ເຈົ້າໜ້າທີ່ສ້າງເງື່ອນໄຂແກ່ແຮງງານລາວກັບຄືນປະເທດ

ຂ່າວ: ບຸນນິກ 

    ເພື່ອປະຕິບັດຕາມຄໍາສັ່ງຂອງທ່ານນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ແລະບັນດາແຈ້ງການກ່ຽວກັບມາດຕະການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດ COVID-19 ບໍ່ ໃຫ້ແຜ່ລາມອອກເປັນວົງກວ້າງຢູ່ ສປປ ລາວ ກົມຕຳຫຼວດກວດຄົນເຂົ້າ-ອອກເມືອງກະຊວງປ້ອງກັນຄວາມສະຫງົບຈຶ່ງແຈ້ງໃຫ້ເຈົ້າໜ້າທີ່ກ່ຽວຂ້ອງເອົາໃຈໃສ່ປະສານສົມທົບກັບດ່ານຊຶ່ງໜ້າເພື່ອຮັບເອົາແຮງງານລາວ ຫຼືພົນລະເມືອງລາວທີ່ຕົກຄ້າງຢູ່ຣາຊະອານາຈັກໄທ, ໂດຍຕ້ອງປະຕິບັດຕາມກົນໄກ.

    ສຳລັບແຮງງານລາວ ຫຼືພົນລະເມືອງລາວທີ່ມີເອກະສານເດີນທາງຖືກຕ້ອງ, ຄົບຖ້ວນໃຫ້ຖືເອົາກົນໄກການປະສານສົມທົບກັບດ່ານຊຶ່ງໜ້າເພື່ອຮັບເອົາເຂົາເຈົ້າກັບຄືນ ສປປ ລາວ, 2. ການຮັບເອົາແຮງງານລາວ ຫຼືພົນລະເມືອງລາວ ທີ່ເດີນທາງໄປຣາຊະອານາຈັກໄທແບບບໍ່ຖືກຕ້ອງໃຫ້ປະຕິບັດຄືດັ່ງນີ້: (ສຶກສາອົບຮົມ, ກ່າວເຕືອນ ແລະຫ້າມບໍ່ໃຫ້ມີການປັບໃໝ).

  ຜູ້ທີ່ມີເອກະສານ ຫຼືຂໍ້ມູນທີ່ສາມາດຢັ້ງຢືນວ່າເປັນພົນລະເມືອງລາວເຊັ່ນ: ບັດປະຈຳຕົວ, ສໍາມະໂນຄົວ ຫຼືໜັງສືຢັ້ງຢືນອື່ນໃຫ້ປະຕິບັດຕາມກົນໄກການປະສານສົມທົບກັບດ້ານເຊິ່ງໜ້າເພື່ອຮັບເອົາເຂົາເຈົ້າກັບຄືນ ສປປ ລາວ.

  ຜູ້ທີ່ບໍ່ມີເອກະສານ ຫຼືຂໍ້ມູນທີ່ບໍ່ສາມາດຢັ້ງຢືນວ່າເປັນພົນລະເມືອງລາວໃຫ້ປະສານສົມທົບກັບດ່ານເຊິ່ງໜ້າເພື່ອເກັບກໍາຂໍ້ມູນເຊັ່ນ: ຊື່, ນາມສະກຸນ, ວັນເດືອນປີເກີດ, ທີ່ຢູ່ໃນ ສປປ ລາວ, ໄປເຮັດວຽກຫຍັງຢູ່ໄທ,ເບີໂທພໍ່-ແມ່ ຫຼືຍາດພີ່ນ້ອງຢູ່ລາວເພື່ອສັງລວມຂໍ້ມູນປະສານຫາພາກສ່ວນກ່ຽວຂ້ອງພິສູດວ່າເປັນພົນລະເມືອງລາວແທ້ກ່ອນຈະອະນຸຍາດໃຫ້ເດີນທາງເຂົ້າ ສປປ ລາວ.

     ການຮັບເອົາພົນລະເມືອງລາວ ຫຼືແຮງງານລາວທຸກຄັ້ງຕ້ອງຮີບຮ້ອນປະສານສົມທົບກັບຄະນະສະເພາະກິດທ້ອງຖິ່ນນັ້ນເພື່ອພາຕົວພວກກ່ຽວໄປກວດຫາເຊື້ອ COVID-19 ແລະໄປຈໍາກັດບໍລິເວນຕາມສະຖານທີ່ທີ່ກໍານົດໄວ້, ຈາກນັ້ນໃຫ້ສັງລວມຂໍ້ມູນລາຍງານກົມຕໍາຫຼວດກວດຄົນເຂົ້າ-ອອກເມືອງປະຈໍາວັນ (14:00 ໂມງ) ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ.

แชร์