ມອບ-ຮັບທາງການວັກແຊງອາເມລິກາຊ່ວຍລາວ

     ວັນທີ 19 ກໍລະກົດຜ່ານມານີ້ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ ໄດ້ມີພິທີມອບ-ຮັບຢ່າງເປັນທາງການວັກແຊງຈອນຊັນ ເເອນ ຈອນຊັນ ທີ່ອາເມລິກາຊ່ວຍລາວຜ່ານ COVAX Facility ຈຳນວນ 1 ລ້ານກວ່າໂດສ ພາຍຫຼັງວັກແຊງດັ່ງກ່າວເດີນທາງມາເຖິງ ສປປ ລາວ ໃນວັນທີ 16 ກໍລະກົດຜ່ານມາ.

    ໃຫ້ກຽດເຂົ້າຮ່ວມເປັນປະທານໃນພິທີຂອງທ່ານ ນາງ ປານີ ຢາທໍ່ຕູ້, ຮອງປະທານປະເທດ ແຫ່ງ ສປປ ລາວ.

   ໂດຍທ່ານ ດຣ. ປີເຕີ ເຮມອນ, ເອກອັກຄະລັດຖະທູດສະຫະລັດອາເມລິກາ ປະຈຳ ສປປ ລາວ, ໄດ້ມອບວັກແຊງບໍລິຈາກໂດຍຜ່ານ COVAX Facility ເເລະໂດຍມີອົງການຢູນິເຊັບເປັນຜູ້ຈັດສົ່ງ, ໃຫ້ເເກ່ລັດຖະບານເເຫ່ງ ສປປ ລາວ ພ້ອມດ້ວຍທ່ານ ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ, ທ່ານ ດຣ. ກ້າວ ຈຸນ, ວ່າການແທນຜູ້ຕາງໜ້າອົງການອະນາໄມໂລກປະຈໍາ ສປປ ລາວ, ເເລະ ທ່ານນາງ ບີອາເຕ ດາສເຕລ໌, ວ່າການແທນຜູ້ຕາງໜ້າອົງການຢູນິເຊັບປະຈໍາ ສປປ ລາວ ແລະຜູ້ຕາງໜ້າຈາກພາກສ່ວນທີ່ກ່ຽວຂ້ອງອື່ນໆ.

 ການຈັດສົ່ງວັກຊີນໃນຄັ້ງນີ້ແມ່ນເປັນສ່ວນໜຶ່ງຂອງການປະກອບສ່ວນຂອງສະຫະລັດອາເມລິກາຕໍ່ຄວາມພະຍາຍາມຂອງທົ່ວໂລກທີ່ພວມດຳເນີນການຢ່າງຕໍ່ເນື່ອງເພື່ອຢຸດຕິການລະບາດຂອງພະຍາດ ແລະເປັນການສະໜັບສະໜູນເປົ້າໝາຍຂອງ ສປປ ລາວ ໃນການສັກວັກຊີນກັນພະຍາດໃຫ້ໄດ້ 50% ຂອງປະຊາກອນໃນທ້າຍປີ 2021 ນີ້.

   ທ່ານ ນາງ ປານີ ຢາທໍ່ຕູ້ ກ່າວວ່າ: “ລັດຖະບານແຫ່ງ ສປປ ລາວ ຕີລາຄາສູງຕໍ່ການສືບຕໍ່ຊ່ວຍເຫຼືອຂອງລັດຖະບານ ແລະປະຊາຊົນສະຫະລັດອາເມລິກາເເກ່ລັດຖະ ບານ ແລະປະຊາຊົນລາວ, ເຊິ່ງໃນຄັ້ງນີ້ແມ່ນການຊ່ວຍເຫຼືອວັກແຊງປ້ອງກັນພະຍາດໂຄວິດ-19 ອັນໄດ້ສະເເດງໃຫ້ເຫັນເຖິງສາຍພົວພັນທີ່ດີລະຫວ່າງສອງປະເທດຂອງພວກເຮົາພາຍໃຕ້ຄູ່ຮ່ວມມືແບບກວມລວມລະຫວ່າງສະຫະລັດອາເມລິກາ ເເລະ ສປປ ລາວ. ຂ້າພະເຈົ້າເຊື່ອໝັ້ນວ່າການໄດ້ຮັບວັກ ແຊງ ຈອນຊັນ ເເອນ ຈອນຊັນ ຂອງ ສປປ ລາວ ໃນຄັ້ງນີ້ຈະຊ່ວຍເລັ່ງລັດການບັນລຸເປົ້າໝາຍການສັກວັກຊີນໃຫ້ໄດ້ຢ່າງນ້ອຍ 50% ຂອງປະຊາຊົນລາວພາຍໃນທ້າຍປີ 2021 ນີ້.”

