່ມີຄວາມຄວາມໂດດເດັ່ນຕາມແຜນພັດທະນາຂອງ ລຫດ ຖະບານໃນແຕ່ລະໄລຍະ.

  ເຊັ່ນດຽວກັນກັນກັບ ທ່ານ ນາງ ຈັນໄຕ ທຳມະວົງສາ ທີ່ໄດ້ສະແດງຄວາມເຫັນຈະຊ່ວຍພັດທະນາສະມາຄົມເພື່ອໃຫ້ມີຄວາມເຂັ້ມແຂງສາມາຊິກຜະລິດສິນຄ້າສາມາດແຂ່ງຂັນໄດ້ກັບຕະຫຼາດພາຍໃນ ແລະຕ່າງປະເທດແຕ່ທັງນີ້ທ່ານໄດ້ຮຽກຮ້ອງໃຫ້ທຸກພາກສ່ວນກ່ຽວຂ້ອງຈົ່ງໄດ້ປະກອສ່ວນເອື້ອອຳນວຍ ແລະຊຸກຍູ້ສົ່ງເສີມໃນດ້ານຕ່າງໆ ໂດຍສະເພາະຜະລິດຕະພັນໄມ້, ສີມື, ການຜະລິດສຳຄັນທີ່ສຸດແມ່ນເງິນກູ້ຢືມໃນອັດຕາດອກເບ້ຍຕໍ່າ.

แชร์