JDB ປະຊຸມທາງໄກທົ່ວປະເທດ ທົບທວນທຸລະກິດກາງປີ ແລະວາງແຜນ 6 ເດືອນທ້າຍປີ

  ໃນວັນທີ 9 ກໍລະກົດ 2021 ທີ່ສໍານັກງານໃຫຍ່ທະນາຄານຮ່ວມພັດທະນາໄດ້ເປີດກອງປະຊຸມທາງໄກດ້ວຍລະບົບ Video Conference ກັບໜ່ວຍບໍລິການທົ່ວປະເທດ, ເປັນກຽດເຂົ້າຮ່ວມໂດຍທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາມີຄະນະອໍານວຍການຕະຫຼອດເຖິງຜູ້ບໍລິຫານລະດັບສູງກໍ່ໄດ້ເຂົ້າຮ່ວມໃນກອງປະຊຸມຄັ້ງນີ້.

    ກ່າວເປີດພິທີຢ່າງເປັນທາງການໂດຍ ທ່ານ ວິໄລ ສີພະພອນ ຜູ້ອໍານວຍການໃຫຍ່ທະນາຄານຮ່ວມພັດທະນາໄດ້ສະຫຼຸບໂດຍຫຍໍ້ກ່ຽວກັບຜົນການດໍາເນີນທຸລະກິດໃນໄລຍະຜ່ານມາເຖິງແມ່ນວ່າຈະໄດ້ຮັບຜົນກະທົບຈາກພະຍາດໂຄວິດ19 ກໍ່ຕາມ, ຍັງເຮັດໃຫ້ການດໍາເນີນທຸລະກິດເປັນໄປຢ່າງປົກກະຕິຍ້ອນຄວາມເອົາໃຈໃສ່ຂອງຜູ້ບໍລິ ຫານ ແລະພະນັກງານຢ່າງຕັ້ງໜ້າຈຶ່ງເຮັດໃຫ້ຜົນປະກອບການ 6 ເດືອນຕົ້ນປີ 2021 ຍັງຖືວ່າຢູ່ໃນລະດັບດີ,ພ້ອມດຽວກັນທ່ານໄດ້ຮຽກຮ້ອງໃຫ້ມີຄວາມສາມະຄີເປັນປຶກແຜ່ນທີ່ສໍາຄັນແມ່ນຫົວໜ້າຕ້ອງມີຄວາມເປັນຜູ້ນໍາ-ນໍາພາທີມງານໃນການບໍລິການລູກຄ້າໃຫ້ມີຄວາມປະທັບໃຈເພື່ອບັນລຸເປົ້າໝາຍ KPI ທີ່ວາງໄວ້ສືບຕໍ່ແຜນການ 6 ເດືອນທ້າຍປີແມ່ນຕ້ອງໄດ້ສູ້ຊົນເພື່ອຮັກສາຖານລູກຄ້າເກົ່າໄວ້ ແລະ ຂະຫຍາຍລູກຄ້າໃໝ່ໃຫ້ກ້ວາງຂວາງ, ການປ່ອຍສິນເຊື່ອເຫັນວ່າເພີ່ມຂຶ້ນຫຼາຍເທົ່າຕົວເມື່ອປຽບທຽບກັບປີຜ່ານມາ.

 ຈາກນັ້ນກອງປະຊຸມກໍ່ໄດ້ມີການລາຍງານສະພາບຄ່ອງຖານະການເງິນ 6 ເດືອນຕົ້ນປີ 2021 ໂດຍພະແນກບໍລິຫານທຶນ ແລະພະແນກບັນຊີເຫັນວ່າລາຍຮັບເພີ່ມຂຶ້ນ 38% ແລະມີກໍາໄລກ່ອນອາກອນປະຕິບັດໄດ້ 23% ຂອງແຜນການ ປີ2021 ຖືວ່າເປັນຕົວເລກທີ່ໜ້າເພິ່ງພໍໃຈ.

   ຈາກນັ້ນກໍ່ໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາຂອງຜູ້ບໍລິຫານ ແລະການມີຄໍາຄິດຄໍາເຫັນຈາກໜ່ວຍບໍລິການຕ່າງໆ ໃນຂອບເຂດທົ່ວປະເທດ.

    ໃນຕອນທ້າຍຂອງກອງປະຊຸມ ທ່ານ ເອກະພັນ ພະພິທັກ ປະທານສະພາບໍລິຫານທະນາຄານຮ່ວມພັດທະນາກໍ່ໄດ້ມີຄໍາຄິດຄໍາເຫັນຕໍ່ກອງປະຊຸມດັ່ງກ່າວບາງຕອນທ່ານໄດ້ຍົກໃຫ້ເຫັນພາວະການເປັນຜູ້ນໍາຕ້ອງມີແນວຄິດການເມືອງໜັກແໜ້ນຮູ້ນໍາພາພະນັກງານເພື່ອບັນລຸເປົ້າໝາຍທີ່ວາງໄວ້ໃຫ້ປາກົດຜົນເປັນຈິງເພື່ອປະຕິບັດແຜນການ 6 ເດືອນທ້າຍປີ 2021 JDB ຕ້ອງໄດ້ອອກແຮງສູ້ຊົນສ້າງຜົນກໍາໄລໃຫ້ບັນລຸເປົ້າໝາຍທີ່ວາງໄວ້ເພື່ອປະກອບສ່ວນໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງໂດຍໄປຕາມຄໍາຂວັນຂອງທະນາຄານຮ່ວມພັດທະນາ “ເຕີບໃຫ່ຍໄປພ້ອມກັນ”.

แชร์