ໂຄງການ GMS ສະຫຼຸບວຽກກາງປີ

 ກອງປະຊຸມຄະນະຊີ້ນຳໂຄງການ (PSC) ເພື່ອສະຫຼຸບລາຍງານການຈັດຕັ້ງປະຕິບັດໂຄງການປະຈຳ 6 ເດືອນຕົ້ນປີ 2021 ແລະວາງແຜນ 6 ເດືອນທ້າຍປີ 2021 ແລະພິທີມອບຮັບຫຼຽນໄຊແຮງງານຊັ້ນ II, ຊັ້ນ III, ຫຼຽນກາແຮງງານ ແລະໃບຍ້ອງຍໍສຳລັບໂຄງການພັດທະນາຕົວເມືອງຕາມແລວເສດຖະກິດຕາເວັນອອກ-ຕາເວັນຕົກອະນຸພາກພື້ນແມ່ນໍ້າຂອງ (GMS)ໄດ້ຈັດຂຶ້ນໃນຕອນບ່າຍວັນທີ 14 ກໍລະກົດ 2021 ທີ່ສະໂມສອນຫ້ອງວ່າການປົກຄອງແຂວງໂດຍການເປັນກຽດເຂົ້າຮ່ວມເປັນປະທານໃນພິທີຄັ້ງນີ້ຂອງທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດພ້ອມດ້ວຍບັນດາທ່ານຄະນະຊີ້ນຳໂຄງການຂັ້ນຕ່າງໆ ແລະພາກສ່ວນທີ່ກ່ຽວຂ້ອງແຕ່ຂັ້ນສູນກາງລົງຮອດທ້ອງຖິ່ນເຂົ້າຮ່ວມຢ່າງພ້ອມພຽງ.

   ທ່ານ ວຽງທະວີສອນ ເທບພະຈັນ ກ່າວໃນພິທີວ່າ: ກອງປະຊຸມມື້ນີ້, ໄດ້ເຊີນບັນດາທ່ານໃນຄະນະຊີ້ນຳ ແລະພາກສ່ວນທີ່ກ່ຽວຂ້ອງເພື່ອທົບທວນຄືນຜົນການຈັດຕັ້ງປະຕິບັດໂຄງການ GMS ໃນ 6 ເດືອນຕົ້ນປີ 2021 ພ້ອມທັງນຳບັນຫາທີ່ຍັງຄົງຄ້າງມາປຶກສາຫາລືເພື່ອຫາຊ່ອງທາງແກ້ໄຂທັງນີ້ກໍ່ເພື່ອເຮັດໃຫ້ວຽກໂຄງການດຳ ເນີນໄປຕາມແຜນການ ແລະສຳເລັດຕາມຄາດໝາຍທີ່ວາງໄວ້. ໂຄງການນີ້, ໄດ້ເລີ່ມລົງມືປະຕິບັດແຕ່ປີ 2013 ມາຮອດປະຈຸບັນເຫັນວ່າ 7 ໂຄງການຍ່ອຍຢູ່ບ້ານແດນສະຫວັນ ເມືອງເຊໂປນ, ເມືອງພີນ ແລະນະຄອນໄກ ສອນພົມວິຫານ ໄດ້ລົງມືກໍ່ສ້າງສຳເລັດ 100% ແລະຍັງສອງໂຄງການຢູ່ໃນໄລຍະຄໍ້າປະກັນ 1 ປີຄື: ໂຄງການລະບາຍ ນໍ້າຫ້ວຍລົງກົງ ແລະໂຄງການປ້ອງກັນ ຕະຝັ່ງເຈື່ອນແຄມຂອງຈາກນີ້, ທາງໂຄງການຍັງສືບຕໍ່ວຽກເພີ່ມຄັ້ງທີ 2 ທີ່ ໄດ້ເງິນປະຢັດຈາກໂຄງການມາກໍ່ສ້າງ ເສັ້ນທາງຟ້າງຸ່ມ 2 ມີລວງຍາວ 100 ແມັດ ແລະ ປິດສະໜາມຂີ້ເຫຍື້ອເກົ່າບ້ານຊອກທີ່ເຕັມ ແລະ ບໍ່ສາມາດນຳໃຊ້ໄດ້, ຖ້າຫາກວ່າໂຄງການສຳເລັດມັນຈະໄດ້ເຮັດໃຫ້ຕົວເມືອງໄດ້ຮັບການປັບປຸງທັດສະນີຍະພາບໃຫ້ມີຄວາມສວຍງາມ ແລະອຳນວຍຄວາມສະດວກໃຫ້ແກ່ການຈະລາຈອນໄປມາຫາສູ່ໂດຍສະເພາະໃນເທສະບານນະຄອນໄກສອນ ພົມວິຫານ ໄດ້ກໍ່ສ້າງສວນສາທາລະນະ ໄກສອນພົມວິຫານ ແລະສວນສາທາລະນະຄັນທະບູລີ ຊຶ່ງໄດ້ກາຍເປັນສັນຍາລັກຕົວເມືອງ ແລະເປັນຈຸດດຶງດູດຜູ້ຄົນ ໃນເທສະບານ ແລະນັກທ່ອງທ່ຽວພາຍໃນມາພັກຜ່ອນອອກກຳລັງກາຍ, ພົບປະສ້າງສັນໃນເວລາຍາມແລງຊົມທິວທັດທີ່ສວຍງາມກ່ອນຕາເວັນລັບຂອບຟ້າ.

