13 ປີທະນາຄານ ເອຊີລີດາ ເຕີບໃຫຍ່ໄປຄຽງຄູ່ກັບເສດຖະກິດ-ສັງຄົມລາວ

   ທະນາຄານ ເອຊີລີດາລາວ ຈຳກັດ, ປະຊາທະນາຄານທີ່ທ່ານໄວ້ວາງໃຈສະເຫຼີມສະຫຼອງວັນສ້າງຕັ້ງທະນາຄານຄົບຮອບ 13 ປີ (8 ກໍລະກົດ 2008-8 ກໍລະກົດ 2021), ທະນາຄານຂໍຖືໂອກາດນີ້ສະແດງຄວາມຂອບໃຈມາຍັງອົງການຈັດຕັ້ງທຸກພາກສ່ວນ ແລະລູກຄ້າທີ່ໃຫ້ການສະໜັບສະໜູນດ້ວຍດີຕະຫຼອດມາວິໄສທັດຂອງທະນາຄານແມ່ນການຕອບສະໜອງການບໍລິການທາງດ້ານການເງິນທີ່ດີທີ່ສຸດໃຫ້ແກ່ປະຊາຊົນລາວໃນທົ່ວປະເທດ, ຜູ້ປະກອບການຂະໜາດນ້ອຍ ແລະຂະໜາດກາງ ແລະສືບຕໍ່ຂະຫຍາຍຕົວໄປພ້ອມໆກັນ.
  ໃນໄລຍະ 13 ປີທີ່ຜ່ານມາ, ທະນາຄານ ເອຊີລີດາ ໄດ້ມີສ່ວນຮ່ວມໃນການພັດທະນາເສດຖະກິດ-ສັງຄົມ ດ້ວຍພາລະບົດບາດທີ່ເຂັ້ມແຂງໃນຂະແໜງການທະນາຄານຂອງ ສປປ ລາວ ປະຈຸບັນແມ່ນປີທີ 13 ຂອງທະນາຄານໃນການສະໜອງຜະລິດຕະພັນ ແລະບໍລິການຂອງທະນາຄານໃຫ້ລູກຄ້າທຸກຊົນຊັ້ນທຸກຂະແໜງການໃນທົ່ວປະເທດ.
   ຜູ້ອຳນວຍການໃຫຍ່ຂອງທະນາຄານ ເອຊີລີດາລາວ ຈຳກັດ, ທ່ານ ລັດສະໝີ ຫງວນ ກ່າວວ່າ: ມາຮອດເດືອນກໍລະກົດທະນາຄານ ເອຊີລີດາລາວ ສາມາດສະໜອງແຫລ່ງທຶນໃຫ້ກັບລູກຄ້າສິນເຊື່ອທັງໝົດ ຈຳນວນ 157 ລ້ານໂດລາ ແລະສາມາດລະດົມເງິນຝາກໄດ້ຫລາຍກວ່າ 135 ລ້ານໂດລາ ນອກຈາກນີ້ໃນເດືອນພຶດສະພາ ທີ່ຜ່ານມາທະນາຄານ ເອຊີລີດາ ລາວ ຈຳກັດ ໄດ້ເພີ່ມທຶນຈົດທະບຽນຈາກ 340 ຕື້ກີບ ມາເປັນ 380 ຕື້ກີບ.
    ນີ້ເປັນການສະເຫຼີມສະຫຼອງຄົບຮອບ 13 ປີຂອງພວກເຮົາໃນການເປັນຜູ້ໃຫ້ບໍລິການທາງດ້ານການເງິນທີ່ເຂັ້ມແຂງໂດຍສະເພາະແມ່ນການໃຫ້ກູ້ຢືມແກ່ທຸລະກິດຂະໜາດນ້ອຍ ແລະຂະໜາດກາງຂ້າພະເຈົ້າຂໍສະແດງຄວາມຂອບໃຈມາຍັງລັດຖະບານ, ເຈົ້າໜ້າທີ່ ແລະທະນາຄານແຫ່ງ ສປປ ລາວ ທີ່ໃຫ້ຄຳແນະນຳໂດຍສະເພາະແມ່ນລູກຄ້າທຸກທ່ານ, ຄູ່ຮ່ວມທຸລະກິດທີ່ໃຫ້ການສະໜັບສະໜູນຕະຫຼອດມາ, ຂໍສະແດງຄວາມຂອບໃຈມາຍັງຜູ້ຖືຫຸ້ນ, ສະພາບໍລິຫານ, ຜູ້ບໍລິຫານ ແລະພະນັກງານທຸກຄົນໃນການມີສ່ວນຮ່ວມ, ການເຮັດວຽກເປັນທີມທີ່ດີ ແລະມີຄວາມມຸ່ງໝັ້ນຕໍ່ການປະຕິບັດງານ.
  ທ່ານຍັງໄດ້ກ່າວຕື່ມອີກວ່າ: ດ້ວຍປະສົບການທາງດ້ານການບໍລິການທະນາຄານ, ທະນາຄານ ເອຊີລີດາລາວໄດ້ມີການຍົກລະດັບການບໍລິການທາງການເງິນ ແລະຜະ ລິດຕະພັນດີຈິຕອລເພື່ອໃຫ້ລູກຄ້າ ແລະສາທາລະນະຊົນທຸກທ່ານເຂົ້າເຖິງການບໍລິການຂອງທະນາຄານໄດ້ທຸກເວລາ.
   ທະນາຄານ ເອຊີລີດາ ລາວ ຈຳກັດ ເປັນທະນາຄານທຸລະກິດຕ່າງປະເທດທີ່ດຳນີນທຸລະກິດໃນ ສປປ ລາວ ມາຫຼາຍກວ່າ 13 ປີ ໃນລະດັບພູມີພາກ, ກຸ່ມເອຊີລີດາປະກອບມີ: ທະນາຄານ ເອຊີລີດາ ມະຫາຊົນ ເຊິ່ງເປັນບໍລິສັດແມ່ ແລະມີບໍລິສັດລູກ 4 ແຫ່ງ ທີ່ດໍາເນີນທຸລະກິດຢູ່ປະເທດກຳປູເຈຍ, ລາວ ແລະມຽນມາ, ມີຊັບສິນລວມທັງໝົດຫຼາຍກວ່າ 6,6 ຕື້ໂດລາສະຫະລັດ, ມີ 319 ສາຂາ-ສໍານັກງານ, 809 ຕູ້ ATM ແລະໃຫ້ບໍລິການລູກຄ້າຫຼາຍລ້ານຄົນພ້ອມທັງບໍລິການໂອນເງິນທົ່ວໂລກ.

แชร์