ເຕັກນິກການປູກໝາກຂຽບ

 ໝາກຂຽບເປັນໝາກໄມ້ທີ່ສາມາດປັບຕົວເຂົ້າກັບສະພາບແວດລ້ອມໄດ້ດີ ແລະນິຍົມປູກໃນເຂດອາກາດຮ້ອນ, ເຂດອົບອຸ່ນໃນສ່ວນຕ່າງໆຂອງໂລກ, ພ້ອມທັງນິຍົມບໍລິໂພກທົ່ວໄປທັງພາຍໃນ ແລະຕ່າງປະເທດຊຶ່ງເໝາະສົມຢ່າງຍິ່ງທີ່ຊາວສວນຈະຫັນມາປູກເພື່ອເປັນສິນຄ້າ, ເພາະວ່າໃນປະຈຸບັນການປູກໝາກໄມ້ເປັນສິນຄ້າຢູ່ພາຍໃນປະເທດເຮົາຍັງຖືວ່າໜ້ອຍຢູ່ເມື່ອທຽບກັບຕ່າງປະເທດ.

  ແຫຼ່ງຂໍ້ມູນຈາກສູນຄົ້ນຄວ້າກະສິກໍາໃຫ້ຮູ້ວິທີປູກໝາກຂຽບຊຶ່ງສາມາດປະຕິບັດໄດ້ງ່າຍໆຄື: ຄວນຂຸດຂຸມປູກໃຫ້ມີຂະໜາດກວ້າງ, ຍາວ ແລະເລິກປະມານ 50 ຊັງຕີແມັດ, ໄລຍະປູກ 3x3 ແມັດຕໍ່ຕົ້ນ, ປະມານ 150 ຕົ້ນຕໍ່ໄລ່, ຫຼັງຈາກທີ່ກຽມ ຂຸມສຳເລັດແລ້ວໃຫ້ປະສົມດິນກັບຝຸ່ນຄອກຈຳນວນ 5 ກິໂລກຣາມ ແລະປຸ໋ຍຣອດຟໍສ ເຟດ ຈຳນວນ 500 ກຣາມ ເຂົ້າກັນໃນຂຸມ ສູງປະມານ 2/3 ຂອງຂຸມ, ແລ້ວຍົກຕົ້ນ ໄມ້ທີ່ກ້າໄວ້ນັ້ນລົງໃນຂຸມ ໂດຍໃຫ້ລະດັບຂອງດິນໃນຖົງສູງກວ່າລະດັບດິນປາກຂຸມເລັກນ້ອຍ, ໃຊ້ມີດແຫຼມແລ່ງຖົງຈາກກົ້ນຂຶ້ນຫາປາກຖົງຢາງທັງ 2 ດ້ານ (ຊ້າຍ ແລະຂວາ), ຈາກນັ້ນໃຫ້ດຶງຖົງຢາງອອກໂດຍລະວັງຢ່າໃຫ້ດິນແຕກແລ້ວກວດເອົາດິນທີ່ເຫຼືອລົງໃນຂຸມ, ກົດດິນບໍລິເວນກົກຕົ້ນໃຫ້ແໜ້ນ, ພ້ອມທັງປັກໄມ້ ແລະ ມັດເຊືອກໄວ້ເພື່ອປ້ອງກັນລົມພັດແລ້ວ ຫາວັດສະດຸປົກດິນບໍລິເວນລຳຕົ້ນເຊັ່ນ: ເຟືອງ, ຫຍ້າແຫ້ງ ແລະຫົດນ້ຳໃຫ້ຊຸ່ມ, ພ້ອມເຮັດຮົ່ມບັງ ເພື່ອຊ່ວຍກັນແສງແດດ.

ສໍາລັບການຮັກສາ ແລະໃສ່ປຸ໋ຍແມ່ນສາມາດປະຕິບັດຄື: ຕົ້ນທີ່ຍັງບໍ່ທັນໃຫ້ຜົນຜະລິດໃສ່ປຸ໋ຍວິທະຍາສາດສູດ 15-15-15 ໃນອັດຕາສ່ວນ 0,5 ກິໂລກຣາມຕໍ່ຕົ້ນຕໍ່ປີ, ແບ່ງໃສ່ 2-3 ຄັ້ງ, ສ່ວນຕົ້ນທີ່ໃຫ້ຜົນຜະລິດແລ້ວກໍ່ສາມາດແບ່ງໄລຍະການໃຫ້ ປຸ໋ຍດ້ວຍບຳລຸງຕົ້ນໃຊ້ປຸ໋ຍວິທະຍາສາດ ສູດ 15-15-15, ສ່ວນໄລຍະອອກດອກ ຈະໃຊ້ສູດ 8-24-24, ສຳລັບໄລຍະເປັນ ໝາກແມ່ນ ໃຊ້ສູດ 15-15-15  ແລະໄລຍະ ສຸດທ້າຍແມ່ນຈະປັບປຸງຄຸນນະພາບຂອງໝາກໃຫ້ໃຫຍ່ ແລະຫວານໃຊ້ສູດ 13-13-21. ສະເພາະປະລິມານປຸ໋ຍທີ່ໃຊ້ແມ່ນຂຶ້ນຢູ່ກັບອາຍຸຂອງຕົ້ນ ແລະຜົນຜະລິດຈາກຕົ້ນ, ຊຶ່ງອັດຕາທີ່ໃຊ້ຢູ່ລະຫວ່າງ 2-4 ກິ ໂລກຣາມຕໍ່ຕົ້ນຕໍ່ປີ.

ສ່ວນການໃຫ້ນ້ຳໃນໄລຍະການປູກໃໝ່ຈຳເປັນຕ້ອງໃຫ້ນ້ຳຢ່າງສະໝໍ່າສະເໝີເພາະຈະຊ່ວຍໃຫ້ໝາກຂຽບຈະເລີນເຕີບໂຕໄດ້ໄວ, ຈຳນວນລອດຕາຍສູງ, ໝາກ ຂຽບຈະເລີ່ມໃຫ້ໝາກໄດ້ໃນປີທີ 2, ຖ້າໃຫ້ນ້ຳແກ່ຕົ້ນໝາກຂຽບສະໝໍ່າສະເໝີຈະຊ່ວຍໃຫ້ຂະໜາດຂອງໝາກໃຫຍ່ ແລະ ມີຄຸນນະພາບດີ.

ໂດຍ: ນໍ້າເໝີຍ

แชร์