    ໂອກາດນີ້, ທ່ານ ພົມມາ ວົງພະຈິດ ຫົວໜ້າໂຄງການ GMS ກໍ່ໄດ້ລາຍງານໃຫ້ຮູ້ຄວາມເປັນມາຂອງໂຄງການ, ການຈັດຕັ້ງປະຕິບັດໂຄງການແຕ່ເລີ່ມຕົ້ນຈົນເຖິງປະຈຸບັນ ແລະວາງແຜນການຈັດຕັ້ງປະຕິບັດ 6 ເດືອນທ້າຍປີ 2021 ພ້ອມນີ້, ກໍ່ໄດ້ມີການສະເໜີບັນຫາທີ່ຍັງຄ້າງຄາເພື່ອນຳມາປຶກສາຫາລືຮ່ວມກັນໃນກອງປະຊຸມຄັ້ງນີ້, ໂຄງການ GMS ປະກອບມີ 7 ໂຄງການຍ່ອຍຄື: ນະຄອນໄກສອນ ພົມວິຫານ ມີວຽກກໍ່ສ້າງປັບປຸງຮ່ອງລະບາຍນໍ້າຫ້ວຍລົງກົງຍາວ 829 ແມັດ,ກໍ່ສ້າງ ແລະຍົກລະ ດັບຖະໜົນໄກສອນ ພົມວິຫານ ຍາວ 6 ກິໂລແມັດ ກັບ 182 ແມັດ, ຖະໜົນຟ້າງຸ່ມຍາວ 2 ກິໂລແມັດ ກັບ 142 ແມັດ, ປັບປຸງສະໜາມກຳຈັດຂີ້ເຫຍື້ອທີ່ຖືກຫຼັກສຸຂະອະນາໄມ, ຈັດຊື້ອຸປະກອນເພີ່ມ ເຕີມ, ລົດເກັບຂີ້ເຫຍື້ອ ແລະສິ່ງອຳນວຍຄວາມສະດວກຢູ່ສະໜາມຂີ້ເຫຍື້ອ ແລະກໍ່ສ້າງຕ້ານເຈື່ອນແຄມຂອງຍາວ 980 ແມັດ, ກວ້າງ 50 ແມັດ; ເມືອງພີນ ແມ່ນກໍ່ສ້າງ ແລະຍົກລະດັບເສັ້ນທາງໃນ ເທສະບານເມືອງ ຍາວ 9 ກິໂລແມັດ ກັບ 978 ແມັດ ແລະເມືອງເຊໂປນແມ່ນກໍ່ສ້າງ ແລະຍົກລະດັບເສັ້ນທາງຢູ່ບ້ານແດນສະຫວັນ 3 ກິໂລແມັດ ກັບ 884 ແມັດ, ລວມມູນຄ່າໂຄງການທັງໝົດ 47,7 ລ້ານໂດລາສະຫະລັດ ມາຮອດປະຈຸບັນ, 7 ໂຄງ ການຍ່ອຍດັ່ງກ່າວໄດ້ສຳເລັດ 100%, ສ່ວນການຈັດຕັ້ງວຽກເພີ່ມກໍ່ຄືກການກໍ່ສ້າງເສັ້ນທາງຟ້າງຸ່ມ 2 ແລະປິດສະໜາມຂີ້ເຫຍື້ອເກົ່າແມ່ນສຳເລັດແລ້ວ 85% ຊຶ່ງຕາມແຜນຈະໃຫ້ສຳເລັດໃນທ້າຍເດືອນກໍລະກົດນີ້.

  ໂອກາດດຽວກັນນີ້, ໃນພິທີຍັງໄດ້ມີການມອບຫຼຽນໄຊແຮງງານຊັ້ນ II ແລະຊັ້ນ III, ຫຼຽນກາແຮງງານ ແລະ ໃບຍ້ອງຍໍທ່ານເຈົ້າແຂວງສະຫວັນນະເຂດໃຫ້ບຸກຄົນ ແລະກົມກອງລວມໝູ່ທີ່ມີຜົນງານດີເດັ່ນປະກອບສ່ວນເຂົ້າໃນການປະຕິບັດວຽກງານຂອງໂຄງການ GMS ໃນໄລຍະຜ່ານມາ ໃນນີ້ໄດ້ມອບຫຼຽນໄຊແຮງງານຊັ້ນ II ໃຫ້ກັບ 4 ກົມກອງ ແລະ28 ທ່ານ, ມອບຫຼຽນໄຊແຮງງານ ຊັ້ນ III ໃຫ້ 7 ກົມກອງ ແລະ31 ທ່ານ, ມອບຫຼຽນກາແຮງງານໃຫ້ຈຳນວນ 15 ທ່ານ ແລະໄດ້ມອບໃບຍ້ອງຍໍທ່ານເຈົ້າແຂວງໃຫ້ 23 ກົມກອງ ແລະ 22 ທ່ານ ຊຶ່ງໃຫ້ກຽດມອບໂດຍທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ.

แชร์