ລາວ ສືບຕໍ່ປະເມີນຜົນຮອບດ້ານຕ້ານຟອກເງິນຢ່າງຕັ້ງໜ້າ

ໂດຍ: ຣັດສະໝີ ດວງສັດຈະ

  ສຳນັກງານຂໍ້ມູນຕ້ານການຟອກເງິນ (ສຕຟງ) ມີພາລະບົດບາດເປັນເສນາທິການ ແລະຊ່ວຍວຽກໃຫ້ແກ່ຄະນະກໍາມະການແຫ່ງຊາດເພື່ອຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍ (ຄຕຟງ) ໃນການຈັດຕັ້ງປະຕິບັດການຄຸ້ມຄອງ, ຕິດຕາມ ແລະກວດກາວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍເພື່ອເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ສອດຄ່ອງກັບລະບຽບກົດໝາຍແລະມາດຕະຖານສາກົນ.

ທ່ານນາງ ແພງສີ ແພງເມືອງ ຄະນະພັກທະນາຄານແຫ່ງ ສປປ ລາວ, ຫົວໜ້າ ສຕຟງ ໄດ້ແຈ້ງໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2021 ໄດ້ກະກຽມການປະເມີນຜົນຮອບດ້ານກ່ຽວກັບວຽກງານຕ້ານສະກັດກັ້ນການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຂອງ ສປປ ລາວ ຄັ້ງທີ 2 (2019-2021) ຊຶ່ງໄດ້ເຮັດວຽກກັບພາກສ່ວນກ່ຽວຂ້ອງທັງພາກລັດ ແລະເອກະຊົນເພື່ອຕອບບັນຫາຄຳຖາມເຈາະຈີ້ມຂອງສາກົນຕາມມາດຖານ 40 ຂໍ້ແນະນໍາ ແລະ 10 ດ້ານປະສິດທິຜົນ ໄດ້ສໍາເລັດໂດຍພື້ນຖານໃນນີ້ສໍາເລັດການສ້າງແລະປັບປຸງນິຕິກຳທີ່ຕິດພັນກັບວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍຫຼາຍກວ່າ 30 ສະບັບ (ກົດໝາຍ 2 ສະບັບ, ດໍາລັດ 2 ສະບັບ, ຄໍາສັ່ງ 4 ສະບັບ, ຂໍ້ຕົກລົງ 9 ສະບັບ, ຄໍາແນະນຳ 4 ສະບັບ, ແຈ້ງການ 5 ສະບັບແລະຄູ່ມືຈຳນວນໜຶ່ງຮັບໃຊ້ວຽກວິເຄາະ ແລະກວດກາ), ປະຈຸບັນກຳລັງຮ່າງນິຕິກຳຈໍານວນ 4 ສະບັບ ເພື່ອປະຕິບັດຕາມແຜນການແກ້ໄຂຜົນການປະເມີນຄວາມສ່ຽງລະດັບຊາດກ່ຽວກັບວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍ ແລະປະຕິບັດຕາມມາດຖານຂອງອົງການຕ້ານການຟອກເງິນສາກົນ.

  ດ້ານວິຊາສະເພາະສຳເລັດການລົງປະເມີນຕາມຫຼັກການບໍລິຫານຄວາມສ່ຽງກ່ຽວກັບວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍຈຳນວນ 3 ຂະແໜງການ(ຂະແໜງທະນາຄານ, ບໍລິສັດຫຼັກຊັບ ແລະປະກັນໄພ) ແລະສືບຕໍ່ຈັດຕັ້ງປະຕິບັດ 11 ຂະແໜງການ (ຂະແໜງການກາຊີໂນ, ອະສັງຫາລິມະຊັບ, ຊື້-ຂາຍວັດຖຸມີຄ່າ ແລະເຄື່ອງເກົ່າ, ບໍລິສັດໂອນເງິນດ່ວນ, ຮ້ານແລກປ່ຽນເງິນຕາ, ສະຖາບັນການເງິນຈຸລະພາກ, ບໍລິສັດ ເຊົ່າສິນເຊື່ອ, ໂຮງຊວດຈຳ, ສະພາທະນາຍ ຄວາມ, ອົງການທະບຽນສານ ແລະ ບໍລິສັດກວດສອບບັນຊີ), ນອກຈາກນີ້ຍັງມີອົງການທີ່ບໍ່ຫວັງຜົນກຳໄລ (ສະມາຄົມ ແລະ ມູນນິທິ) ທີ່ມີຄວາມສ່ຽງບໍ່ໄດ້ນອນຢູ່ໃນ ຫົວໜ່ວຍທີ່ມີໜ້າທີ່ລາຍງານຊຶ່ງຈະຕ້ອງໄດ້ດໍາເນີນການຈັດຕັ້ງປະຕິບັດໃນຕໍ່ໜ້າ.

