ລາວຈະມີໄຟຟ້າແສງຕາເວັນໃຫຍ່ສຸດໃນໂລກ

ໃນວັນທີ 12 ກໍລະກົດ 2021 ລັດຖະບານ ແຫ່ງ ສປປ ລາວ ແລະບໍລິສັດ ໄຟຟ້າຝຣັ່ງ (EDF) ໄດ້ຮ່ວມລົງນາມໃນສັນຍາວ່າດ້ວຍການພັດທະນາໂຄງການ (PDA) ພະລັງງານໄຟຟ້າແສງຕາເວັນແບບປະສົມປະສານທີ່ອ່າງເກັບນໍ້າເຂື່ອນ ໄຟຟ້ານໍ້າເທີນ 2 ຢູ່ແຂວງຄໍາມ່ວນ, ຕາງໜ້າຝ່າຍລາວຮ່ວມລົງນາມໃນຄັ້ງນີ້ແມ່ນ ທ່ານ ນາງ ຄໍາຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ ແລະຕາງໜ້າຝ່າຍບໍລິສັດ EDF ໂດຍທ່ ານ ນາງ ເບອາທຣິດ ບັບຟົງ ອໍານວຍການປະຈໍາຄະນະບໍລິຫານກຸ່ມບໍລິສັດ EDF ຜູ້ຊີ້ນໍາພະແນກສາກົນ. 

    ພິທິລົງນາມໄດ້ຈັດຂຶ້ນໃນຮູບແບບການປະຊຸມທາງໄກ, ໂດຍການໃຫ້ກຽດເຂົ້າຮ່ວມຂອງ ທ່ານ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ບັນດາຜູ້ຕາງໜ້າຈາກກະຊວງການເງິນ, ກະຊວງການຕ່າງປະເທດ, ກະຊວງຊັບພະຍາກອນທໍາມະຊາດ ແລະ ສິ່ງ ແວດລ້ອມ, ເອກອັກຄະລັດຖະທູດຝຣັ່ງ ແລະລາຊະອາ ນາຈັກໄທ ປະຈໍາ ສປປ ລາວ ແລະຄະນະອໍານວຍການບໍລິສັດໄຟຟ້າ ນໍ້າເທີນ 2 (NTPC) ແລະການຮ່ວມຮູບແບບການປະຊຸມທາງໄກໂດຍບັນດາຜູ້ຕາງໜ້າບໍລິສັດຜະລິດໄຟຟ້າມະຫາຊົນປະເທດໄທຈໍາກັດ (EGCO) ແລະ ບໍລິສັດ ໄຟຟ້າຝຣັ່ງ (EDF) ຈາກນະຄອນຫຼວງປາຣີປະເທດຝຣັ່ງ.

   ໂຄງການພະລັງງານໄຟຟ້າແສງຕາເວັນແບບປະສົມປະສານນໍາພາໂດຍບໍລິສັດໄຟຟ້າຝຣັ່ງ (E DF) ແລະຮ່ວມພັດທະນາໂດຍລັດວິສາຫະກິດຖືຮຸ້ນລາວ (LH SE) ແລະບໍລິສັດຜະລິດໄຟຟ້າມະຫາຊົນປະເທດໄທຈໍາກັດ (EGCO) ໂດຍຄາດຄະເນວ່າຈະເລີ່ມການກໍ່ສ້າງໃນປີ 2022 ແລະເລີ່ມຜະລິດພະລັງງານໄຟຟ້າໃນປີ 2024 ຊຶ່ງຈະເປັນໂຄງການທີ່ໃຫຍ່ທີ່ສຸດໃນໂລກ, ມີກໍາລັງຕິດຕັ້ງ 240 ເມກາວັດກວມເອົາເນື້ອທີ່ 3,2 ກິໂລຕາແມັດ (ໜ້ອຍກ່ວາ 1 ສ່ວນຮ້ອຍຂອງອ່າງເກັບນໍ້າທີ່ມີລະດັບນໍ້າເຕັມອ່າງ).

   ການຕິດຕັ້ງພະລັງງານໄຟຟ້າແບບປະສົມປະສານຈະສາມາດຜະລິດພະລັງງານໄຟຟ້າຈາກແສງຕາເວັນໄປຄຽງຄູ່ກັບການຜະລິດໄຟຟ້າພະລັງງານນໍ້າຕົກ (1.080 ເມກາວັດ), ມີຈຸດປະສົງເພື່ອຮັກສານໍ້າໄວ້ເມື່ອມີແສງຕາເວັນໂດຍລະບົບຜະລິດໄຟຟ້າພະລັງງານນໍ້າຈະນໍາໃຊ້ນໍ້າໜ້ອຍລົງໂດຍຈະນໍາໃຊ້ພະລັງງານແສງຕາເວັນແທນ, ເພື່ອເກັບຮັກສານໍ້າໄວ້ໃຊ້ໃນລະດູແລ້ງ. ໂດຍສະເລ່ຍໂຄງການນີ້ຈະຊ່ວຍເພີ່ມກໍາລັງການຜະລິດໄຟຟ້າທັງໝົດຂອງໂຄງການໄຟຟ້ານໍ້າເທີນ 2 ຂຶ້ນອີກ 6 %. “

