ນາຍົກເນັ້ນ 6 ບັນຫາດຳເນີນຄະດີຍຸຕິທຳ

ຂ່າວ: ມະໄລວັນ 

    ທ່ານ ພັນຄຳ ວິພາວັນ ນາຍົກລັດຖະມົນຕີເຂົ້າຮ່ວມກອງປະຊຸມກ່ຽວກັບການດໍາເນີນຄະດີຕາມຂະບວນການຍຸຕິທໍາຄັ້ງທີ VI ທີ່ສານປະຊາຊົນສູງສຸດໃນວັນທີ 15 ກໍລະກົດນີ້, ໂດຍການເປັນປະທານຂອງ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ມີທ່ານລັດຖະມົນຕີກະຊວງປ້ອງກັນຄວາມສະຫງົບ, ລັດຖະມົນຕີກະຊວງຍຸຕິທໍາ, ຫົວໜ້າອົງການໄອຍະການປະຊາຊົນສູງສຸດ, ພ້ອມດ້ວຍການນໍາຂອງ 4 ພາກສ່ວນ ແລະແຂກຖືກເຊີນເຂົ້າຮ່ວມ.

    ໄດ້ໃຫ້ທິດຊີ້ນໍາ 6 ບັນຫາ ຄື: ໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານທີ່ຢູ່ໃນຄວາມຮັບຜິດຊອບຂອງຕົນ (ເຈົ້າໜ້າທີ່ຕໍາຫຼວດ, ໄອຍະການປະຊາຊົນ, ຜູ້ພິພາກສາ ແລະພະນັກງານປະຕິບັດຄໍາຕັດສິນຂອງສານ) ໃຫ້ມີຈັນຍາບັນ-ຈັນຍາທໍາໃນການປະຕິບັດໜ້າທີ່ແທ້ໆເນື່ອງຈາກວ່າໃນເງື່ອນໄຂແຫ່ງການປຕິບັດກົນໄກເສດຖະກິດຕະຫຼາດ, ການເຊື່ອມໂຍງກັບສາກົນບວກໃສ່ກຸ່ມຄົນບໍດີ ແລະອິດທິກໍາລັງປໍລະປັກໄດ້ດໍາເນີນສົງຄາມຫັນປ່ຽນໂດຍສັນຕິຊຶ່ງໄດ້ຊັກຈູງໃຫ້ສະມາຊິກພັກ-ພະນັກງານຂອງພວກເຮົາຈຳນວນໜຶ່ງບໍ່ມີຫຼັກໝັ້ນ, ອຸດົມການ, ຂາດຈັນຍາບັນ, ຈັນຍາທໍາ.

 ສ້າງເງື່ອນໄຂ, ສວຍໃຊ້ຊ່ອງຫວ່າງຂອງກົດໝາຍກົດໜ່ວງການດໍາເນີນຄະດີຊັກຊ້າ, ຫຼົບໄປຫຼົບມາ, ບໍ່ໄປຕາມກົດໝາຍກໍານົດເພື່ອຫາຜົນປະໂຫຍດສ່ວນຕົວ, ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກກ່ຽວກັບການດໍາເນີນຄະດີຕາມຂະບວນການຍຸຕິທໍາ ກໍຄືມະຕິ 112/ກມ ສພ, ລົງວັນທີ 2 ມິຖຸນາ 2021 ວ່າດ້ວຍການຍົກສູງປະສິດທິພາບໃນການດຳເນີນຄະດີຕາມຂະບວນຍຸຕິທໍາໃຫ້ເປັນແຜນງານປະຕິບັດລະອຽດແຕ່ລະດ້ານວ່າການສືບສວນ-ສອບສວນຈະປັບປຸງ ແກ້ໄຂດ້ານໃດໃຫ້ຖືກເປົ້າໝາຍ, ມີຫຼັກຖານຄົບຖ້ວນຮັດກຸມ.

   ການສັ່ງຟ້ອງຈະເຮັດແນວໃດໃຫ້ສັ່ງຟ້ອງຜູ້ທີ່ໄດ້ກະທໍາຜິດແທ້ໃຫ້ສານຕັດສິນ, ສຸມໃສ່ສ້າງພະນັກງານດໍາເນີນຄະດີໃຫ້ມີຄວາມຮູ້ຄວາມສາມາດ, ມີຄວາມຊ່ຽວຊານ ແລະເປັນມືອາຊີບໃນສະເພາະດ້ານເພື່ອເຮັດໃຫ້ບັນຫາຂໍ້ຂັດແຍ່ງ ແລະການລະເມີດກົດໝາຍທີ່ເກີດຂຶ້ນໄດ້ຮັບການແກ້ໄຂຢ່າງວ່ອງໄວ ແລະຖືກຕ້ອງເນື່ອງຈາກວ່າການພັດທະນາເສດຖະກິດ-ສັງຄົມມີການຂະຫຍາຍຕົວສູງ, ການຄ້າ-ການລົງທຶນໄດ້ເປີດກວ້າງຢູ່ໃນສັງຄົມ. 

