ບົວລະພາທຳລາຍຈັກຕັດໄມ້ ແລະສັດນໍ້າ-ສັດປ່າ

ຂ່າວ: ບຸນປະພາດ 

   ເພື່ອຈັດຕັ້ງປະຕິບັດຕາມລະບຽບກົດໝາຍກ່ຽວກັບປ່າໄມ້, ສັດນໍ້າ-ສັດປ່າ ແລະຄໍາສັ່ງເລກທີ 15/ນຍ, ເລກທີ 05/ນຍ ກ່ຽວກັບຂອງກາງທີ່ອາຍັດ ແລະທ້ອນໂຮມໃນໄລຍະຜ່ານມາດັ່ງນັ້ນ, ໃນຕອນເຊົ້າຂອງວັນທີ 13 ກໍລະກົດ 2021 ທີ່ຜ່ານມານີ້ຢູ່ທີ່ຫ້ອງການກະສິກຳ ແລະປ່າໄມ້ເມືອງບົວລະພາ ໂດຍຮ່ວມກັບພະແນກການທີ່ກ່ຽວຂ້ອງໄດ້ຈັດພິທີທຳລາຍຈັກຕັດໄມ້ ຫຼືຈັກສະຕີນ ແລະສັດນໍ້າສັດປ່າທີ່ໄດ້ອາຍັດໄວ້ໂດຍພາຍໃຕ້ການນຳພາຂອງທ່ານ ຄຳປອນ ກາລີແກ້ວດວງສອນ ຮອງເລຂາພັກເມືອງ, ທ່ານ ສຸກຂະເສີມ ແກ້ວຈັນທະລາ ຮອງເຈົ້າເມືອງບົວລະພາ ແລະທ່ານ ຄຳຮູ້ ວົງພະຈັນ ຫົວໜ້າຫ້ອງການກະສິກຳ ແລະປ່າໄມ້ເມືອງເຂົ້າຮ່ວມມີບັນດາທ່ານໃນຄະນະປະຈຳພັກເມືອງ, ຄະນະພັກເມືອງ, ຫົວໜ້າ, ຮອງຫົວໜ້າຫ້ອງການຂະແໜງການ, ທີ່ກ່ຽວຂ້ອງ ແລະພະນັກງານວິຊາການເຂົ້າຮ່ວມນຳຢ່າງພ້ອມພຽງ.

    ທ່ານ ຄຳຮູ້ ວົງພະຈັນ ຫົວໜ້າຫ້ອງການກະສິກຳ ແລະປ່າໄມ້ເມືອງບົວລະພາກໍ່ໄດ້ລາຍງານຜົນການຈັດຕັ້ງປະຕິບັດການສະກັດກັ້ນ, ຕ້ານການລັກລອບຂຸດຄົ້ນ, ຊື້ຂາຍ, ເຄື່ອນຍ້າຍໄມ້ ແລະສັດນໍ້າ-ສັດປ່າ ຕາມລະບຽບກົດໝາຍກ່ຽວກັບປ່າໄມ້, ສັດນໍ້າ-ສັດປ່າ ໃນໄລຍະ ຜ່ານມາຈົນເຖິງປະຈຸບັນ, ຊຶ່ງຈັກຕັດໄມ້ (ຈັກສະຕີນ) ທີ່ນຳມາທຳລາຍໃນຄັ້ງນີ້ມີຈຳນວນທັງໝົດ 1.220 ໜ່ວຍ ແລະສິ້ນສ່ວນສັດປ່າ, ສັດປ່າທີ່ຍັງມີຊີວິດລວມມີຈຳນວນທັງໝົດ 18 ໂຕ ປ່ອຍຄືນສູ່ທຳມະຊາດຈຳນວນ 7 ໂຕ, ຊຶ່ງສັດປ່າທີ່ຕາຍ ແລະນຳມາທຳລາຍມີຈຳນວນທັງໝົດ 11 ໂຕ ໃນນັ້ນມີ ໂຕຫອນ, ໂຕເຫງັນ, ໂຕບ່າງລົ້ວ, ໂຕກະຮອກ ແລະໂຕຟານ, ຫຼັງຈາກນັ້ນກໍ່ພ້ອມກັນທຳລາຍສັດປ່າ ແລະເຄື່ອງຈັກຕັດໄມ້ດັ່ງກ່າວ.

   ໃນຕອນທ້າຍຂອງພິທີຄັ້ງນີ້ຍັງໄດ້ຮັບຟັງການໂອ້ລົມຂອງທ່ານ ຄຳປອນກາລີ ແກ້ວດວງສອນ ຮອງເລຂາພັກເມືອງເບື້ອງຕົ້ນທ່ານກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ພາກສ່ວນທີ່ກ່ຽວຂ້ອງທີ່ສາມາດຈັດຕັ້ງປະຕິບັດວຽກງານດັ່ງກ່າວໄດ້ເປັນຢ່າງດີ ພ້ອມກັນນັ້ນທ່ານຍັງໄດ້ ໃຫ້ທຸກພາກສ່ວນຕ້ອງໄດ້ປຸກລະດົມແນວຄິດຈິດໃຈຂອງພໍ່ແມ່ປະຊາຊົນໃຫ້ພ້ອມພາກັນຊ່ວຍອານຸລັກຮັກສາປ່າໄມ້ ແລະສັດນໍ້າ-ສັດປ່າເພື່ອເຮັດໃຫ້ປ່າໄມ້ ແລະສັດນໍ້າ-ສັດປ່າ ພາຍໃນເມືອງບົວລະພາໄດ້ມີຄວາມອຸດົມສົມບູນຕະຫຼອດໄປ.

แชร์