ສົ່ງເສີມເດັກບົກຜ່ອງສະຕິ-ປັນຍາ ເຂົ້າເຖີງສຶກສາຮຽນຮ່ວມ

ຂ່າວ: ຍຸພິນທອງ 

   ພິທີເຊັນສັນຍາບົດບັນທຶກຄວາມເຂົ້າໃຈໂຄງການສົ່ງເສີມການເຂົ້າເຖິງການສຶກສາຮຽນຮ່ວມສໍາລັບເດັກທີ່ມີຄວາມບົກຜ່ອງທາງສະຕິ-ປັນຍາ ຢູ່ແຂວງຫົວພັນ ແລະແຂວງຈໍາປາສັກໄດ້ຈັດຂຶ້ນໃນວັນທີ 16 ກໍລະກົດນີ້ ທີ່ກະຊວງສຶກສາທິການ ແລະກີລາ (ສສກ) ລະຫວ່າງກົມພົວພັນການຕ່າງປະເທດ.

    ກະຊວງສຶກສາທິການ ແລະກີລາຮ່ວມກັບອົງການເພື່ອມະນຸດສະທໍາ ແລະການມີສ່ວນຮ່ວມປະຈໍາ ສປປ ລາວ ໂດຍໄດ້ຮັບການສະໜັບສະໜູນຂອງສະຫະພາບເອີລົບ ແລະອົງການເພື່ອມະນຸດສະທໍາ ແລະການມີສ່ວນຮ່ວມ (Humanity and Inclusion) ໃນງົບປະມານລວມທັງໝົດ 1.488.000 ໂດລາ, ຮ່ວມລົງ ນາມລະຫວ່າງທ່ານ ນາງ ສິລິນທອນ ສັກລໍຄຳ ຫົວໜ້າກົມພົວພັນການຕ່າງປະເທດກະຊວງ ສສກ ແລະທ່ານ ເຣເນຍຣ ຄາຣາໄບ ຜູ້ຈັດການຝ່າຍການປະຕິບັດງານປະຈຳ ສປປ ລາວ ກ່ຽວກັບດັ່ງກ່າວພ້ອມດ້ວຍພະນັກງານທັງສອງຝ່າຍເຂົ້າຮ່ວມ. 

   ຈຸດປະສົງຂອງໂຄງການເພື່ອປັບປຸງການເຂົ້າເຖິງການສຶກສາຮຽນຮ່ວມທີ່ມີຄຸນນະພາບສຳລັບເດັກນ້ອຍທີ່ມີຄວາມເປັນພິການທາງສະຕິ-ປັນຍາຢູ່ສອງແຂວງຊຶ່ງມີກິດ ຈະກຳຫຼັກແມ່ນຍົກລະດັບຂີດຄວາມສາມາດໃຫ້ກັບສອງອົງການຈັດຕັ້ງທາງສັງຄົມສະມາຄົມເພື່ອຄົນໂອທິສຕິກ (ສພອ) ແລະສະມາຄົມຄົນພິການທາງສະໝອງດ້ານການຮຽນຮ່ວມ; ຍົກລະດັບຄວາມ ຮັບຮູ້ ແລະຄວາມເຂົ້າໃຈໃຫ້ແກ່ຊຸມຊົນ ກ່ຽວກັບການສົ່ງເສີມການເຂົ້າເຖິງການ ສຶກສາຂອງເດັກນ້ອຍທີ່ມີຄວາມບົກຜ່ອງທາງດ້ານສະຕິ-ປັນຍາ, ສ້າງຂີດຄວາມສາມາດໃຫ້ແກ່ຄູ, ພະນັກງານຫ້ອງການສຶກສາ ແລະກີລາເມືອງກ່ຽວກັບການຮຽນ-ການສອນແບບຮຽນຮ່ວມ, ໃນແຂວງຫົວພັນ ແລະແຂວງຈຳປາສັກຊຶ່ງຈະຖືກຈັດຕັ້ງປະຕິບັດຢູ່ 20 ບ້ານ ພາຍໃນສອງແຂວງຄື: ແຂວງຫົວພັນມີ 5 ບ້ານ ຢູ່ເມືອງວຽງໄຊ ມີບ້ານໜັ້ນ, ບ້ານບັກ, ບ້ານຮາມ, ບ້ານບໍຜາໃຕ້ ແລະບ້ານນາງົວ ແລະ5 ບ້ານຢູ່ເມືອງຊຳ ເໜືອມີບ້ານພັນໄຊ, ບ້ານໂພນຄຳ, ບ້ານໂພນໄຊ, ບ້ານປາຈານ້ອຍ ແລະບ້ານນາຈອງ; ຢູ່ແຂວງຈຳປາສັກ ມີ 5 ບ້ານ ຢູ່ນະຄອນປາກເຊ ມີບ້ານຫ້ວຍຍາງຄຳໃຕ້, ບ້ານກາງ, ບ້ານສະໜາມໄຊ, ບ້ານໂພນສະຫວັນ ແລະບ້ານໂນນສະຫວ່າງ; ແລະ5 ບ້ານ ຢູ່ເມືອງບາຈຽງຈະເລີນສຸກມີບ້ານຫຼັກ 21, ບ້ານແກ້ງເກ່ຍ, ບ້ານໜອງນໍ້າຂາວ ແລະບ້ານສີຊ່ຽງໃໝ່ (ຫຼັກ 16).

    ໃນໂຄງການດັ່ງກ່າວນີ້ເດັກນ້ອຍທີ່ມີຂໍ້ຈຳກັດທາງດ້ານໜ້າທີ່ການຈຳນວນ 200 ຄົນ ຈະໄດ້ຮັບການສະໜັບສະໜູນ, ໄລຍະເວລາຂອງໂຄງການດັ່ງກ່າວແມ່ນເລີ່ມປະຕິບັດໃນເດືອນກໍລະກົດ 2021 ຫາ 30 ກັນຍາ 2024 ເປັນໄລຍະເວລາ 4 ປີ.

แชร์