 ໂຄງການໄຟຟ້າພະລັງງານແສງຕາເວັນນໍ້າເທີນ 2 ຈະເປັນການປະກອບສ່ວນທີ່ສໍາຄັນຕໍ່ນະໂຍບາຍດ້ານພະລັງງານຂອງພວກເຮົາ, ນັ້ນແມ່ນການສົ່ງເສີມການຜະລິດໄຟຟ້າພະລັງງານນໍ້າໄປພ້ອມກັບພະລັງງານທົດແທນອື່ນໆ. ”ໂຄງການນໍ້າເທີນ 2 ເປັນໂຄງການໄຟຟ້າພະລັງງານນໍ້າ (ກໍາລັງຕິດຕັ້ງ 1.080 ເມກາວັດ) ພາຍໃຕ້ການຮ່ວມມືລະຫວ່າງເອກະຊົນກັບລັດຖະບານແຫ່ງ ສປປ ລາວ ທີ່ຖືຮຸ້ນໃນໂຄງການຈໍານວນ 25% ໂດຍລັດວິສາຫະກິດຖືຮຸ້ນລາວ (LHSE), ບໍລິສັດໄຟຟ້າຝຣັ່ງ (EDF) ຖືຮຸ້ນໃນໂຄງການຈໍານວນ 40% ແລະບໍລິສັດຜະລິດໄຟຟ້າມະຫາຊົນປະເທດໄທຈໍາກັດ (EGCO) ຖືຮຸ້ນໃນໂຄງການຈໍານວນ 35% ແລະມີສັນຍາສໍາປະ ທານ 25 ປີ ນັບຕັ້ງແຕ່ປິ 2010. 

   ໂຄງການນໍ້າເທີນ 2 ຜະລິດໄຟຟ້າ ຈໍານວນ 6.000 ກິກກາວັດໂມງ (GWh) ຕໍ່ປີ, ສະໜອງໄຟຟ້າພາຍໃນ ສປປ ລາວ 5% ແລະສົ່ງອອກໃຫ້ຣາຊະອະນາຈັກໄທ 95%. ບໍລິສັດໄຟຟ້າຝຣັ່ງ (EDF) ແມ່ນບໍລິສັດຝຣັ່ງທີ່ຄຸ້ມຄອງໂດຍລັດຖະບານ ແລະເປັນຜູ້ນໍາໃນຕະຫຼາດພະລັງງານໃນຢູໂຣບ. ກຸ່ມບໍລິສັດ EDF ແມ່ນບໍລິສັດພະລັງງານທີ່ດໍາເນີນກິດຈະການໃນທຸກສາຂາ ອຸດສາຫະກໍາ ເຊັ່ນ: ການຜະລິດ, ການສະໜອງ, ການຈໍາໜ່າຍ, ການຄ້າ ແລະຂາຍພະລັງງານ.

   ລັດວິສາຫະກິດຖືຮຸ້ນລາວ (LHSE) ແມ່ນບໍລິສັດຂອງລັດວິສາຫະກິດສ້າງຕັ້ງຂຶ້ນໃນປີ 2005 ເພື່ອຖືຮຸ້ນໃຫ້ລັດຖະບານໃນບັນດາໂຄງການໂຄງຮ່າງພື້ນຖານຂະ ໜາດໃຫຍ່, ລວມທັງໂຄງການນໍ້າເທີນ 2. ບໍລິສັດຜະລິດໄຟຟ້າມະຫາຊົນປະເທດໄທຈໍາກັດ (EG CO) ແມ່ນຜູ້ຜະລິດພະລັງງານເອກະຊົນຜູ້ທໍາອິດໃນຣາຊະອະ ນາຈັກໄທ. ໂຮງງານໄຟຟ້າຂອງ EGCO ຕອບສະໜອງໄຟຟ້າສໍາລັບການຊົມໃຊ້ພາຍໃນປະເທດໄທ ແລະຕ່າງປະເທດ, ໂດຍນໍາໃຊ້ແຫຼ່ງພະລັງງານຫຼາຍຊະນິດເຊັ່ນ: ແກັສທຳມະຊາດ, ຖ່ານຫີນ, ຊີວະມວນ, ພະລັງງານນໍ້າ, ພະລັງງານແສງ ຕາເວັນ, ພະລັງງານລົມ ແລະຄວາມຮ້ອນໃຕ້ດິນ.

แชร์