ຄໍາມ່ວນ ສຳເລັດສ້າງຫ້ອງການພະແນກການຄ້າແຂວງ

 ຂ່າວ: ມະນີວັນ

    ພິທີມອບ-ຮັບໂຄງການກໍ່ສ້າງຫ້ອງການພະແນກອຸດສາຫະກໍາ ແລະການຄ້າແຂວງຄໍາມ່ວນ ( ຫລັງໃໝ່ ) ໄດ້ຈັດຂຶ້ນໃນວັນທີ 7 ກໍລະກົດ 2021 ລະຫວ່າງພະແນກອຸດສາຫະກຳ ແລະການຄ້າແຂວງ (ເຈົ້າຂອງໂຄງການ) ແລະບໍລິສັດ ເອັສວີກຣຸບ ຈຳກັດ ( ຜູ້ຮັບເໝົາກໍ່ສ້າງ ) ເປັນກຽດເຂົ້າຮ່ວມເປັນສັກຂີພິຍານໂດຍທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ມີບັນດາພະແນກການ, ຂະແໜງການ, ແຂກຖືກເຊີນ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

   ໂຄງການກໍ່ສ້າງຫ້ອງການພະແນກອຸດສາຫະກຳ ແລະການຄ້າແຂວງຄຳມ່ວນ ( ຫຼັງໃໝ່ ) ຕັ້ງຢູ່ບ້ານສີວິໄລ, ເມືອງທ່າແຂກ, ແຂວງຄຳມ່ວນ, ເປັນອາຄານ 3 ຊັ້ນຂະໜາດ 15.9 X 30.6 ແມັດ, ປະກອບມີຫ້ອງເຮັດວຽກ 16 ຫ້ອງ, ຫ້ອງຂາເຂົ້າ-ຂາອອກ 2 ຫ້ອງ, ຫ້ອງປະຊຸມ 2 ຫ້ອງ ແລະຫ້ອງນໍ້າ 7 ຫ້ອງ ພ້ອມສຸຂະພັນພື້ນປູກະໂລ້, ເພດານຍິບຊໍາລຽບ, ປະຕູ ແລະປ່ອງຢ້ຽມຄົບຊຸດ ( ບໍ່ລວມໄຟຟ້າພາຍໃນອາຄານ ແລະນໍ້າປະປາ ) ເປັນອາຄານທີ່ອອກແບບເປັນເອກະລັກຕາມແບບອາຄານລາວປະຍຸກປະສົມປະສານກັບຄວາມທັນສະໄໝລວມມູນຄ່າການກໍ່ສ້າງທັງໝົດ 4,9 ຕື້ກີບ, ໂດຍແມ່ນງົບປະມານຂອງລັດແຕ່ບໍລິສັດເປັນຜູ້ລົງທຶນແລ້ວຂໍເບີກຈ່າຍຕາມງົບປະມານລັດທີ່ອອກໃຫ້ໃນແຕ່ລະປີ.

   ນັບແຕ່ປີ 2015 ຮອດປະຈຸບັນໄດ້ຮັບການຊຳລະຄ່າກໍ່ສ້າງໂຄງການຈາກງົບປະມານລັດຈຳນວນ 834,9 ລ້ານກີບ ແລະຍັງຄ້າງຊຳລະ 4,13 ຕື້ກີບ. ໄລຍະເວລາກໍ່ສ້າງເລີ່ມແຕ່ວັນທີ 1 ມີນາ 2015 ຫາ ມີນາ 2021 ແມ່ນສຳເລັດຊຶ່ງໃຊ້ເວລາລວມທັງໝົດ 6 ປີ.

   ເປັນກຽດລົງນາມໃນບົດບັນທຶກມອບ-ຮັບອາຄານດັ່ງກ່າວໂດຍທ່ານ ບຸນໂຮມ ມຸກດາສັກ ຫົວໜ້າພະແນກອຸດສາຫະກຳ ແລະການຄ້າແຂວງຄຳມ່ວນ ແລະທ່ານ ສຸດທະວົງ ເຫມມາວັນ ອຳນວຍການບໍລິສັດເອັສວີ ກຣຸບ ແລະທ່ານ ເຂັມແກ້ວ ຍົດສົມບັດ ຕາງໜ້າລັດວິສາຫະກິດສຳຫຼວດ-ອອກແບບ ແລະກໍ່ສ້າງເຄຫາສະຖານແຂວງຄໍາມ່ວນ (ບໍລິສັດທີປຶກສາ).

แชร์