   ຈາກການໄດ້ຮັບວັກຊີນຈຳນວນ 1.008.000 ໂດສ໌ ເຊິ່ງເປັນການບໍລິຈາກໂດຍກົງຈາກປະຊາຊົນອາເມລິກາໃຫ້ແກ່ ສປປ ລາວ, ຈະເຮັດໃຫ້ ລັດຖະບານລາວສາ ມາດຕອບສະໜອງການປ້ອງກັນການຕິດເຊື້ອໄວຣັດໃຫ້ແກ່ປະຊາຊົນ 1 ລ້ານກວ່າຄົນ ໃນຈຳນວນປະຊາກອນທັງໝົດປະມານ 7 ລ້ານຄົນ.

   ວັກແຊງກັນພະຍາດໂຄວິດ-19 ຈອນຊັນ ເເອນ ຈອນຊັນ ແຕກຕ່າງຈາກວັກຊີນກັນພະຍາດໂຄວິດ-19 ຊະນິດອື່ນໆທີ່ມີຢູ່ໃນ ສປປ ລາວ ໃນປະຈຸບັນຍ້ອນວ່າຕ້ອງສັກພຽງຄັ້ງດຽວເທົ່ານັ້ນ. ນອກນັ້ນ, ວັກແຊງ ຈອນຊັນ ເເອນ ຈອນຊັນ ຍັງສາມາດເກັບຮັກສາໄວ້ໃນອຸນຫະພູມຕູ້ເຢັນປົກກະຕິເຊິ່ງເປັນທີ່ເໝາະສົມທີ່ສຸດຕໍ່ການສັກວັກຊີນກັນພະຍາດໃຫ້ແກ່ປະຊາກອນໃນເຂດຊົນນະບົດ ຫຼືເຂດຫ່າງໄກສອກຫຼີກທີ່ເຂົ້າເຖິງຍາກ.

    ພະນະທ່ານ ດຣ. ປີເຕີ ເຮມອນ, ເອກອັກຄະລັດຖະທູດສະຫະລັດອາເມລິກາ ປະຈຳ ສປປ ລາວ ກ່າວວ່າ: “ຂ້າພະເຈົ້າມີຄວາມພູມໃຈທີ່ໄດ້ຕາງໜ້າລັດຖະບານສະ ຫະລັດອາເມລິກາໃນການສະໜອງວັກແຊງຊ່ວຍຊີວິດເຫຼົ່ານີ້ໃຫ້ແກ່ປະຊາຊົນ ສປປ ລາວ. ການບໍລິຈາກໃນມື້ນີ້ຈະຮັບປະກັນວ່າປະຊາຊົນລາວຫຼາຍກວ່າ 1 ລ້ານຄົນຕື່ມອີກ-ປະມານ 14% ຂອງປະຊາກອນຂອງ ສປປ ລາວ-ຈະໄດ້ຮັບການສັກວັກຊີນກັນພະຍາດໂຄວິດ-19 ຢ່າງຄົບຖ້ວນ. ອັນນີ້ຈະເຮັດໃຫ້ ສປປ ລາວ ກ້າວເຂົ້າໃກ້ເຖິງເປົ້າໝາຍການສັກວັກຊີນກັນພະຍາດໃຫ້ໄດ້ 50% ຂອງປະຊາກອນໃນທ້າຍປີ 2021 ນີ້, ແລະ ຈະເຮັດໃຫ້ທົ່ວໂລກກ້າວເຂົ້າໃກ້ກັບການຢຸດຕິການແຜ່ລະບາດຂອງພະຍາດນີ້.”

  ລັດຖະບານແຫ່ງ ສປປ ລາວ ຈະໃຊ້ວັກຊີນ ຈອນຊັນ ເເອນ ຈອນຊັນ ເຫຼົ່ານີ້ຕໍ່ກຸ່ມທີ່ເປັນູລິມະສິດ, ລວມທັງຜູ້ທີ່ມີອາຍຸ 60 ປີຂື້ນໄປ, ຄົນທີ່ມີພະຍາດປະຈໍາຕົວ ແລະພະນັກງານສາທາລະນະສຸກໃນຂອບເຂດທົ່ວປະເທດ, ໂດຍສອດຄ່ອງກັບແຜນປະຕິບັດງານການສັກວັກຊີນກັນພະຍາດໂຄວິດ-19 ແຫ່ງຊາດ ແລະ ຍັງມີແຜນການເພີ່ມເຕີມເພື່ອນຳໃຊ້ຕໍ່ປະຊາກອນກຸ່ມເປົ້າໝາຍອື່ນໆ, ລວມທັງເຂດຫ່າງໄກສອກຫຼີກ ແລະເຂດທີ່ເຂົ້າເຖິງໄດ້ຍາກ.

แชร์