    ຂໍ້ຂັດແຍ່ງ ແລະອາຊະຍາກໍາທີ່ເກີດຂຶ້ນກໍ່ໄປຄຽງຄູ່ກັບການພັດທະນາ, ມີຄວາມຫຍຸ້ງຍາກ, ສັບສົນ, ສະຫຼັບສັບຊ້ອນ ແລະພົວພັນກັບຫຼາຍບຸກຄົນ, ຫຼາຍຝ່າຍທັງຢູ່ ພາຍໃນປະເທດ ແລະຕ່າງປະເທດ, ພົວພັນຫຼາຍກົດໝາຍທັງກົດໝາຍພາຍໃນປະເທດ ແລະກົດໝາຍສາກົນ, ເອົາໃຈໃສ່ປັບປຸງແບບແຜນ, ກົນໄກການດໍາເນີນຄະດີຢູ່ແຕ່ລະຂັ້ນຕອນໃຫ້ມີຄວາມວ່ອງໄວ,ໂປ່ງໃສ ແລະຖືກຕ້ອງຕາມກົດໝາຍໃຫ້ສາມາດກວດສອບໄດ້ທຸກຂັ້ນຕອນການດຳເນີນຄະດີ,ເຮັດຕາມກົດໝາຍກໍານົດຢ່າງເຄັ່ງຄັດ.

  ຫຼີກລ້ຽງທີ່ສຸດບໍ່ມີກົດໝາຍ, ບໍ່ມິນິຕິກໍາກໍ່ພາກັນເຮັດ, ສວຍໃຊ້ຊ່ອງຫວ່າງກົດໝາຍກົດໜ່ວງທ່ວງດຶງການດຳເນີນຄະດີໃຫ້ຊັກຊ້າແກ່ຍາວ ແລະມີສອງມາດຕະຖານໃນການປະຕິບັດພາໃຫ້ເກີດມີການຊັ່ງຊາປຽບທຽບການແກ້ໄຂຄະດີຂອງແຕ່ລະອົງການ, ເອົາໃຈໃສ່ໂຄສະນາເຜີຍແຜ່ກົດໝາຍໃຫ້ກວ້າງຂວາງ ແລະທົ່ວເຖິງໃນສັງຄົມເພື່ອໃຫ້ປະຊາຊົນຮັບຮູ້, ເຂົ້າໃຈຕໍ່ກົດໝາຍ, ຍົກສູງສະຕິກົດໝາຍຢູ່ໃນສັງຄົມໃຫ້ສູງຂຶ້ນເນື່ອງຈາກວ່າຜ່ານມາກົດໝາຍ ແລະນິຕິກໍາໃຕ້ກົດໝາຍໄດ້ອອກມາຫຼາຍແຕ່ກົດໝາຍ ແລະນິຕິກໍາເຫຼົ່ານັ້ນຍັງຢູ່ໃນຕູ້, ຢູ່ຫ້ອງການເຮັດວຽກ, ຍັງບໍ່ໄດ້ແຈກຢາຍ ຫຼືເຜີຍແຜ່ໃຫ້ປະຊາຊົນ ແລະພາກສ່ວນອື່ນຮັບຮູ້ເຂົ້າໃຈຢ່າງທົ່ວເຖິງຈຶ່ງເຮັດໃຫ້ການສ້າງຂໍ້ຜູກພັນ, ສັນຍາຕ່າງໆ ບໍ່ໄປຕາມກົດໝາຍກໍານົດ, ມີການລະເມີດກົດໝາຍ, ກໍອາດຊະຍາກໍາທີ່ຂັດກັບກົດໝາຍນັບມື້ນັບຫຼາຍຂຶ້ນ, ເພີ່ມທະວີຄວາມ ຮັບຜິດຊອບໃນການປະຕິບັດໜ້າທີ່ວິຊາສະເພາະຂອງແຕ່ລະພາກສ່ວນໃຫ້ເຂັ້ມງວດຕາມກົດໝາຍເພື່ອເຮັດໃຫ້ການດໍາເນີນຄະດີ, ມີຄວາມໂປ່ງໃສ, ວ່ອງໄວ ແລະມີ ຄຸນນະພາບເພື່ອປົກປ້ອງສິດຜົນປະໂຫຍດອັນຊອບທໍາຂອງລັດ, ຂອງພົນລະເມືອງ. 

   ຮັບປະກັນສິດເສລີພາບ, ກຽດສັກສີ, ສຸຂະພາບ ແລະຊີວິດຂອງພົນລະເມືອງຢູ່ໃນທຸກຂັ້ນຕອນຂອງການດຳເນີນຄະດີຕາມຂະບວນການຍຸຕິທໍາ.

แชร์