ຈໍາປາສັກມີແຜນສ້າງອຸທິຍານແຫ່ງຊາດ ດົງຫົວສາວ ແລະເຊປຽນເປັນແຫຼ່ງທ່ອງທ່ຽວ

ຂ່າວ: ໂພທິລາດ 

    ທ່ານ ວິໄລວົງ ບຸດດາຄໍາ ເຈົ້າແຂວງໆຈໍາປາສັກໄດ້ມີຄໍາເຫັນຕໍ່ກອງປະຊຸມວິຊາການແຜນພັດທະນາທ່ອງທ່ຽວອະນຸລັກເຂດອຸທິຍານແຫ່ງຊາດ ດົງຫົວສາວ ແລະເຊປຽນແບບໝັ້ນຄົງ ແລະຍືນຍົງໃນພ້ອມອະທິບາຍສິດໜ້າທີ່ ແລະຜົນປະໂຫຍດຂອງຜູ້ສໍາປະທານ.

   ທ່ານເຈົ້າແຂວງໆຈໍາປາສັກໄດ້ກ່າວໃນກອງປະຊຸມວິຊາການແຜນພັດທະນາທ່ອງທ່ຽວອະນຸລັກໃນເຂດອຸທິຍານແຫ່ງຊາດດົງຫົວສາວ ແລະເຊປຽນແບບໝັ້ນຄົງ ແລະຍືນຍົງເມື່ອວັນທີ 10 ກໍລະກົດ 2021 ຜ່ານວ່າ: ວຽກງານການທ່ອງທ່ຽວທໍາມະຊາດ, ສໍາລັບແຂວງຈໍາປາສັກມີນິຕິກໍາຄຸ້ມຄອງ ແລະ ພັດທະນາທີ່ດິນປ່າໄມ້ໃນທົ່ວແຂວງ, ເພື່ອເປັນການຍົກລະດັບການຄຸ້ມຄອງ-ປົກ ປັກຮັກສາປ່າໄມ້ໃຫ້ມີຄວາມໂດດເດັ່ນຂຶ້ນຕື່ມລັດຖະບານຈຶ່ງໄດ້ຮັບຮອງ ແລະປະກາດສ້າງຕັ້ງອຸທິຍານແຫ່ງຊາດດົງຫົວສາວ ແລະເຊປຽນຂຶ້ນຢ່າງເປັນທາງການໃນທ້າຍເດືອນມີນາ 2021, ຊຶ່ງວຽກງານການທ່ອງທ່ຽວທໍາມະຊາດໃນເຂດອຸທິຍານກໍ່ຄືເຂດປ່າສະຫງວນມັນແມ່ນຫຼັກ ການ ແລະມາດຕາການໜຶ່ງທີ່ໄດ້ປະກອບສ່ວນໃນການປົກປັກຮັກສາຊັບພະຍາກອນປ່າໄມ້ ແລະຊີວະນາໆພັນ ແລະຍືນຍົງການພັດທະນາຕາມທິດສີຂຽວ ແລະຍືນຍົງ (ໝາຍວ່າການນໍາໃຊ້ຊັບພະຍາກອນທໍາມະຊາດແບບສະຫຼາດ ແລະບໍ່ມີວັນບົກແຫ້ງ). 

   ແຂວງຈໍາປາສັກມີເນື້ອທີ່ດິນປ່າໄມ້ 1,06 ລ້ານເຮັກຕາ, ກວມກວ່າ 69 % ແລະໃນນັ້ນມີປ່າສະຫງວນແຫ່ງຊາດເຖິງ 3 ແຫ່ງຄື: ພູຊຽງທອງຕັ້ງຢູ່ດ້ານຕາເວັນຕົກສຽງເໜືອຂອງແຂວງ, ດົງຫົວສາວ ແລະເຊປຽນ, ຊຶ່ງທັງສອງເຂດນີ້ແມ່ນໄດ້ປະກາດເປັນອຸທິຍານແຫ່ງຊາດແລ້ວ, ຖ້າທຸລະກິດໃດທີ່ພົວພັນກັບການນໍາໃຊ້ຊັບພະຍາກອນທໍາມະຊາດ, ໂດຍສະເພາະແມ່ນວຽກງານທ່ອງທ່ຽວທໍາມະຊາດແມ່ນລັດຈະມີນະໂຍບາຍຕໍ່ກັບການເຊົ່າສໍາປະທານ ຫຼືສໍາປະທານທີ່ດິນປ່າໄມ້ເພື່ອການທ່ອງທ່ຽວທໍາມະຊາດເປັນພິເສດ ແລະຈະອໍານວຍຄວາມສະດວກຕໍ່ກັບວຽກງານນີ້,ໂດຍທີ່ລັດຖະບານໄດ້ມອບສິດໃຫ້ແກ່ອົງການປົກຄອງທ້ອງຖິ່ນໄດ້ມີສ່ວນຮ່ວມ ແລະອະນຸ ຍາດຕາມຂອບເຂດສິດ, ເພື່ອຫຼຸດຜ່ອນຂັ້ນຕອນຄວາມແກ່ຍາວໃນການປະກອບເອກະສານສ້າງຕັ້ງ, ນະໂຍບາຍຕໍ່ກັບການປະກອບພັນທະໃຫ້ແກ່ກອງທຶນການຄຸ້ມຄອງ ແລະປົກປັກຮັກສາປ່າໄມ້ພຽງ 1% ຂອງລາຍຮັບທັງໝົດໃນປີ, ຖ້າກິດຈະການ ຫຼືໂຄງການຫາກໄດ້ປະກອບສ່ວນຕໍ່ກັບການແກ້ໄຂຄວາມທຸກຍາກ, ການພັດທະນາຊີວິດການເປັນຢູ່ຂອງປະຊາຊົນໃນພື້ນທີ່ດີຂຶ້ນ ແລະໃນເຂດຫ່າງໄກສອກຫຼີກລັດຍັງຈະຍົກເວັ້ນຄ່າພາສີ ແລະອາກອນນໍາເຂົ້າຂອງບັນດາວັດຖຸອຸປະກອນການກໍ່ສ້າງກິດ ຈະການຂອງໂຄງການອີກດ້ວຍ.

แชร์