    ສຳເລັດການລົງຊຸກຍູ້ ແລະເຜີຍແຜ່-ເຊື່ອມຊຶມວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍໃຫ້ແກ່ພາກສ່ວນທີ່ກ່ຽວຂ້ອງພາກລັດ ແລະເອກະຊົນ 11 ຄັ້ງ ມີຜູ້ເຂົ້າຮ່ວມຫຼາຍກວ່າ 1.000 ຄົນໂດຍເນັ້ນໃສ່ການສ້າງຄວາມເຂົ້າໃຈວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍ ແລະສິດພັນທະຂອງແຕ່ລະພາກສ່ວນໃຫ້ສາມາດຈັດຕັ້ງປະຕິບັດຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການຕ້ານ ແລະສະກັດກັ້ນການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍ; ສຳເລັດການສ້າງລະບົບການແລກປ່ຽນຂໍ້ມູນໃຫ້ແກ່ພາກສ່ວນລັດ, ເອກະຊົນ, ພາກສ່ວນ ເຈົ້າໜ້າທີ່ສືບສວນ-ສອບສວນ ແລະ ສ້າງລະບົບລາຍງານໃຫ້ແກ່ຫົວໜ່ວຍທີ່ມີໜ້າທີ່ລາຍງານເພື່ອຮັບປະກັນການແລກປ່ຽນຂໍ້ມູນໄດ້ຢ່າງປອດໄພ, ວ່ອງໄວ ແລະທັນສະໄໝ.

   ສຳເລັດການເຊັນບົດບັນທຶກຄວາມເຂົ້າໃຈການແລກປ່ຽນຂໍ້ມູນກັບພາກສ່ວນກ່ຽວຂ້ອງມາຮອດປະຈຸບັນສາມາດເຊັນບົດບັນທຶກຄວາມເຂົ້າໃຈພາຍໃນປະເທດມີທັງໝົດ 16 ກົມ, 8 ກະຊວງ ແລະສໍາເລັດເຊັນກັບສາກົນ ຈຳນວນ 3 ສະບັບ ຊຶ່ງປະຈຸບັນສາມາດເຊັນບົດບັນທຶກຄວາມເຂົ້າໃຈກັບສາກົນທັງໝົດຈຳນວນ 17 ປະເທດ.

    ທ່ານນາງ ແພງສີ ແພງເມືອງ ຫົວໜ້າ ສຕຟງ ໄດ້ແຈ້ງແຜນວຽກໃນຕໍ່ໜ້າໂດຍສືບຕໍ່ກະກຽມການປະເມີນຜົນຮອບດ້ານກ່ຽວກັບວຽກງານຕ້ານສະກັດກັ້ນການ ຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍຂອງ ສປປ ລາວ ຄັ້ງທີ 2 (2019-2021) ໃນດ້ານນິຕິກຳ, ການຈັດຕັ້ງປະຕິບັດວຽກງານຕົວຈິງ, ກົນໄກການປະສານງານ ແລະການເຜີຍແຜ່-ເຊື່ອມຊຶມໃຫ້ທຸກພາກສ່ວນທີ່ກ່ຽວຂ້ອງ ແລະທົ່ວສັງຄົມຮັບຮູ້ເຂົ້າໃຈຕໍ່ກັບວຽກງານດັ່ງກ່າວເພື່ອຮັບປະກັນໃຫ້ ສປປ ລາວ ຜ່ານການປະເມີນໃນຄັ້ງນີ້ບໍ່ໃຫ້ຕົກໃນສະພາບການຕິດຕາມຂອງສາກົນ.

แชร์