ວັກຊີນ ຈອນສັນ ແອັນ ຈອນສັນ1 ລ້ານກວ່າໂດສ໌ ມາຮອດລາວແລ້ວ

   ການຈັດສົ່ງວັກຊີນປ້ອງກັນພະຍາດໂຄວິດ-19 ຄັ້ງໃໝ່ ທີ່ເປັນການຊ່ວຍເຫຼືອຂອງລັດຖະບານສະຫະລັດອາເມລິກາ ຊຶ່ງແມ່ນວັກຊີນ ຈອນສັນ ແອັນ ຈອນສັນ ຫຼື ISID-19 Johnson & Johnson's Janssen (J&J/Janssen) ຈຳນວນ 1.008.000 ໂດສ໌ ໂດຍຜ່ານໂຄງການໂຄແວັກ (COVAX Facility) ໄດ້ມາເຖິງສະໜາມບິນສາກົນວັດໄຕ ນະຄອນຫຼວງວຽງຈັນ ໃນຕອນຄໍ່າ ເວລາ 19:15 ນາທີ ຂອງວັນທີ 15 ກໍລະກົດນີ້;
ໂດຍມີ ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະຜູ້ແທນຝ່າຍລາວ ພ້ອມດ້ວຍ ທ່ານ ປີເຕີ ເຮມອນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສະຫະລັດອາເມລິກາ ແລະມີຜູ້ຕາງໜ້າຈາກບັນດາອົງການຈັດຕັ້ງສາກົນປະຈຳລາວ ທຸກພາກສ່ວນກ່ຽວຂ້ອງມາຮັບການມາເຖິງຂອງວັກຊີນດັ່ງກ່າວ.
  ສະເພາະການຈັດພິທີມອບ-ຮັບຢ່າງເປັນທາງການແມ່ນຈະຈັດຂຶ້ນໃນໄວໆນີ້ຊຶ່ງການທີ່ລາວໄດ້ຮັບວັກຊີນດັ່ງກ່າວໃນຈໍານວນ 1 ລ້ານກວ່າໂດສ໌ນີ້ຈະເຮັດໃຫ້ລັດຖະບານລາວ ສະໜອງວັກຊີນໃຫ້ປະຊາຊົນໄດ້ 14% ຂອງປະຊາກອນທັງໝົດເຮັດໃຫ້ລາວເຂົ້າໃກ້ເປົ້າໝາຍທີ່ຈະສັກວັກຊີນກັນພະຍາດໂຄວິດ-19 ໃຫ້ໄດ້ 50% ຂອງປະຊາ ກອນໃນທ້າຍປີ 2021 ນີ້.

แชร์