ເຊກອງເລັ່ງກວດກົງເຕີນໍ້າ ແລະໄຟ

ຂ່າວ: ແດນວົງວິຈິດ

  ໃນກາງເດືອນກໍລະກົດ 2021 ນີ້, ທ່ານ ໜູລາ ຢາປະລອງຮັງ ຮອງຫົວໜ້າພະແນກອຸດສາຫະກຳ-ການຄ້າແຂວງເຊກອງພ້ອມພະນັກງານວິຊາການໄດ້ລົງເຄື່ອນ ໄຫວກວດກາວັດແທກກົງເຕີນໍ້າ ແລະໄຟຟ້າຢູ່ເມືອງທ່າແຕງເພື່ອສະກັດກັ້ນຫາງສຽງຈົ່ມວ່າຂອງຜູ້ຊົມໃຊ້ໂດຍມີ ທ່ານ ສຸພົນ ໄຊສະຫງ່າ ຮອງເຈົ້າເມືອງໆທ່າແຕງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ໜູລາ ຢາປະລອງຮັງ ຮອງຫົວໜ້າພະແນກອຸດສາຫະກຳ-ການຄ້າແຂວງເຊກອງກ່າວວ່າ: ໄລຍະຜ່ານມາການຊົມໃຊ້ນໍ້າປະປາ ແລະໄຟຟ້າແມ່ນຄິດໄລ່ລາຄາ ເກີນຄວາມເປັນຈິງເນື່ອງຈາກ ການວັດແທກກົງເຕີນໍ້າ ແລະກົງເຕີ ໄຟຟ້າບໍ່ໄດ້ມາດຕະຖານ ແລະເກີດມີການເອົາລັດເອົາປຽບລະຫ່ວາງຜູ້ໃຫ້ບໍລິການ ແລະ ຜູ້ຊົມໃຊ້ເປັນຕົ້ນໃຊ້ນໍ້ານ້ອຍແຕ່ກົງເຕີວັດແທກນໍ້າ ແລ່ນຂຶ້ນສູງ ແລະໄຟຟ້າກໍ່ເຊັ່ນດຽວກັນໂດຍປະເດັນດັ່ງກ່າວນີ້ເຫັນວ່າບໍ່ເທົ່າທຽມ ແລະບໍ່ເປັນທຳ, ສະນັ້ນເພື່ອສະກັດກັ້ນບໍ່ໃຫ້ເກີດມີບັນຫາດັ່ງກ່າວພະແນກອຸດສະຫະກຳການຄ້າແຂວງເຊກອງໃນນາມຜູ້ຮັບຜິດຊອບມາດຖານວັດແທກຊັບສິນທາງປັນຍາຈິ່ງຮີບຮ້ອນລົງແກ້ໄຂໃຫ້ທັນການໂດຍເລັ່ງໃສ່ເປົ້າໝາຍພາຍໃນເທດສະບານເມືອງຊຶ່ງໄດ້ກວດກາ-ວັດແທກກົງເຕີນໍ້າສໍາເລັດແລ້ວ 59 ໜ່ວຍຂອງຈຳນວນກົງເຕີ 2,002 ໜ່ວຍ, ສ່ວນກົງເຕີໄຟຟ້າກໍສຳ ເລັດແລ້ວ 208 ໜ່ວຍຂອງຈຳນວນ 6,598 ໜ່ວຍໃນທົ່ວເມືອງ.

แชร์