ຄະນະສະມາຄົມເຟີນີເຈີລາວຊຸດໃໝ່ເຂົ້າຢ້ຽມຂໍ່ານັບລັດຖະມົນຕີກະຊວງການຄ້າ

   ໃນວັນທີ 19 ກໍລະກົດ 2021 ທີ່ກະຊວງ ອຄ ທ່ານ ກອງມາລາ ພົມມະໄລ ປະທານສະມາຄົມເຟີນີເຈີລາວ (ສຟລ) ໄດ້ນຳພາຄະນະເຂົ້າຢ້ຽມຂໍານັບທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ (ອຄ) ເນື່ອງໃນໂອກາດທີ່ທ່ານໄດ້ຮັບເປັນລັດຖະມົນຕີກະຊວງ ອຄ ຜູ້ໃໝ່ພ້ອມເຂົ້າລາຍງານສະພາບແຜນການພັດທະນາ ແລະປັບປຸງກົງຈັກຂອງ ສຟລ ຊຸດທີ 4 ແລະທິດທາງການດໍາເນີນທຸລະກິດໃນຕໍ່ໜ້າ.

  ໃນໂອກາດດັ່ງກ່າວທ່ານ ກອງມາລາ ພົມມາໄລ ປະທານ ສຟລ ໄດ້ສະແດງຄວາມຍິນດີໃນໂອກາດທີ່ມາຮັບໜ້າທີ່ໃໝ່ເປັນລັດຖະມົນຕີກະຊວງ ອຄ ຂອງທ່ານ ຄໍາແພງ ໄຊສົມແພງ, ພ້ອມນັ້ນກໍ່ໄດ້ລາຍງານສະພາບການຂອງ ສຟລ ໃນໄລຍະຜ່ານມາ ແລະໃນຕໍ່ໜ້າໂດຍສະເພາະແມ່ນຈຸດປະສົງຫຼັກໃນຄັ້ງນີ້ແມ່ນມາລາຍງານການປັບປຸງກົງຈັກຂອງຄະນະບໍລິຫານສະມາຄົມເຟີນີເຈີຄືນໃໝ່ເຊິ່ງມາຮອດປັດຈຸບັນ ສຟລ ໄດ້ມີການປັບປຸງຄະນະບໍລິຫານມາແລ້ວ 4 ຄັ້ງ ເຊິ່ງສະມາຊິກ ສຟລ 90 ກວ່າໂຮງ ງານໄດ້ເປັນເອກະພາບເລືອກເອົາ ທ່ານ ກອງມາລາ ພົມມາໄລ ເຈົ້າຂອງໂຮງງານເຄແອນບີເຟີນີເຈີເປັນປະທານ ສຟລ ຄົນໃໝ່ເພື່ອຊີ້ນໍາໆພາ ສຟລ ໃຫ້ມີການພັດທະ ນາໂຮງງານກໍຄືຜະລິດຕະພັນເຟີນີເຈີລາວໃຫ້ມີຄວາມທັນສະໄຫມສວຍງາມຮັກສາໄດ້ເອກະລັກຄວາມເປັນລາວທັງໃຫ້ເພີ່ມຂຶ້ນດ້ານປະລິມານ ແລະຄຸນນະພາບນໍາເອົາຜະລິດຕະພັນເຟີນີເຈີລາວເຂົ້າຮ່ວມງານວາງສະແດງທັງພາຍໃນ ແລະຕ່າງປະເທດນໍາເງິນຕາເຂົ້າມາພັດທະນາປະເທດຊາດ.

    ໂອກາດດຽວກັນນີ້ ສຟລ ຍັງໄດ້ສະເໜີ 5 ບັນຫາສໍາຄັນເພື່ອໃຫ້ຄະນະນໍາກະຊວງຊ່ວຍຊຸກຍູ້ເຮັດໃຫ້ ສຟລ ມີຄວາມເຂັ້ມແຂງຕື່ມເປັນຕົ້ນແມ່ນ: ໜຶ່ງ: ການນໍາເຂົ້າວັດຖຸດິບເພື່ອມາປ້ອນໃນ ໂຮງງານໃຫ້ມີຄວາມຕໍ່ເນື່ອງ, ສອງ: ແຫຼ່ງທຶນດອກເບ້ຍຕໍ່າເພື່ອມາເປັນແຫຼ່ງທຶນເຂົ້າໃນການຜະລິດ, ສາມ: ສະເໜີໃຫ້ມີສະຖານທີ່ສະເພາະໃນການສ້າງເປັນໂຊລູມ ຫຼືຕະຫຼາດຈໍາໜ່າຍຜະລິດຕະພັນເຟີນີເຈີ ຫຼືຕະຫຼາດໄມ້ພ້ອມນະໂຍບາຍຊຸກຍູ້, ສີ່: ຊ່ວຍຍົກລະດັບມາດຕະຖານຜະລິດຕະພັນໄມ້ເພື່ອສົ່ງອອກ, ແລະຫ້າ: ການເຂົ້າເຖິງວັດຖຸດິບຈາກລັດຖະບານໂດຍສະເພາະແມ່ນການປະມູນໄມ້ທີ່ຄະນະສະເພາະກິດຍຶດໄດ້ເຊິ່ງ ສຟລ ຍັງບໍ່ມີແຫຼ່ງທຶນຈໍານວນຫຼາຍເພື່ອເຂົ້າປະມູນໄມ້ທີ່ມີບໍລິມາດຫຼາຍມາເປັນວັດຖຸດິບເຂົ້າໂຮງງານ.

    ໂອກາດດຽວກັນ ທ່ານ ຄໍາແພງ ໄຊສົມແພງ ກໍໄດ້ສະແດງຄວາມຊົມເຊີຍຕໍ່ຜົນງານ, ຜົນສໍາເລັດຂອງ ສຟລ ທີ່ຍາດໄດ້ ໃນໄລຍະຜ່ານມາເຊິ່ງເປັນການສ້າງມູນຄ່າຜະລິດຕະພັນໄມ້, ການປຸງແຕ່ງໄມ້, ສ້າງສິນຄ້າເຟີນີເຈີອອກຮັບໃຊ້ສັງຄົມທັງພາຍໃນ ແລະ ຕ່າງປະເທດ, ພ້ອມໃຫ້ສືບຕໍ່ໃນການດັດສົມ ແລະ ຍົກລະດັບການຜະລິດຂອງບັນດາສະມາຊິກໃຫ້ໄດ້ມາດຕະຖານຖືກຕ້ອງຕາມລະບຽບໃນແຕ່ລະໄລຍະ, ສ່ວນບັນຫາທີ່ ສຟລ ສະເໜີແມ່ນເປັນຜົນດີພວກເຮົາຈະພ້ອມກັນເຮັດແນວໃດເພື່ອເຮັດໃຫ້ການພັດທະນາເຟີນີເຈີລາວທຽບເທົ່າປະເທດອ້ອມຂ້າງ ແລະສາກົນ, ສ້າງສິນຄ້າລາວໃຫ້ມີຄຸນນະພາບ ແລະແຂງຂັນໃນຕະຫຼາດໄດ້.

แชร์