ໂດດເດັ່ນ ໂສມລາຄາສະຖານີລົດໄຟທີ່ຫຼວງພະບາງ

ຂ່າວ: ສີສຸວັນ 

   ພາຍຫຼັງທີ່ໄດ້ສໍາເລັດການກໍ່ສ້າງພາກສ່ວນຫຼັງຄາ, ສະຖານີລົດໄຟຫຼວງພະບາງຊຶ່ງມີທີ່ຕັ້ງຢູ່ທີ່ພາກເໜືອຂອງປະເທດລາວກໍ່ໄດ້ເປີດຜ້າທີ່ປົກຄຸມຮູບໂສມອອກ, ຊຶ່ງໂຄງສ້າງຂອງຫຼັງຄາໄດ້ນໍາໃຊ້ຮູບແບບ ”ສາມລວງຕັ້ງໜຶ່ງລວງຂວາງ” ຊຶ່ງເປັນແບບທີ່ມີຄວາມຊັບຊ້ອນ ແລະກໍ່ຖືວ່າເປັນອາຄານສະຖານີທີ່ມີຄວາມໂດດເດັ່ນທີ່ສຸດໃນທັງໝົດຂອງສາຍທາງລົດໄຟລາວ-ຈີນ.

   ສະຖານີລົດໄຟຫຼວງພະບາງຊຶ່ງຮັບເໝົາກໍ່ສ້າງໂດຍກຸ່ມກໍ່ສ້າງທາງລົດໄຟ ສປ ຈີນ, ມີເນື້ອທີ່ປຸກສ້າງທັງໝົດ 7.970 ຕາແມັດ, ຕິດຕັ້ງ 2 ຊານສະຖານີ 4 ສາຍທາງ, ຮອງຮັບຜູ້ໂດຍສານໄດ້ຫຼາຍເຖິງ 1.200 ຄົນ, ການອອກແບບໂຄງສ້າງເຫຼັກຂອງສະຖານີແຫ່ງນີ້ມີຄວາມ ຊັບຊ້ອນ, ຊຶ່ງອອກແບບເປັນແບບໂຄ້ງຄູ່, ແບບສາມລວງຕັ້ງ, ໜຶ່ງລວງຂວາງ, ແລະແບບພິເສດ, ລະດັບຄວາມສູງຂອງເນີນຫຼັງຄາຫາໂຄງສ້າງແມ່ນ 22.6 ແມັດ, ສ່ວນຊັ້ນໂຄງສ້າງເຫຼັກແບບພິເສດມີ 5 ຊັ້ນ, ຊຶ່ງມີຫຼາຍຂັ້ນຕອນໃນການປະກອບ ແລະຕິດຕັ້ງພ້ອມທັງຕ້ອງມີຄວາມລະອຽດສູງ, ຊຶ່ງກໍ່ຖືວ່າເປັນສະຖານີທີ່ມີໂຄງສ້າງທີ່ຊັບຊ້ອນ ແລະການກໍ່ສ້າງມີຄວາມຫຍຸ້ງຍາກທີ່ສຸດໃນສາຍທາງ.

  ເພື່ອໃຫ້ສໍາເລັດການກໍ່ສ້າງຫຼັງຄາທີ່ມີຄຸນນະພາບ ແລະມີມາດຕະຖານສູງທາງໂຄງການໄດ້ນໍາໃຊ້ເຕັກໂນໂລຊີ BIM ສ້າງແບບຈໍາລອງຂໍ້ມູນອາຄານພ້ອມທັງໄດ້ສ້າງແຜນງານກໍ່ສ້າງພິເສດກັບຊ່ຽວຊານ ສປ ຈີນ ແລະໃນຊ່ວງການປະເຊີນໜ້າກັບຜົນກະທົບຂອງພະຍາດ COVID-19 ທາງໂຄງການກໍ່ໄດ້ສ້າງຄວາມເຂັ້ມແຂງໃຫ້ແກ່ການຈັດຕັ້ງການກໍ່ສ້າງ ແລະເພີ່ມທະວີດ້ານຊັບບພະຍາກອນພ້ອມທັງເສີມສ້າງການປະຕິບັດດ້ານຄຸນນະພາບ ແລະການກວດຮັບດ້ານເຕັກນິກຂອງສະໜາມກໍ່ສ້າງ, ໄດ້ສໍາເລັດການແກ້ໄຂບັນຫາແບບຫຼັງຄາທີ່ມີຫຼາຍຊັ້ນ, ບັນຫາຂອງໄລຍະຫ່າງ,ບັນຫາສະຖານທີ່ໃນການກຽມໜ້າວຽກທີ່ບໍ່ພຽງພໍ, ບັນຫາການຂົນສົ່ງໂຄງສ້າງທີ່ມີຄວາມຍາກລໍາບາກ ແລະອື່ນໆ, ຊຶ່ງໄດ້ຮັບປະກັນເຖິງຄວາມປອດໄພແກ່ຊັ້ນໂຄງສ້າງເຫຼັກຂອງຫຼັງຄາເພື່ອໃຫ້ສໍາເລັດການກໍ່ສ້າງທີ່ໄດ້ຄຸນນະພາບ.

   ປະຈຸບັນນີ້ສະຖານີລົດໄຟຫຼວງພະບາງແມ່ນຊ່ວງທີ່ກໍາລັງດໍາເນີນວຽກງານດ້ານການຕົບແຕ່ງ ແລະຕິດຕັ້ງເຄື່ອງໄຟຟ້າ, ຄາດວ່າເດືອນສິງຫານີ້ຈະປາກົດຮູບໂສມທັງໝົດຂອງອາຄານສະຖານີ.

แชร์