ຫາລືກຽມສ້າງປ່າສັກສິດບັນດາເຜົ່າ

ຂ່າວ: ສຸວັນລີ

  ໃນວັນທີ 19 ກໍລະກົດ 2021 ນີ້, ທີ່ສູນກາງແນວລາວສ້າງຊາດ (ສນຊ) ຄະນະຮັບຜິດຊອບໄດ້ຈັດກອງປະຊຸມການກະກຽມ ແລະສ້າງປ່າຊ້າສັກສິດບັນດາເຜົ່າໂດຍການເປັນປະທານຂອງທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກປະທານສູນກາງແນວລາວສ້າງຊາດມີບັນດາທ່ານຄະນະຮັບຜິດຊອບຈາກພາກ ສ່ວນທີ່ກ່ຽວຂ້ອງເຂົ້າຮ່ວມ.

   ກອງປະຊຸມຄັ້ງນີ້, ໄດ້ຮັບຟັງການຜ່ານຂໍ້ຕົກລົງ ສະບັບເລກທີ 23/ນຍ ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາກະກຽມ ແລະສ້າງປ່າຊ້າສັກສິດ ລົງວັນທີ 31 ມີນາ 2021, ຮັບຟັງຮ່າງຂໍ້ຕົກລົງວ່າດ້ວຍການແບ່ງງານຂອງຄະນະຮັບຜິດຊອບຊີ້ນໍາກະກຽມ ແລະສ້າງປ່າຊ້າສັກສິດ ແລະຮ່າງແຜນການດໍາເນີນງານຂອງຄະນະຮັບ ຜິດຊອບຊຶ່ງໂຄງການດັ່ງກ່າວມີທີ່ຕັ້ງຢູ່ບ້ານໂພນສະຫວັນ ເມືອງໄຊທານີ ນະຄອນຫຼວງວຽງຈັນ. ຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄໍາຄິດຄໍາເຫັນຢ່າງກົງໄປ ກົງມາຕໍ່ຮ່າງຂໍ້ຕົກລົງວ່າດ້ວຍການແບ່ງງານຂອງຄະນະຮັບຜິດຊອບຊີ້ນໍາກະກຽມ ແລະ ສ້າງປ່າຊ້າສັກສິດຢ່າງລະອຽດໂດຍແມ່ນສູນກາງແນວລາວສ້າງຊາດເປັນເຈົ້າ ຂອງໂຄງການ.

   ທ່ານປະທານ ສນຊ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບທີ່ໄດ້ເອົາໃຈໃສ່ໃນການຫ້າງຫາກະກຽມແຜນການຕະຫຼອດໄລຍະຜ່ານມາ ແລະທ່ານໄດ້ເນັ້ນໜັກໃຫ້ແຕ່ລະພາກສ່ວນເພີ່ມທະວີຄວາມຮັບຜິດຊອບຕໍ່ວຽກງານວິຊາການຂອງຕົນໃຫ້ລົງເລິກຄົ້ນຄວ້າຮ່າງນະໂຍບາຍວ່າດ້ວຍການສ້າງປ່າຊ້າສັກສິດ, ເນື້ອໃນ, ເວລາ, ເນື້ອທີ່ດິນ, ງົບປະມານຮັບໃຊ້ເຂົ້າໃນວຽກງານດັ່ງກ່າວພາຍຫຼັງສໍາເລັດແລ້ວສົ່ງໃຫ້ສູນກາງແນວລາວ ສ້າງຊາດສັງລວມ ແລະສົ່ງຄືນໃຫ້ບັນດາກະຊວງ-ອົງການປະກອບຄໍາຄິດເຫັນເພື່ອເອກະພາບ ແລະ ທ່ານໄດ້ເນັ້ນຕື່ມ 5 ແຜນວຽກສໍາຄັນທີ່ຈະໄດ້ປະຕິບັດດັ່ງຕໍ່ໄປນີ້: ມອບໃຫ້ຮອງເຈົ້າຄອງນະຄອນຫຼວງວຽງຈັນ ຮ່ວມກັບເຈົ້າເມືອງໄຊທານີ ຊ່ວຍໄກ່ເກ່ຍທີ່ດິນໃຫ້ຈະແຈ້ງວ່າໄດ້ຫຼືບໍ່ໄດ້ຕາມເນື້ອທີ່ໃບຕາດິນທີ່ພະແນກຊັບພະຍາກອນທໍາມະຊາດ ແລະສິ່ງແວດລ້ອມອອກໃຫ້; ມອບໃຫ້ກະຊວງໂຍທາທິການ ແລະຂົນສົ່ງສໍາຫຼວດອອກແບບໃຊ້ພື້ນທີ່ດິນດັ່ງກ່າວ; ຄິດໄລ່ຄວາມເປັນໄປໄດ້ຕາມການອອກແບບພື້ນຖານ ແລະອອກແບບຖາວອນ; ຄິດໄລ່ງົບປະມານທັງໝົດເບື້ອງຕົ້ນໃຊ້ຈ່າຍການອອກແບບ, ໃຊ້ຈ່າຍການກໍ່ສ້າງພື້ນຖານໂຄງຮ່າງໄຟຟ້າ, ນໍ້າປະປາ ແລະອື່ນໆ, ພ້ອມທັງມີການສະຫຼຸບລາຍງານວາງແຜນເປັນແຕ່ລະໄລຍະເພື່ອຂໍທິດຊີ້ນໍາຢ່າງເປັນລະບົບ.

แชร์