6 ເດືອນ ອັດຕະປືລາຍຮັບ 100 ຕື້ກວ່າກີບ

ຂ່າວ-ພາບ: ຫຼວງອາໄພ

    ທ່ານ ນາງ ໄຍຄໍາ ສີຊານົນ ຮອງຫົວໜ້າພະແນກການເງິນແຂວງອັດຕະປືໄດ້ລາຍງານໃນກອງປະຊຸມເຊື່ອມຊຶມມະຕິກອງປະຊຸມໃຫຍ່ ຄັ້ງທີ Xl ຂອງສູນກາງພັກ ແລະມະຕິ Xl ຂອງອົງຄະນະພັກແຂວງໃນຂົງເຂດການເງິນເມື່ອບໍ່ດົນມານີ້ວ່າ: ໃນ 6 ເດືອນຕົ້ນປີ 2021 ນີ້,ຄະນະພັກຮາກຖານພະແນກການເງິນແຂວງໄດ້ເອົາໃຈໃສ່ນໍາພາ-ຊີ້ນໍາວຽກງານການຈັດເກັບລາຍຮັບເຂົ້າງົບປະມານຢ່າງມີຈຸດສຸມ ແລະມີຜົນສໍາເລັດສະແດງອອກໃນ 6 ເດືອນທົ່ວແຂວງສາມາດຈັດເກັບລາຍຮັບເຂົ້າງົບປະ ມານໄດ້ທັງໝົດ 100 ຕື້ກວ່າກີບ ຫຼື ເທົ່າກັບ 75,20% ຂອງແຜນການປີ. ໃນນີ້, ຮັບຈາກພູດສູນກາງມີ 40,8 ຕື້ກວ່າກີບ ເທົ່າກັບ 16,34% ຂອງແຜນການປີ ຊຶ່ງຮັບຈາກສ່ວຍສາອາກອນມີ 34,6 ຕື້ກວ່າກີບ ເທົ່າກັບ 40,74%, ຮັບຈາກກອງກວດກາພາສີ 69,9 ລ້ານກວ່າກີບ ເທົ່າກັບ 2% ຂອງແຜນການປີ, ຮັບຈາກ ດ່ານພາສີສາກົນພູເກືອ 18,5 ຕື້ກວ່າກີບ ເທົ່າກັບ 58,88% ຂອງແຜນການປີ, ຮັບຈາກຊັບສິນຂອງລັດ 17 ຕື້ກວ່າກີບ.

   ສຳລັບ 6 ເດືອນທ້າຍປີ 2021 ໄດ້ກໍານົດຄາດໝາຍຈັດເກັບລາຍຮັບເຂົ້າງົບປະມານໃຫ້ໄດ້ທັງໝົດ 33 ຕື້ກວ່າກີບ ເທົ່າກັບ 24,77% ຂອງແຜນການປີ. ໃນນັ້ນ, ຈະເກັບລາຍຮັບຈາກສ່ວຍສາອາກອນໃຫ້ໄດ້ 50 ຕື້ກວ່າກີບ, ຮັບຈາກພາສີທີ່ດິນໃຫ້ໄດ້ 3 ຕື້ກວ່າກີບ ເທົ່າກັບ 98% ຂອງແຜນການປີ, ຮັບຈາກຊັບສິນຂອງລັດໃຫ້ໄດ້ 11 ຕື້ກວ່າກີບ. ເພື່ອບັນລຸຕາມແຜນການດັ່ງກ່າວ, ທາງຄະນະພັກຮາກຖານພະແນການເງິນແຂວງຈະສືບຕໍ່ນໍາພາຊີ້ນໍາສະມາຊິກພັກທຸກສະຫາຍ, ພະນັກ ງານທຸກຄົນໃນການຍົກສູງຄວາມຮັບຜິດຊອບການເກັບລາຍຮັບ, ສືບຕໍ່ເຜີຍແຜ່ບັນດາກົດໝາຍ, ນິຕິກຳຕ່າງໆໃຫ້ພະນັກງານ-ລັດຖະກອນ, ນັກທຸລະກິດ, ພໍ່ຄ້າຊາວຂາຍ, ພໍ່ແມ່ປະຊາຊົນຕື່ນຕົວເປັນເຈົ້າການປະຕິບັດພັນທະຂອງຕົນໃຫ້ຖືກຕ້ອງຄົບຖ້ວນ ແລະທັນເວລາ. ສືບຕໍ່ເກັບກູ້ໜີ້ສິນທີ່ຍັງຄ້າງມອບອາກອນ ແລະສັບສິນຂອງລັດ ນຳໃຊ້ມາດຕະການຢ່າງເຄັ່ງຄັດຕໍ່ຜູ້ທີ່ຝ່າຝືນລະບຽບກົດໝາຍຈັດຕັ້ງແກ້ໄຂສະພາບການສ້າງບົດສະຫຼຸບລາຍງານການເງິນແບບຫຼຸບທຶນ, ປິດບັງ, ປອມແປງ, ຊຸກເຊື່ອງ ໃຫ້ສາມາດຈັດເກັບລາຍຮັບຕາມຄວາມເປັນຈິງ, ສືບຕໍ່ປັບປຸງລະບົບການຄຸ້ມຄອງເຄື່ອງມືທີ່ທັນສະໄໝເຂົ້າໃນການຄຸ້ມຄອງເກັບລາຍຮັບໂດຍໃຫ້ຂະແໜງການສາຍຕັ້ງສະໜັບສະໜູນດ້ານງົບປະມານ ແລະວິຊາການ, ຫັນບັນດາທຸລະກິດທີ່ມີເງື່ອນໄຂໃຫ້ມາຖືບັນຊີເຂົ້າສູ່ລະບົບອາກອນມູນຄ່າເພີ່ມນຳໃຊ້ໃບບິນ ແລະຫັນເປັນທັນສະໄໝ.

แชร์